ಹಸುಗೂಸಿನ ಒಣಗಿದ ಗಂಟಲು
ಎದೆಹಾಲಿಗಾಗಿ ಮೊರೆಯಿಟ್ಟಾಗ;
ಸರಿದಿತ್ತು ನಮ್ಮಯ ಸೆರಗು!
ಬಿದ್ದುಎದ್ದು ಬಂದ ಮಕ್ಕಳು
ಮಡಿಲಲ್ಲಿ ಕಣ್ಣೀರಿಟ್ಟಾಗ;
ಸರಿದಿತ್ತು ನಮ್ಮಯ ಸೆರಗು!
ಹೊಲಗಳಲ್ಲಿ
ಪೈರು ನೆಡುವಾಗ, ಹೊರೆ ಹೊತ್ತಾಗ,
ಕಣಜ ತುಂಬುವಾಗ
ಸರಿದಿತ್ತು ನಮ್ಮಯ ಸೆರಗು!
ಕಸಪೊರಕೆ ಹಿಡಿದು
ರಸ್ತೆ ಬದಿಗಳಲ್ಲಿ, ಹಾದಿಬೀದಿಗಳಲ್ಲಿ
ಕಸ ಗುಡಿಸುವಾಗ, ಕಸವೆತ್ತುವಾಗ
ಸರಿದಿತ್ತು ನಮ್ಮಯ ಸೆರಗು!
ಮನೆಮಂದಿಗೆಲ್ಲಾ ಬುತ್ತಿಯಕಟ್ಟಿ,
ಮನೆಯಹೊರಗೆ ದುಡಿಯುಲು ನಿಂತಾಗ;
ಆಫೀಸಿಗೆ ಸಮಯಕ್ಕೆ ಸರಿಯಾಗಿ
ತಲುಪಲು ಓಡೋಗಿ ಬಸ್ ಹತ್ತುವಾಗ ;
ಸರಿದಿತ್ತು ನಮ್ಮಯ ಸೆರಗು!
ಆಗೆಲ್ಲಾ ನಮಗರಿವಿಲ್ಲದೆ
ಸರಿದಿತ್ತು ನಮ್ಮಯ ಸೆರಗು!
ಅರಿತೊಡನೆ ಕೈಗಳು ಬಾಗುತ್ತಿದ್ದವು
ಸರಿಪಡಿಸಿಕೊಳ್ಳಲು!
ಇಂದು ಅರಿವಿದ್ದೇ ಸರಿಸುತ್ತೇವೆ!
ಸರಿಸುತ್ತೇವೆ ಸೆರುಗುಗಳ !
ಸರಿದ ಸೆರಗುಗಳ ಅಂಚುಗಳ ಹರಿದು
ಮಾಡುತ್ತೇವೆ ನೇಣಿನ ಕುಣಿಕೆಗಳ!
ಸರಿಸಿದ್ದ ಸೆರಗಿನಲ್ಲಿ ಕೂಡಿಟ್ಟ
ನಮ್ಮಯ ಪ್ರೀತಿ- ವಾತ್ಸಲ್ಯ,
ದುಡಿಮೆ- ಘನತೆಯನ್ನ
ಅರಿಯದ ಮೂರ್ಖರ ಸದೆಬಡೆಯುತ್ತೇವೆ!
ನಮ್ಮನ್ನ ಮಾಂಸದ ಮುದ್ದೇ ಎನ್ನುವ
ಕೊಳೆತು ನಾರುವ ನಾಲಿಗೆಗಳ ಸೀಳುತ್ತೇವೆ!
ಹರಿದ ಅಂಚಿನ ಸೆರಗುಗಳನ್ನೇ ಪತಾಕೆಯನ್ನಾಗಿ
ಬಾನೆತ್ತರಕ್ಕೆ ಹಾರಿಬಿಡುತ್ತೇವೆ!
ಅಂಚರಿದ ಸೆರಗುಗಳೆಲ್ಲಾ ಒಂದು ಗಂಟಾಗಿ
ನಮ್ಮ ಘನತೆಯನ್ನು ಗಾಳಿಗೆ ತೂರಿಬಿಡುವ
ತಂತ್ರಗಳ ಮಣ್ಣುಮುಕ್ಕಿಸುತ್ತೇವೆ!
ಕವಿ : ನಿರ್ಮಲಾ ಎಚ್ ಎಲ್
ಫೋಟೋ: ಪಿ ಸಾಯಿನಾಥ್
