ನವದೆಹಲಿಯ ಬಡವರು ಮತ್ತು ಶ್ರಮಜೀವಿಗಳ ಹಸಿವು ನೀಗಿಸಲು ಅಲ್ಲಿನ ಬಿಜೆಪಿ ನೇತೃತ್ವದ ಸರ್ಕಾರ ಮಹತ್ವದ ಹೆಜ್ಜೆಯಿಟ್ಟಿದೆ. ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ಜನ್ಮ ಶತಮಾನೋತ್ಸವದ ಸಂದರ್ಭದಲ್ಲಿ, ದೆಹಲಿ ಸರ್ಕಾರ ಗುರುವಾರ ‘ಅಟಲ್ ಕ್ಯಾಂಟೀನ್’ಗಳನ್ನು ಲೋಕಾರ್ಪಣೆ ಮಾಡಿದೆ. ಕೇವಲ 5 ರೂಪಾಯಿಗೆ ಊಟ ನೀಡುವ ಈ ಯೋಜನೆಯು, ರಾಷ್ಟ್ರರಾಜಧಾನಿಯ ಜನಸಾಮಾನ್ಯರ ಪಾಲಿಗೆ ಹೊಸ ಭರವಸೆಯಾಗಿ ಮೂಡಿಸಿದೆ. ಆದರೆ, ಈ ಯೋಜನೆಯ ಸ್ವರೂಪ, ಕಾರ್ಯವೈಖರಿ ಮತ್ತು ಉದ್ದೇಶಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ಇದು ಕರ್ನಾಟಕದಲ್ಲಿ ಕಾಂಗ್ರೆಸ್ ಸರ್ಕಾರ ಜಾರಿಗೆ ತಂದಿದ್ದ ಜನಪ್ರಿಯ ‘ಇಂದಿರಾ ಕ್ಯಾಂಟೀನ್’ ಯೋಜನೆಯನ್ನು ನೆನಪಿಸದೇ ಇರದು. ದಕ್ಷಿಣದ ಜನಪ್ರಿಯ ಯೋಜನೆಯೊಂದನ್ನು ಉತ್ತರದ ಸರ್ಕಾರವೊಂದು ಹೆಸರು ಬದಲಿಸಿ ಅಳವಡಿಸಿಕೊಂಡಿತೇ ಎಂಬ ಚರ್ಚೆಯೂ ಈಗ ಮುನ್ನೆಲೆಗೆ ಬಂದಿದೆ.
ಏನಿದು ಅಟಲ್ ಕ್ಯಾಂಟೀನ್ ಯೋಜನೆ?
ಚುನಾವಣಾ ಪ್ರಣಾಳಿಕೆಯಲ್ಲಿ ನೀಡಿದ್ದ ಭರವಸೆಯಂತೆಯೇ, ಮುಖ್ಯಮಂತ್ರಿ ರೇಖಾ ಗುಪ್ತಾ ನೇತೃತ್ವದ ಸರ್ಕಾರ ದೆಹಲಿಯಾದ್ಯಂತ ಒಟ್ಟು 100 ಕ್ಯಾಂಟೀನ್ಗಳನ್ನು ಸ್ಥಾಪಿಸುವ ಗುರಿ ಹೊಂದಿದೆ. ಗುರುವಾರ 45 ಕ್ಯಾಂಟೀನ್ಗಳಿಗೆ ಚಾಲನೆ ನೀಡಲಾಗಿದ್ದು, ಉಳಿದ 55 ಘಟಕಗಳ ಕಾಮಗಾರಿ ಅಂತಿಮ ಹಂತದಲ್ಲಿದೆ.
ಮೆನು ಮತ್ತು ಸೌಲಭ್ಯಗಳು
ಇಲ್ಲಿ ಬಡವರು, ಕೂಲಿ ಕಾರ್ಮಿಕರು ಮತ್ತು ಕಡಿಮೆ ಆದಾಯದ ಜನರಿಗೆ ಕೇವಲ 5 ರೂಪಾಯಿ ದರದಲ್ಲಿ ಹೊಟ್ಟೆತುಂಬಾ ಊಟ ದೊರೆಯಲಿದೆ. ಮೆನುವಿನಲ್ಲಿ ಪ್ರಮುಖವಾಗಿ ಅನ್ನ–ಬೇಳೆ (ದಾಲ್–ಚಾವಲ್), ರೊಟ್ಟಿ ಮತ್ತು ತರಕಾರಿ ಪಲ್ಯವನ್ನು ಒಳಗೊಂಡಿರುತ್ತದೆ. ಪ್ರತಿ ಕ್ಯಾಂಟೀನ್ನಲ್ಲಿ ಬೆಳಿಗ್ಗೆ ಮತ್ತು ಸಂಜೆ ತಲಾ 500 ಊಟಗಳನ್ನು ವಿತರಿಸುವ ಸಾಮರ್ಥ್ಯವನ್ನು ಕಲ್ಪಿಸಲಾಗಿದೆ.
ಸ್ವಚ್ಛತೆ ಮತ್ತು ಹೈಟೆಕ್ ಸ್ಪರ್ಶಕ್ಕೆ ಒತ್ತು ನೀಡಿರುವುದು ಇಲ್ಲಿನ ಮತ್ತೊಂದು ವಿಶೇಷ. ಎಲ್ಪಿಜಿ ಆಧಾರಿತ ಅಡುಗೆ ವ್ಯವಸ್ಥೆ, ಶುದ್ಧ ಕುಡಿಯುವ ನೀರಿಗಾಗಿ ಕೈಗಾರಿಕಾ ಮಟ್ಟದ ಆರ್ಒ ಘಟಕಗಳು ಮತ್ತು ತರಕಾರಿಗಳನ್ನು ಸಂರಕ್ಷಿಸಲು ಕೋಲ್ಡ್ ಸ್ಟೋರೇಜ್ ವ್ಯವಸ್ಥೆ ಇಲ್ಲಿರಲಿದೆ. ದೆಹಲಿ ನಗರಾಭಿವೃದ್ಧಿ ಮಂಡಳಿಯ ಡಿಜಿಟಲ್ ಪ್ಲಾಟ್ಫಾರ್ಮ್ ಮೂಲಕ ಅಧಿಕಾರಿಗಳು ಸಿಸಿಟಿವಿ ಕ್ಯಾಮೆರಾಗಳ ಸಹಾಯದಿಂದ ನೈಜ ಸಮಯದಲ್ಲಿ ಕ್ಯಾಂಟೀನ್ ನಿರ್ವಹಣೆಯನ್ನು ಮೇಲ್ವಿಚಾರಣೆ ಮಾಡಲಿದ್ದಾರೆ.
ಇದನ್ನು ಓದಿದ್ದೀರಾ? ಕಾಬೂಲ್ನ ಐತಿಹಾಸಿಕ ಚಿತ್ರಮಂದಿರ ‘ಏರಿಯಾನ’ ಮೇಲೆ ಉರುಳಿತು ತಾಲಿಬಾನಿ ಬುಲ್ಡೋಜರ್
‘ಇಂದಿರಾ ಕ್ಯಾಂಟೀನ್’ ನಕಲೇ?
ಕರ್ನಾಟದಲ್ಲಿ ಸಿದ್ದರಾಮಯ್ಯ ನೇತೃತ್ವದ ಸರ್ಕಾರವಿದ್ದಾಗ ಜಾರಿಗೆ ತಂದ ‘ಇಂದಿರಾ ಕ್ಯಾಂಟೀನ್’ ಯೋಜನೆ ರಾಷ್ಟ್ರಮಟ್ಟದಲ್ಲಿ ಸದ್ದು ಮಾಡಿತ್ತು. ಹಸಿವು ಮುಕ್ತ ರಾಜ್ಯವನ್ನಾಗಿಸುವ ಉದ್ದೇಶದಿಂದ ಕಡಿಮೆ ದರದಲ್ಲಿ ಉಪಾಹಾರ ಮತ್ತು ಊಟ ನೀಡುವುದು ಅದರ ಗುರಿಯಾಗಿತ್ತು. ಈಗ ದೆಹಲಿಯಲ್ಲಿ ಆರಂಭವಾಗಿರುವ ‘ಅಟಲ್ ಕ್ಯಾಂಟೀನ್’ ಕೂಡ ಇದೇ ಮಾದರಿಯನ್ನು ಅನುಸರಿಸುತ್ತಿರುವಂತೆ ಸ್ಪಷ್ಟವಾಗಿ ಗೋಚರಿಸುತ್ತದೆ. ಕರ್ನಾಟಕದಲ್ಲಿ ₹5ಕ್ಕೆ ಉಪಾಹಾರ ಹಾಗೂ ₹10ಕ್ಕೆ ಊಟ ನೀಡಲಾಗುತ್ತಿತ್ತು. ದೆಹಲಿಯಲ್ಲಿಯೂ ₹5 ರಿಯಾಯಿತಿ ದರದಲ್ಲಿ ಊಟ ನೀಡಲಾಗುತ್ತಿದೆ. ಎರಡೂ ಯೋಜನೆಗಳ ಮೂಲ ಉದ್ದೇಶ ನಗರದ ಬಡವರಿಗೆ ಅಗ್ಗದ ದರದಲ್ಲಿ ಆಹಾರ ಒದಗಿಸುವುದೇ ಆಗಿದೆ.
ಇಂದಿರಾ ಕ್ಯಾಂಟೀನ್ಗಳಂತೆ ಇಲ್ಲಿಯೂ ನಿರ್ದಿಷ್ಟ ಮೆನು ಮತ್ತು ವ್ಯವಸ್ಥಿತವಾದ ಅಡುಗೆ ಕೋಣೆಗಳ ಪರಿಕಲ್ಪನೆಯನ್ನು ಅಳವಡಿಸಿಕೊಳ್ಳಲಾಗಿದೆ. ಆಡಳಿತಾತ್ಮಕವಾಗಿ ಮತ್ತು ಯೋಜನೆಯ ರಚನೆಯಲ್ಲಿ ಕರ್ನಾಟಕದ ಮಾದರಿಯನ್ನು ದೆಹಲಿ ಸರ್ಕಾರವು ಅನುಕರಣೆ ಮಾಡಿದೆ ಎಂದು ಹೇಳುವುದರಲ್ಲಿ ಯಾವುದೇ ಅತಿಶಯೋಕ್ತಿ ಇಲ್ಲ. ದಕ್ಷಿಣದ ಯಶಸ್ವಿ ಯೋಜನೆಯೊಂದು ಉತ್ತರದ ಆಡಳಿತಗಾರರಿಗೆ ದಾರಿ ತೋರಿಸಿದೆ ಎಂದೇ ಇದನ್ನು ಭಾವಿಸಬಹುದು.
ಕಣ್ಗಾವಲಿನಲ್ಲಿ ಊಟದ ವ್ಯವಸ್ಥೆ
ಗುಣಮಟ್ಟದಲ್ಲಿ ರಾಜಿ ಆಗಬಾರದು ಎಂಬ ಕಾರಣಕ್ಕೆ ದೆಹಲಿ ಸರ್ಕಾರ ತಂತ್ರಜ್ಞಾನದ ಮೊರೆ ಹೋಗಿದೆ. ಪ್ರತಿಯೊಂದು ಅಟಲ್ ಕ್ಯಾಂಟೀನ್ನಲ್ಲಿಯೂ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದು, ಊಟದ ಸರಬರಾಜು ಮತ್ತು ಸ್ವಚ್ಛತೆಯನ್ನು ಹಿರಿಯ ಅಧಿಕಾರಿಗಳು ಕಚೇರಿಯಲ್ಲೇ ಕುಳಿತು ಪರಿಶೀಲಿಸಲಿದ್ದಾರೆ.
