ಪಶ್ಚಿಮ ಬಂಗಾಳದ ರಾಜಕೀಯ ರಣರಂಗದಲ್ಲಿ ಮತ್ತೊಮ್ಮೆ ಸಿಡಿದೇಳುತ್ತಿರುವ ‘ಬಂಗಾಳದ ಹುಲಿ’ ಮಮತಾ ಬ್ಯಾನರ್ಜಿ! ಕಲ್ಲಿದ್ದಿಲು ಹಗರಣದ ಸುಳಿಯಲ್ಲಿ ಬಿಜೆಪಿ ಹೈಕಮಾಂಡ್ಗೆ ನೇರವಾಗಿ ಸವಾಲೊಡ್ಡಿ, ‘ಪೆನ್ ಡ್ರೈವ್’ ಬಾಂಬ್ ಸಿಡಿಸಿರುವ ದೀದಿ, ಅಮಿತ್ ಶಾ ಅವರನ್ನೇ ಗುರಿಯಾಗಿಸಿದ್ದಾರೆ. ಇಡಿ ಒತ್ತಡಕ್ಕೆ ತಲೆಬಾಗದೆ ಆಕ್ರಮಣಕಾರಿ ರೂಪ ತಾಳಿರುವ ಮಮತಾ, ಬಿಜೆಪಿ ಪಾಳಯದಲ್ಲಿ ನಡುಕ ಹುಟ್ಟಿಸಿದ್ದಾರೆ. ಈ ರಣಕಹಳೆ ಎಲ್ಲಿಗೆ ಸಾಗಲಿದೆ?
“ನನ್ನನ್ನು ರಾಜಕೀಯವಾಗಿ ಮುಗಿಸಲು ಬರುವವರು ಒಂದು ವಿಷಯ ನೆನಪಿಟ್ಟುಕೊಳ್ಳಬೇಕು; ನನ್ನನ್ನು ಎಷ್ಟು ಸದೆಬಡಿಯಲು ಯತ್ನಿಸುತ್ತೀರೋ, ಅಷ್ಟೇ ವೇಗವಾಗಿ ನಾನು ಪುಟಿದೇಳುತ್ತೇನೆ.” ಇದು ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ, ತೃಣಮೂಲ ಕಾಂಗ್ರೆಸ್ ಅಧಿನಾಯಕಿ ಮಮತಾ ಬ್ಯಾನರ್ಜಿ ಅವರ ಎಚ್ಚರಿಕೆಯ ಮಾತು. ಭಾರತೀಯ ರಾಜಕಾರಣದಲ್ಲಿ ‘ದೀದಿ’ ಎಂದೇ ಖ್ಯಾತರಾಗಿರುವ ಮಮತಾ, ಮತ್ತೊಮ್ಮೆ ತಮ್ಮ ‘ಬೀದಿ ಹೋರಾಟಗಾರ್ತಿ’ಯ ಅವತಾರ ತಾಳಿದ್ದಾರೆ. ಇತ್ತೀಚೆಗೆ ಜಾರಿ ನಿರ್ದೇಶನಾಲಯ (ಇ.ಡಿ) ಮತ್ತು ರಾಜ್ಯ ಸರ್ಕಾರದ ನಡುವಿನ ಹಗ್ಗಜಗ್ಗಾಟ ತಾರಕಕ್ಕೇರಿರುವಾಗಲೇ, ಮಮತಾ ಸಿಡಿಸಿರುವ ‘ಪೆನ್ ಡ್ರೈವ್’ ಬಾಂಬ್ ಬಿಜೆಪಿ ಪಾಳಯದಲ್ಲಿ ನಡುಕ ಹುಟ್ಟಿಸಿರುವುದಂತೂ ಸತ್ಯ.
ಕೇಂದ್ರದ ತನಿಖಾ ಸಂಸ್ಥೆಗಳನ್ನು ಬಳಸಿಕೊಂಡು ತಮ್ಮ ಸರ್ಕಾರದ ವರ್ಚಸ್ಸನ್ನು ಕುಗ್ಗಿಸಲಾಗುತ್ತಿದೆ ಎಂದು ದೀರ್ಘಕಾಲದಿಂದ ಆರೋಪಿಸುತ್ತಿದ್ದ ಮಮತಾ ಬ್ಯಾನರ್ಜಿ, ಈ ಬಾರಿ ರಕ್ಷಣಾತ್ಮಕ ಆಟಕ್ಕೆ ಬದಲಾಗಿ ಆಕ್ರಮಣಕಾರಿ ಆಟಕ್ಕೆ ಮುಂದಾಗಿದ್ದಾರೆ. ಬಂಗಾಳದಲ್ಲಿ ನಡೆದಿದೆ ಎನ್ನಲಾದ ಕಲ್ಲಿದ್ದಿಲು ಹಗರಣದ ಕೊಂಡಿಯನ್ನು ಅವರು ನೇರವಾಗಿ ಬಿಜೆಪಿಯ ಹೈಕಮಾಂಡ್ ಕೊರಳಿಗೆ ಸುತ್ತಿದ್ದಾರೆ.
”ನನ್ನ ಬಳಿ ಒಂದು ಪೆನ್ ಡ್ರೈವ್ ಇದೆ. ಅದರಲ್ಲಿ ಕಲ್ಲಿದ್ದಿಲು ಹಗರಣದ ಹಣ ಯಾರಿಗೆ ತಲುಪಿದೆ ಎಂಬ ಪಕ್ಕಾ ಸಾಕ್ಷ್ಯವಿದೆ” ಎಂದು ಮಮತಾ ಘೋಷಿಸಿರುವುದು ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ. ಅಷ್ಟೇ ಅಲ್ಲದೆ, ಈ ಹಗರಣದ ಹಣ ಬಂಗಾಳದ ಬಿಜೆಪಿ ನಾಯಕರಾದ ಜಗನ್ನಾಥ ಸರ್ಕಾರ್ ಮತ್ತು ಸುವೇಂದು ಅಧಿಕಾರಿ ಅವರ ಮೂಲಕ ಸಾಕ್ಷಾತ್ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಗೆ ತಲುಪಿದೆ ಎಂದು ಅವರು ನೇರ ಆರೋಪ ಮಾಡಿದ್ದಾರೆ. ಭ್ರಷ್ಟಾಚಾರದ ಅಸ್ತ್ರವನ್ನು ಪ್ರಯೋಗಿಸಿ ಟಿಎಂಸಿಯನ್ನು ಮಣಿಸಲು ಹವಣಿಸುತ್ತಿದ್ದ ಮೋದಿ-ಶಾ ಜೋಡಿಗೆ, ಮಮತಾ ಅದೇ ಅಸ್ತ್ರದ ಮೂಲಕ ತಿರುಗೇಟು ನೀಡಿರುವುದು ಬಿಜೆಪಿಯನ್ನು ತುಸು ಇಕ್ಕಟ್ಟಿಗೆ ಸಿಲುಕಿಸಿದೆ. ಈ ಆರೋಪಗಳು ಸಾಬೀತಾಗುತ್ತವೋ ಇಲ್ಲವೋ ಎಂಬುದು ತನಿಖೆಯ ವಿಷಯವಾದರೂ, ರಾಜಕೀಯವಾಗಿ ಇದು ಬಿಜೆಪಿಯ ನೈತಿಕತೆಯನ್ನು ಪ್ರಶ್ನಿಸುವಂತೆ ಮಾಡಿದೆ.
ದೀದಿಯ ಇತಿಹಾಸ ಮತ್ತು ಪುಟಿದೇಳುವ ಛಲ
ಮಮತಾ ಬ್ಯಾನರ್ಜಿ ಅವರನ್ನು ಟೀಕಾಕಾರರು ‘ಜಗಳಗಂಟಿ’ ಎಂದು ಕರೆದರೂ, ಅವರ ಬೆಂಬಲಿಗರಿಗೆ ಅವರು ಅನ್ಯಾಯದ ವಿರುದ್ಧ ಸಿಡಿದೇಳುವ ಹೋರಾಟಗಾರ್ತಿ. ಎಡಪಕ್ಷಗಳ ಭದ್ರಕೋಟೆಯಾಗಿದ್ದ ಬಂಗಾಳದಲ್ಲಿ, ಕಮ್ಯುನಿಸ್ಟರ ದಶಕಗಳ ಆಳ್ವಿಕೆಯನ್ನು ಅಂತ್ಯಗೊಳಿಸಿದ್ದು ಇದೇ ಮಮತಾ ಅವರ ಛಲ. ಅಂದು ಸಿಂಗೂರು ಮತ್ತು ನಂದಿಗ್ರಾಮದಲ್ಲಿ ರೈತರ ಪರವಾಗಿ ಅವರು ನಡೆಸಿದ ರಕ್ತಸಿಕ್ತ ಹೋರಾಟವೇ ಅವರನ್ನು ಅಧಿಕಾರದ ಗದ್ದುಗೆಗೆ ಏರಿಸಿತ್ತು.
ಇದನ್ನು ಓದಿದ್ದೀರಾ? ತುರ್ಕಮಾನ್ ಗೇಟ್ | ಅಂದು ಸಂಜಯ್ ಗಾಂಧಿ, ಇಂದು…? ಬದಲಾಗದ ಬುಲ್ಡೋಜರ್ ದರ್ಬಾರ್
ಇತಿಹಾಸದುದ್ದಕ್ಕೂ ಮಮತಾ ಬ್ಯಾನರ್ಜಿ ಅವರನ್ನು ಮೂಲೆಗುಂಪು ಮಾಡಲು ಪ್ರಯತ್ನಿಸಿದಾಗಲೆಲ್ಲಾ ಅವರು ಹೆಚ್ಚು ಶಕ್ತಿಶಾಲಿಯಾಗಿ ಹೊರಹೊಮ್ಮಿದ್ದಾರೆ. 2021ರ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿಯೂ ಬಿಜೆಪಿ ತನ್ನೆಲ್ಲಾ ಬಲ ಪ್ರಯೋಗಿಸಿತ್ತು. ಆದರೆ, ಕಾಲಿಗೆ ಬ್ಯಾಂಡೇಜ್ ಸುತ್ತಿಕೊಂಡು ವೀಲ್ ಚೇರ್ ನಲ್ಲಿ ಕುಳಿತು ಇಡೀ ರಾಜ್ಯ ಸುತ್ತಿರುವ ಮಮತಾ, ಬಿಜೆಪಿಯ ರಥಯಾತ್ರೆಯನ್ನು ತಡೆದು ನಿಲ್ಲಿಸಿದ್ದರು. ಈಗಲೂ ಅಷ್ಟೇ, ಇ.ಡಿ ದಾಳಿಗಳು ಮತ್ತು ಕೇಂದ್ರದ ಒತ್ತಡ ತಂತ್ರಗಳು ಮಮತಾ ಅವರನ್ನು ಕುಗ್ಗಿಸುವ ಬದಲು, ಅವರನ್ನು ಕೆರಳಿಸಿ ಕೆಂಪುಗೆಂಡವಾಗಿಸಿವೆ. ಕೆರಳಿದ ಮಮತಾ ಬಿಜೆಪಿ ಪಾಲಿಗೆ ಹೆಚ್ಚು ಅಪಾಯಕಾರಿ ಎಂಬುದನ್ನು ಕೇಸರಿ ನಾಯಕರು ತಡವಾಗಿ ಅರಿತುಕೊಳ್ಳುತ್ತಿದ್ದಾರೆಯೇ ಎಂಬ ಪ್ರಶ್ನೆ ಮೂಡಿದೆ.
ಹೈಕೋರ್ಟ್ ಮೆಟ್ಟಿಲೇರಿದ ಸಂಘರ್ಷ
ರಾಜಕೀಯ ಜಟಾಪಟಿ ಈಗ ನ್ಯಾಯಾಲಯದ ಅಂಗಳ ತಲುಪಿದೆ. ಇಡಿ ಅಧಿಕಾರಿಗಳ ಮೇಲಿನ ಹಲ್ಲೆ ಪ್ರಕರಣ ಮತ್ತು ಸಂದೇಶಖಾಲಿ ವಿವಾದಗಳು ಕೋಲ್ಕತ್ತಾ ಹೈಕೋರ್ಟ್ ಮೆಟ್ಟಿಲೇರಿವೆ. ಕೇಂದ್ರ ತನಿಖಾ ಸಂಸ್ಥೆಗಳು ರಾಜ್ಯ ಪೊಲೀಸರ ಸಹಕಾರವಿಲ್ಲದೆ ಕಾರ್ಯನಿರ್ವಹಿಸಲು ಸಾಧ್ಯವಿಲ್ಲ ಎಂಬ ಪರಿಸ್ಥಿತಿ ಒಂದೆಡೆಯಾದರೆ, ರಾಜ್ಯ ಪೊಲೀಸರು ತನಿಖೆಗೆ ಅಡ್ಡಿಪಡಿಸುತ್ತಿದ್ದಾರೆ ಎಂಬುದು ಇಡಿ ವಾದ. ಆದರೆ, ಮಮತಾ ಸರ್ಕಾರ ಈ ಕಾನೂನು ಹೋರಾಟವನ್ನು ‘ಒಕ್ಕೂಟ ವ್ಯವಸ್ಥೆಯ ಮೇಲಿನ ದಾಳಿ’ ಎಂದು ಬಿಂಬಿಸುತ್ತಿದೆ. ನ್ಯಾಯಾಲಯದ ಆದೇಶಗಳು ಏನೇ ಬಂದರೂ, ಅದನ್ನು ಜನತಾ ನ್ಯಾಯಾಲಯದಲ್ಲಿ ತಮ್ಮ ಪರವಾಗಿ ತಿರುಗಿಸಿಕೊಳ್ಳುವ ಕಲೆ ದೀದಿಗೆ ಕರಗತವಾಗಿದೆ.
ಬಿಜೆಪಿಯ ತಂತ್ರಕ್ಕೆ ತಿರುಗೇಟು?
ಪಶ್ಚಿಮ ಬಂಗಾಳದಲ್ಲಿ ಲೋಕಸಭಾ ಚುನಾವಣೆಯಲ್ಲಿ ಚೇತರಿಸಿಕೊಂಡಿರುವ ಬಿಜೆಪಿಗೆ, ಮಮತಾ ಅವರ ಈ ಹೊಸ ದಾಳಿ ನುಂಗಲಾರದ ತುತ್ತಾಗಿದೆ. ಸುವೇಂದು ಅಧಿಕಾರಿ ಅವರನ್ನು ಮುಂದಿಟ್ಟುಕೊಂಡು ಮಮತಾ ಸರ್ಕಾರವನ್ನು ಅಸ್ಥಿರಗೊಳಿಸುವ ತಂತ್ರ ಹೆಣೆಯುತ್ತಿದ್ದ ಬಿಜೆಪಿಗೆ, ಈಗ ಸುವೇಂದು ಅಧಿಕಾರಿ ಅವರನ್ನೇ ಗುರಿಯಾಗಿಸಿ ಮಮತಾ ನಡೆಸಿರುವ ದಾಳಿ ರಕ್ಷಣಾತ್ಮಕ ನಡೆ ಅನುಸರಿಸುವಂತೆ ಮಾಡಿದೆ. ಅದರಲ್ಲೂ ಅಮಿತ್ ಶಾ ಅವರ ಹೆಸರನ್ನು ನೇರವಾಗಿ ಎಳೆದು ತಂದಿರುವುದು ಮಮತಾ ಅವರ ಧೈರ್ಯವನ್ನು ತೋರಿಸುತ್ತದೆ. “ಕಲ್ಲಿದ್ದಿಲು ಕಳ್ಳರು ಯಾರು ಎಂಬುದು ಜಗತ್ತಿಗೆ ಗೊತ್ತಾಗಲಿ,” ಎಂದು ಸವಾಲು ಹಾಕುವ ಮೂಲಕ, ತನಿಖಾ ಸಂಸ್ಥೆಗಳ ವಿಶ್ವಾಸಾರ್ಹತೆಯನ್ನೇ ಅವರು ಪ್ರಶ್ನಿಸಿದ್ದಾರೆ.
ತಡವಿ ನೋಡಿಕೊಳ್ಳಬೇಕಾಗಿ ಬಂತೇ?
ಅಂತಿಮವಾಗಿ ಹೇಳುವುದಾದರೆ, ಬಂಗಾಳದ ರಾಜಕೀಯ ಕಣ ರಣರಂಗವಾಗಿದೆ. ಮಮತಾ ಬ್ಯಾನರ್ಜಿ ಅವರನ್ನು ಕೆಣಕಿ ಬಿಜೆಪಿ ತಡವಿ ನೋಡಿಕೊಳ್ಳಬೇಕಾಗಿ ಬಂದಿದೆಯೇ ಎಂಬ ಮಾತುಗಳು ಕೇಳಿಬರುತ್ತಿವೆ. ಏಕೆಂದರೆ, ಮಮತಾ ಕೇವಲ ರಾಜಕಾರಣಿಯಲ್ಲ, ಅವರೊಬ್ಬರು ಹುಟ್ಟು ಹೋರಾಟಗಾರ್ತಿ. ಭಾವನಾತ್ಮಕವಾಗಿ ಜನರನ್ನು ಸೆಳೆಯುವ, ಬಂಗಾಳಿ ಅಸ್ಮಿತೆಯನ್ನು ಬಡಿದು ಎಬ್ಬಿಸುವ ಚಾಕಚಕ್ಯತೆ ಅವರಿಗಿದೆ. ತಮ್ಮ ಬಳಿಯಿರುವ ‘ಪೆನ್ ಡ್ರೈವ್’ ಎಂಬ ಅಸ್ತ್ರವನ್ನು ಮಮತಾ ಯಾವಾಗ ಮತ್ತು ಹೇಗೆ ಬಳಸುತ್ತಾರೆ? ಅಥವಾ ಇದೊಂದು ರಾಜಕೀಯ ಬೆದರಿಕೆಯ ತಂತ್ರವಷ್ಟೇನಾ? ಎಂಬುದು ಮುಂದಿನ ದಿನಗಳಲ್ಲಿ ತಿಳಿಯಲಿದೆ. ಆದರೆ, ಸದ್ಯಕ್ಕಂತೂ ಬೀದಿಗಿಳಿದಿರುವ ದೀದಿ, ದೆಹಲಿ ನಾಯಕರ ನಿದ್ದೆಗೆಡಿಸಿರುವುದಂತೂ ಸುಳ್ಳಲ್ಲ. ಬಂಗಾಳದ ನೆಲದಲ್ಲಿ ನಡೆಯುತ್ತಿರುವ ಈ ‘ದೀದಿ ವರ್ಸಸ್ ಮೋದಿ-ಶಾ’ ಕದನ ಮುಂಬರುವ ದಿನಗಳಲ್ಲಿ ಇನ್ನಷ್ಟು ರೋಚಕ ತಿರುವುಗಳನ್ನು ಪಡೆದುಕೊಳ್ಳುವ ಲಕ್ಷಣಗಳು ದಟ್ಟವಾಗಿವೆ.
