'ದ ನ್ಯೂಯಾರ್ಕ್ ಟೈಮ್ಸ್' ಪತ್ರಿಕೆ ಕೊಲ್ಲಿ ಯುದ್ಧದಿಂದ ಇಸ್ರೇಲ್, ಇರಾನ್ ಮತ್ತು ಅಮೆರಿಕಕ್ಕೆ ಆಗುವ ದುಷ್ಪರಿಣಾಮಗಳನ್ನು ಕುರಿತು ವರದಿ ಮಾಡಿದೆ. ಇದು ಈ ಮೂರು ರಾಷ್ಟ್ರಗಳಿಗಲ್ಲದೆ, ಇವರನ್ನು ಅವಲಂಬಿಸಿರುವ ಇತರ ರಾಷ್ಟ್ರಗಳ ಮೇಲೂ ಪರಿಣಾಮ ಬೀರಲಿದೆ...
ಅಮೆರಿಕಕ್ಕೆ 55 ಸಾವಿರ ಕೋಟಿ ಖರ್ಚು
ಅಮೆರಿಕವು ಇರಾನ್ ವಿರುದ್ಧದ ಯುದ್ಧಕ್ಕಾಗಿ ಈಗಾಗಲೇ ಸುಮಾರು 55 ಸಾವಿರ ಕೋಟಿ ರೂಪಾಯಿಗಳಷ್ಟು ಖರ್ಚು ಮಾಡಿದೆ. ಆದರೂ ಈ ಯುದ್ಧದಲ್ಲಿ ‘ವಿಜಯ’ ಎನ್ನುವುದು ಹೇಗಿರುತ್ತದೆ ಎಂಬುದು ಇನ್ನೂ ಅಸ್ಪಷ್ಟವಾಗಿಯೇ ಉಳಿದಿದೆ ಎಂದು ‘ದ ನ್ಯೂಯಾರ್ಕ್ ಟೈಮ್ಸ್‘ ವರದಿ ಮಾಡಿದೆ. ಇದರಲ್ಲಿ ತನ್ನ ಹಾಗೂ ಮಿತ್ರ ರಾಷ್ಟ್ರಗಳಿಗಾದ ಹಾನಿ ಮತ್ತು ನಷ್ಟಗಳನ್ನು ಇನ್ನೂ ಅಂದಾಜಿಸಲಾಗಿಲ್ಲ.
ಪೆಂಟಗನ್ ಪ್ರಕಾರ, ಈ ಒಟ್ಟು ಮೊತ್ತದಲ್ಲಿ ಸುಮಾರು 36,700 ಕೋಟಿ ರೂಪಾಯಿಗಳಷ್ಟು ಮದ್ದುಗುಂಡುಗಳಿಗಾಗಿ, ಪ್ರಮುಖವಾಗಿ ಇರಾನ್ ದಾಳಿಗಳನ್ನು ತಡೆಯುವ ‘ಇಂಟರ್ಸೆಪ್ಟರ್’ (ಮಧ್ಯಪ್ರವೇಶಿಸಿ ಹೊಡೆದುರುಳಿಸುವ) ಕ್ಷಿಪಣಿಗಳಿಗಾಗಿ ಖರ್ಚು ಮಾಡಲಾಗಿದೆ.
ಈ ವೆಚ್ಚವು ಇಷ್ಟೊಂದು ಹೆಚ್ಚಾಗಲು ಕಾರಣವೆಂದರೆ ಅತ್ಯಂತ ದುಬಾರಿ ಕ್ಷಿಪಣಿಗಳ ಬಳಕೆ. ಉದಾಹರಣೆಗೆ, ಒಂದು Patriot PAC-3 ಕ್ಷಿಪಣಿಯ ಬೆಲೆ ಸುಮಾರು 3.7 ಮಿಲಿಯನ್ ಡಾಲರ್ ಆಗಿದ್ದರೆ, THAAD ವ್ಯವಸ್ಥೆಯ ಒಂದು ಇಂಟರ್ಸೆಪ್ಟರ್ ಕ್ಷಿಪಣಿಯ ಬೆಲೆ 13 ಮಿಲಿಯನ್ ಡಾಲರ್ವರೆಗೂ ಇರುತ್ತದೆ.
ಹೆಚ್ಚುವರಿ ವೆಚ್ಚಗಳು ಈ ಪ್ರದೇಶಕ್ಕೆ ಸೇನಾ ಪಡೆಗಳ ವರ್ಗಾವಣೆಗೆ ಸಂಬಂಧಿಸಿವೆ. ಪ್ರಸ್ತುತ, ಮಧ್ಯಪ್ರಾಚ್ಯದಲ್ಲಿ 50 ಸಾವಿರಕ್ಕೂ ಹೆಚ್ಚು ಅಮೆರಿಕನ್ ಸೈನಿಕರು, ಎರಡು ಯುದ್ಧ ವಿಮಾನ ವಾಹಕ ನೌಕೆಗಳು (Aircraft carriers), ಹತ್ತಾರು ಯುದ್ಧ ಹಡಗುಗಳು ಮತ್ತು ಹೆಚ್ಚುವರಿ ಬಾಂಬರ್ ವಿಮಾನಗಳನ್ನು ನಿಯೋಜಿಸಲಾಗಿದೆ.
ಇದನ್ನು ಓದಿದ್ದೀರಾ?: ತೈಲ ಖರೀದಿಯಲ್ಲಿ ವಿಶ್ವಗುರುವಿಗೆ ದೊಣ್ಣೆ ನಾಯಕನ ಅಪ್ಪಣೆ ಯಾಕೆ?
ಪತ್ರಿಕೆಯ ಪ್ರಕಾರ, ಯುದ್ಧದ ಬದಲಾಗುತ್ತಿರುವ ಉದ್ದೇಶಗಳು ಅಮೆರಿಕದ ಸಾರ್ವಜನಿಕರಲ್ಲಿ ಗೊಂದಲ ಮೂಡಿಸಿವೆ, ಮತ್ತು ಸಮೀಕ್ಷೆಗಳು ಈ ಸಂಘರ್ಷದ ಬಗ್ಗೆ ವ್ಯಾಪಕ ಅಸಮಾಧಾನವನ್ನು ತೋರಿಸುತ್ತಿವೆ. ಹೆಚ್ಚುತ್ತಿರುವ ಹಿಂಸಾಚಾರವು ತೈಲ ಬೆಲೆಗಳನ್ನು ಗಗನಕ್ಕೇರಿಸುತ್ತಿದೆ ಮತ್ತು ಆರ್ಥಿಕ ಆಘಾತಗಳನ್ನು ಉಂಟುಮಾಡುತ್ತಿದೆ, ಇದು ಮುಂಬರುವ ಚುನಾವಣೆಗೂ ಮುನ್ನ ಡೊನಾಲ್ಡ್ ಟ್ರಂಪ್ ಅವರಿಗೆ ರಾಜಕೀಯ ಸಂಕಷ್ಟಗಳನ್ನು ತಂದೊಡ್ಡಬಹುದು.
ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ನಲ್ಲಿ ಸುಮಾರು 4,000 ಗುರಿಗಳ ಮೇಲೆ ದಾಳಿ ನಡೆಸಿವೆ ಎಂದು ವರದಿ ಅಂದಾಜಿಸಿದೆ. ಆದರೆ ಇರಾನ್ನ ಮಿಲಿಟರಿ ಸಾಮರ್ಥ್ಯವನ್ನು ನಾಶಪಡಿಸುವಲ್ಲಿ ಅವು ವಿಫಲವಾಗಿವೆ. ಅಮೆರಿಕ ಸರ್ಕಾರದ ಮೂಲಗಳನ್ನು ಉಲ್ಲೇಖಿಸಿರುವ ಪತ್ರಿಕೆ, ಇರಾನ್ ಇನ್ನೂ ತನ್ನ ಅರ್ಧದಷ್ಟು ಕ್ಷಿಪಣಿ ಸಂಗ್ರಹವನ್ನು ಮತ್ತು ಗಣನೀಯ ಪ್ರಮಾಣದ ಡ್ರೋನ್ಗಳನ್ನು ತನ್ನ ಬಳಿಯೇ ಉಳಿಸಿಕೊಂಡಿದೆ ಎಂದು ಹೇಳಿದೆ.
ಈ ಮಧ್ಯೆ, ಇರಾನ್ನ ಐಆರ್ಜಿಸಿ (IRGC) ವಕ್ತಾರ ಅಲಿ ಮೊಹಮ್ಮದ್ ನೈನಿ ಅವರು, ಪ್ರಸ್ತುತ ನಡೆಯುತ್ತಿರುವ ಯುದ್ಧದ ವೇಗದಲ್ಲೇ ಕನಿಷ್ಠ ಆರು ತಿಂಗಳ ಕಾಲ ಹೋರಾಟವನ್ನು ಮುಂದುವರಿಸುವ ಸಾಮರ್ಥ್ಯ ಇರಾನ್ಗೆ ಇದೆ ಎಂದು ತಿಳಿಸಿದ್ದಾರೆ. ಐಆರ್ಜಿಸಿ ಸಂಯೋಜಿತ ಫಾರ್ಸ್(Fars) ಸುದ್ದಿಸಂಸ್ಥೆಯು ಮೂಲಗಳನ್ನು ಉಲ್ಲೇಖಿಸಿ ವರದಿ ಮಾಡಿದ್ದು, ಇಂದಿನಿಂದ ಕ್ಷಿಪಣಿ ದಾಳಿಗಳನ್ನು ತೀವ್ರಗೊಳಿಸಲಾಗುವುದು ಮತ್ತು ಭಾರಿ ಹಾಗೂ ಆಯಕಟ್ಟಿನ ಕ್ಷಿಪಣಿಗಳ ಬಳಕೆಯಲ್ಲಿ ಶೇ. 100ರಷ್ಟು ಹೆಚ್ಚಳ ಮಾಡಲಾಗುವುದು ಎಂದು ತಿಳಿಸಿದೆ.
ಡೇಟಾಕ್ಕಾಗಿ ಯುದ್ಧದ ನೇರಪ್ರಸಾರ
ಇರಾನ್ ಮೇಲಿನ ಅಮೆರಿಕದ ದಾಳಿಗಳು ಚೀನಾಕ್ಕೆ ಒಂದು ನೈಜ ಮಿಲಿಟರಿ ಗುಪ್ತಚರ ಪ್ರಯೋಗಾಲಯವಾಗಿ ಮಾರ್ಪಟ್ಟಿವೆ. Jilin-1 ಸರಣಿಯ 300ಕ್ಕೂ ಹೆಚ್ಚು ಉಪಗ್ರಹಗಳು ಪ್ರತಿಯೊಂದು ವಿವರವನ್ನು ಕ್ಷಣಕ್ಷಣಕ್ಕೂ ದಾಖಲಿಸುತ್ತಿವೆ; ಮದ್ದುಗುಂಡುಗಳ ಮರುಪೂರಣದಿಂದ (refueling) ಹಿಡಿದು ಕ್ಷಿಪಣಿಗಳ ಪಥದವರೆಗೆ ಎಲ್ಲವನ್ನೂ ಇವು ಸೆರೆಹಿಡಿಯುತ್ತಿವೆ.
ಚೀನಾದ ಈ ಉಪಗ್ರಹ ಸರಣಿಯು ವಿಶ್ವದ ಅತಿದೊಡ್ಡ ವಾಣಿಜ್ಯ ರಿಮೋಟ್ ಸೆನ್ಸಿಂಗ್ ವ್ಯವಸ್ಥೆಗಳಲ್ಲಿ ಒಂದಾಗಿದೆ. ಇವು ಕೇವಲ ಫೋಟೋ ತೆಗೆಯುವುದು ಮಾತ್ರವಲ್ಲದೆ, ಹೈ-ಡೆಫಿನಿಷನ್ (HD) ವೀಡಿಯೊಗಳನ್ನು ಸೆರೆಹಿಡಿಯಬಲ್ಲವು. ಅಂದರೆ, ಅಮೆರಿಕದ ವಿಮಾನಗಳು ಎಲ್ಲಿಂದ ಹಾರುತ್ತಿವೆ ಮತ್ತು ಅವುಗಳಿಗೆ ಇಂಧನ ತುಂಬಲು ಎಷ್ಟು ಸಮಯ ಹಿಡಿಯುತ್ತಿದೆ ಎಂಬುದನ್ನು ಸೆಕೆಂಡುಗಳ ಲೆಕ್ಕದಲ್ಲಿ ಚೀನಾ ಗಮನಿಸುತ್ತಿದೆ.
ಪರಿಣಿತರು ಹೇಳುವಂತೆ, ಈ ಮಾಹಿತಿಯು ಚೀನಾಕ್ಕೆ ತನ್ನದೇ ಆದ ಕ್ಷಿಪಣಿ ನಿರೋಧಕ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲು ಅಥವಾ ಅಮೆರಿಕದ ತಂತ್ರಗಳನ್ನು ಹತ್ತಿಕ್ಕಲು ಸಹಾಯ ಮಾಡುತ್ತದೆ. ಇದು ಮುಂದಿನ ದಶಕಗಳಲ್ಲಿ ಸಂಭವಿಸಬಹುದಾದ ಯಾವುದೇ ಸಂಘರ್ಷದಲ್ಲಿ ಚೀನಾಕ್ಕೆ ಒಂದು ಹೆಜ್ಜೆ ಮುನ್ನಡೆ ನೀಡುತ್ತದೆ.
ಇದನ್ನು ಓದಿದ್ದೀರಾ?: ಅಮೆರಿಕ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗೆ ಭಾರಿ ಹೊಡೆತ; ಜೋರ್ಡಾನ್ನಲ್ಲಿ $30 ಕೋಟಿ ಮೌಲ್ಯದ THAAD ವ್ಯವಸ್ಥೆ ಧ್ವಂಸಗೈದ ಇರಾನ್
ಅಮೆರಿಕದ ಯುದ್ಧ ತಂತ್ರಗಳನ್ನು ಚೀನಾ ಒಂದು ದತ್ತಾಂಶವಾಗಿ (Database) ಪರಿವರ್ತಿಸುತ್ತಿದೆ. ಇದರಲ್ಲಿ ವಿಮಾನಗಳ ಇಂಧನ ತುಂಬಿಸುವ ಸಮಯ ಮತ್ತು ವಾಯು ರಕ್ಷಣಾ ವ್ಯವಸ್ಥೆಯ ಪ್ರತಿಕ್ರಿಯೆಗಳೂ ಸೇರಿವೆ. ತಜ್ಞರ ಪ್ರಕಾರ, ಈ ದತ್ತಾಂಶವು ಚೀನಾಕ್ಕೆ ಮಿಲಿಟರಿ ಸಂಶೋಧನೆ ಮತ್ತು ಅಭಿವೃದ್ಧಿಯಲ್ಲಿ ದಶಕಗಳ ಕಾಲ ಉಳಿಯುವಂತಹ ದೊಡ್ಡ ಲಾಭವನ್ನು ನೀಡಬಹುದು. ಅಮೆರಿಕದ ಯುದ್ಧ ತಂತ್ರಗಳನ್ನು ಈಗ ಸಂಪೂರ್ಣವಾಗಿ ವಿಶ್ಲೇಷಿಸಲಾಗುತ್ತಿದೆ.
ತೈಲಮೂಲಗಳ ಮೇಲೆ ದಾಳಿ, ಸಂಕಷ್ಟಕ್ಕೆ ದಾರಿ
ಇರಾನ್ ಸುತ್ತಲಿನ ಮಿಲಿಟರಿ ಸಂಘರ್ಷ ತೀವ್ರಗೊಳ್ಳುತ್ತಿರುವ ಬೆನ್ನಲ್ಲೇ, ಇಸ್ರೇಲ್ಗೆ ತೈಲದ ಪ್ರಮುಖ ಮೂಲವಾಗಿರುವ ಬಾಕು-ಟಿಬಿಲಿಸಿ-ಸೆಯಾನ್ (BTC) ತೈಲ ಪೈಪ್ಲೈನ್ ಮೇಲೆ ಟೆಹ್ರಾನ್ ದಾಳಿ ಮಾಡುವ ಸಾಧ್ಯತೆಯಿದೆ ಎಂಬ ಚರ್ಚೆಗಳು ಹೆಚ್ಚುತ್ತಿವೆ.
ಸೆಯಾನ್ನಿಂದ ಅಜರ್ಬೈಜಾನಿ ತೈಲವು ಟ್ಯಾಂಕರ್ಗಳ ಮೂಲಕ ಇಸ್ರೇಲ್ಗೆ ತಲುಪುತ್ತದೆ. ಇಸ್ರೇಲ್ನ ಒಟ್ಟು ತೈಲ ಆಮದಿನಲ್ಲಿ BTC ಪೈಪ್ಲೈನ್ ಕನಿಷ್ಠ ಶೇ. 30 ರಷ್ಟು ಪಾಲನ್ನು ಹೊಂದಿದೆ ಮತ್ತು ಈ ವರ್ಷದ ಆರಂಭದಲ್ಲಿ ಇದು ಶೇ. 46 ರಷ್ಟಕ್ಕೆ ತಲುಪಿತ್ತು. ಪೈಪ್ಲೈನ್ ಮೇಲೆ ಇರಾನ್ ದಾಳಿ ನಡೆಸಬಹುದು ಎಂಬ ಆತಂಕವನ್ನು ಪ್ರಾದೇಶಿಕ ಮಾಧ್ಯಮಗಳು ವರದಿ ಮಾಡಿವೆ. ವಿಶೇಷವಾಗಿ, ಅಜರ್ಬೈಜಾನ್ನಲ್ಲಿ ಇಸ್ರೇಲ್ ಮತ್ತು ಅಮೆರಿಕದ ಪ್ರತಿನಿಧಿಗಳು ನಡೆಸುತ್ತಿರುವ ಇರಾನ್ ವಿರೋಧಿ ಚಟುವಟಿಕೆಗಳ ಬಗ್ಗೆ ಟೆಹ್ರಾನ್ ತೀವ್ರ ಅನುಮಾನ ಹೊಂದಿದೆ.
BTC ಪೂರೈಕೆಯಲ್ಲಿ ಅಡಚಣೆಯಾದರೆ ಅದು ಇಸ್ರೇಲ್ನ ಇಂಧನ ಭದ್ರತೆ ಮತ್ತು ಮಿಲಿಟರಿ ಪೂರೈಕೆಯನ್ನು ಕುಂಠಿತಗೊಳಿಸಬಹುದು. ಅಂತಹ ಸಂದರ್ಭದಲ್ಲಿ ಅವರು ಮೀಸಲು ದಾಸ್ತಾನನ್ನು ಅವಲಂಬಿಸಬೇಕಾಗುತ್ತದೆ. ಆದರೆ ತೈಲದ ಕೊರತೆಯ ಅಪಾಯವಿರುವುದರಿಂದ, ಅಮೆರಿಕದಿಂದ ತುರ್ತು ಪೂರೈಕೆಯ ಅಗತ್ಯವಿರುತ್ತದೆ- ಇದು ಅತ್ಯಂತ ದುಬಾರಿ ಮತ್ತು ಸಾಗಣೆಗೆ ಹೆಚ್ಚಿನ ಸಮಯ ತೆಗೆದುಕೊಳ್ಳುತ್ತದೆ.
ಇದನ್ನು ಓದಿದ್ದೀರಾ?: ಪಾಕಿಸ್ತಾನ ವಿಶ್ವದ ಏಕೈಕ ಮುಸ್ಲಿಂ ಪರಮಾಣು ರಾಷ್ಟ್ರವಾಗಿದ್ದು ಹೇಗೆ?
ಆದರೆ, ಪೈಪ್ಲೈನ್ ಸ್ಥಗಿತಗೊಂಡರೆ ಅದರಿಂದ ಇಸ್ರೇಲ್ಗಿಂತಲೂ ಅಜರ್ಬೈಜಾನ್ ಆರ್ಥಿಕತೆಗೆ ಹೆಚ್ಚಿನ ಹಾನಿಯಾಗಲಿದೆ. ಈ ಮಾರ್ಗದ ಮೂಲಕ ನಡೆಯುವ ತೈಲ ರಫ್ತು ಅಜರ್ಬೈಜಾನ್ನ ಒಟ್ಟು ರಫ್ತಿನ ಶೇ. 80ರಷ್ಟಿದೆ ಮತ್ತು ಇದರ ವೈಫಲ್ಯವು ಅಲ್ಲಿನ ಸರ್ಕಾರಿ ಬಜೆಟ್ಗೆ ಭಾರಿ ಹೊಡೆತ ನೀಡಲಿದೆ. BTCಯ ಪ್ರಮುಖ ಸಾಗಣೆದಾರನಾಗಿರುವ ಟರ್ಕಿ ಮತ್ತು ಐರೋಪ್ಯ ಒಕ್ಕೂಟದ ಗ್ರಾಹಕರೂ ಸಹ ಇದರಿಂದ ನಷ್ಟ ಅನುಭವಿಸಲಿದ್ದಾರೆ. ಈ ಪೈಪ್ಲೈನ್ನ ಹತ್ತಿರದಲ್ಲೇ ಇರುವ ಸದರ್ನ್ ಗ್ಯಾಸ್ ಕಾರಿಡಾರ್ನ ಮೂಲಸೌಕರ್ಯಗಳಿಗೂ ಹಾನಿಯಾಗುವ ಸಾಧ್ಯತೆಯಿದೆ.
ನಖ್ಚಿವನ್ (Nakhchivan) ವಿಮಾನ ನಿಲ್ದಾಣದ ಮೇಲೆ ನಡೆದ ಡ್ರೋನ್ ದಾಳಿಯು ಈಗಾಗಲೇ ದಕ್ಷಿಣ ಕಾಕಸಸ್ನಲ್ಲಿ ಸಂಘರ್ಷ ಉಲ್ಬಣಗೊಳ್ಳುವ ಭೀತಿಯನ್ನು ಸೃಷ್ಟಿಸಿದೆ. ಇರಾನ್ ಮತ್ತು ಅಜರ್ಬೈಜಾನ್ ಅಧಿಕಾರಿಗಳ ನಡುವೆ ನೇರ ಸಂಘರ್ಷದ ವಾತಾವರಣ ನಿರ್ಮಾಣವಾಗುತ್ತಿದ್ದು, ಇದು ಉಭಯ ದೇಶಗಳ ಆರ್ಥಿಕತೆಗೆ ಪ್ರಮುಖವಾಗಿರುವ ಪೈಪ್ಲೈನ್ ಮೇಲೆ ದಾಳಿ ನಡೆಸಲು ಪ್ರೇರೇಪಿಸಬಹುದು.
ಒಂದು ವೇಳೆ ಈ ದಾಳಿ ಸಂಭವಿಸಿದರೆ, ರಷ್ಯಾ ಮತ್ತು ಇರಾನ್ ಅನ್ನು ಹೊರತುಪಡಿಸಿ EU- ದಕ್ಷಿಣ ಕಾಕಸಸ್- ಮಧ್ಯ ಏಷ್ಯಾ- ಚೀನಾ ನಡುವೆ ರೂಪಿಸಲಾದ ಹೊಸ ಭೌಗೋಳಿಕ ರಾಜಕೀಯ ಯೋಜನೆಗಳ ದುರ್ಬಲತೆಯನ್ನು ಇದು ಜಗತ್ತಿಗೆ ತೋರಿಸಿಕೊಡಲಿದೆ.
ಇರಾನ್ನಲ್ಲಿ ಕುಡಿಯುವ ನೀರಿಗೆ ಭೀಕರ ಅಭಾವ
ಕಳೆದ ರಾತ್ರಿ ಇಸ್ರೇಲ್ ಮತ್ತು ಅಮೆರಿಕ ಇರಾನ್ನಲ್ಲಿರುವ ಸಮುದ್ರದ ನೀರನ್ನು ಶುದ್ಧೀಕರಿಸುವ (Desalination) ಘಟಕಗಳನ್ನು ನಾಶಪಡಿಸಲು ಮೊದಲು ಚಾಲನೆ ನೀಡಿದೆ. ಯುದ್ಧಕ್ಕೂ ಮುನ್ನವೇ ಇರಾನ್ನ ಜನತೆ ಭೀಕರ ನೀರಿನ ಅಭಾವವನ್ನು ಎದುರಿಸುತ್ತಿದ್ದರು.
ಇಸ್ರೇಲ್ ಮತ್ತು ಅಮೆರಿಕ ಒಕ್ಕೂಟವು ನೀರಿನ ಮೂಲಗಳನ್ನು ಗುರಿಯಾಗಿಸಲು ಪ್ರಾರಂಭಿಸಿದ್ದು, ಒಂದು ದಿನದ ಹಿಂದೆಯಷ್ಟೇ ಇರಾನ್ನ ‘ಖೆಶ್ಮ್’ (Qeshm) ದ್ವೀಪದಲ್ಲಿರುವ ನೀರು ಶುದ್ಧೀಕರಣ ಘಟಕದ ಮೇಲೆ ದಾಳಿ ನಡೆಸಿತು. ಇದಕ್ಕೆ ಪ್ರತೀಕಾರವಾಗಿ, ಇರಾನ್ ಬಹ್ರೇನ್ನಲ್ಲಿರುವ ನೀರು ಶುದ್ಧೀಕರಣ ಘಟಕದ ಮೇಲೆ ಡ್ರೋನ್ ದಾಳಿ ನಡೆಸಿದೆ ಎಂದು ವರದಿಯಾಗಿದೆ.
ಸ್ಥಳೀಯ ಮಾಧ್ಯಮಗಳ ಪ್ರಕಾರ, ಇದು ದ್ವೀಪದ ನಿವಾಸಿಗಳ ವಿರುದ್ಧ ಹೂಡಲಾದ ಸಂಪೂರ್ಣ ಕುಡಿಯುವ ನೀರಿನ ದಿಗ್ಬಂಧನವಾಗಿದೆ. ‘ಖೆಶ್ಮ್’ (Qeshm) ದ್ವೀಪದಲ್ಲಿ ಸುಮಾರು ಒಂದು ಲಕ್ಷ ಜನರು ವಾಸಿಸುತ್ತಿದ್ದಾರೆ. ದ್ವೀಪದಲ್ಲಿ ಸಿಹಿನೀರಿನ ಬಾವಿಗಳಿವೆ, ಆದರೆ ಅವುಗಳ ಸಂಖ್ಯೆ ಅತ್ಯಲ್ಪ (ಅವುಗಳಲ್ಲಿ ಒಂದು ಬಾವಿಯನ್ನು ಫೋಟೋದಲ್ಲಿ ನೋಡಬಹುದು). ಇಲ್ಲಿನ ನಗರಗಳು ಮತ್ತು ಹಳ್ಳಿಗಳು ಸಂಪೂರ್ಣವಾಗಿ ಶುದ್ಧೀಕರಿಸಿದ (Desalinated) ನೀರನ್ನೇ ಅವಲಂಬಿಸಿವೆ. ಮುಖ್ಯ ಭೂಭಾಗದಿಂದ ಈ ದ್ವೀಪಕ್ಕೆ ಯಾವುದೇ ಸೇತುವೆ ಸಂಪರ್ಕವಿಲ್ಲ.
ಈ ಲೇಖನ ಓದಿದ್ದೀರಾ?: ಅಮೆರಿಕದ ಇಬ್ಬಗೆ ಅಣ್ವಸ್ತ್ರ ರಾಜಕಾರಣ: ಇರಾನ್ ಬಗ್ಗೆ ಆತಂಕ, ಪಾಕಿಸ್ತಾನದ ಕುರಿತು ಮೌನ!
ನೀರಿನ ಪೂರೈಕೆ ಮಾಡುವ ಫೆರಿ ಬೋಟ್ಗಳು (ದೋಣಿಗಳು) ಸಹ ಈಗ ಅಲ್ಲಿಗೆ ಹೋಗುತ್ತಿಲ್ಲ. ಇಂತಹ ಪರಿಸ್ಥಿತಿಯಲ್ಲಿ ಜನರು ನೀರನ್ನು ಎಲ್ಲಿಂದ ಪಡೆಯಬೇಕು? ಈ ಶುದ್ಧೀಕರಣ ಕೇಂದ್ರವು ಯಾವುದೇ ಮಿಲಿಟರಿ ಸೌಲಭ್ಯವಲ್ಲ, ಬದಲಿಗೆ ಇದು ಸಂಪೂರ್ಣವಾಗಿ ನಾಗರಿಕ ಬಳಕೆಗಾಗಿ ಇರುವ ಕೇಂದ್ರವಾಗಿತ್ತು ಎಂದು ವರದಿಯಾಗಿದೆ. ಆದರೆ, ಈ ದಾಳಿ ಮಾಡಿ ಯುನಿಟೆಡ್ ಅರಬ್ ಎಮಿರೆಟ್ಸ್ ಮಾಡಿದೆ ಎಂದು ಇಸ್ರೇಲ್ನ ಜುರೆಸ್ಲಂ ಪೋಸ್ಟ್ ವರದಿ ಮಾಡಿದೆ. ಅದನ್ನು ಯುನೈಟೆಡ್ ಅರಬ್ ಎಮಿರೆಟ್ಸ್ ನಿರಾಕರಿಸಿದೆ.
ಒಂದು ಹೋಲಿಕೆ: ಕುಡಿಯುವ ನೀರಿಗಾಗಿ ಕೊಲ್ಲಿ ರಾಷ್ಟ್ರಗಳು ಸಂಪೂರ್ಣವಾಗಿ ಈ ಘಟಕಗಳನ್ನೇ ಅವಲಂಬಿಸಿವೆ.
• ಕತಾರ್: 100%
• ಕುವೈತ್ ಮತ್ತು ಬಹ್ರೇನ್: 90%
• ಒಮನ್: 86%
• ಸೌದಿ ಅರೇಬಿಯಾ: 70%
ದಕ್ಷಿಣದ ಪ್ರಾಂತ್ಯಗಳನ್ನು ಹೊರತುಪಡಿಸಿದರೆ ಇರಾನ್ ಉತ್ತಮ ಸ್ಥಿತಿಯಲ್ಲಿದೆ. ಆದರೂ, ಇರಾನ್ನ ಶೇ. 2ರಷ್ಟು ನೀರು ಈ ಶುದ್ಧೀಕರಣ ಘಟಕಗಳ ಮೂಲಕವೇ ಪೂರೈಕೆಯಾಗುತ್ತದೆ. ಅಂತಾರಾಷ್ಟ್ರೀಯ ಕಾನೂನಿನ ಪ್ರಕಾರ, ಕುಡಿಯುವ ನೀರಿನ ಪೂರೈಕೆಯ ಮೂಲಗಳ ಮೇಲೆ ದಾಳಿ ಮಾಡುವುದು ಯುದ್ಧಾಪರಾಧ (War Crime) ಎಂದು ಪರಿಗಣಿಸಲಾಗುತ್ತದೆ.
ಅಂತಾರಾಷ್ಟ್ರೀಯ ಕಾನೂನಿನ ಪತನ
ಮಾನವ ಇತಿಹಾಸದಲ್ಲಿ ಇದಕ್ಕಿಂತ ಕೆಟ್ಟ ಪರಿಸ್ಥಿತಿಗಳು ಎದುರಾಗಿವೆ. ನಾವು ಆಗ ಬದುಕಿರಲಿಲ್ಲ, ಹಾಗಾಗಿ ಈಗಲೇ ಜಗತ್ತಿನ ಅಂತ್ಯವಾಗುತ್ತಿದೆ ಎಂದು ನಮಗೆ ಅನ್ನಿಸುತ್ತಿದೆ. ಆದರೆ ವಾಸ್ತವವೆಂದರೆ, ಈ ಪ್ರದೇಶದಲ್ಲಿ (ಮಧ್ಯಪ್ರಾಚ್ಯ) ಗಣನೀಯ ಪ್ರಮಾಣದ ಅಸ್ಥಿರತೆ ಉಂಟಾಗಿದೆ. ಅಪಾರ ಸಂಖ್ಯೆಯ ಪ್ರಾದೇಶಿಕ ಸಂಘರ್ಷಗಳು ಮತ್ತು ಬಗೆಹರಿಯದ ಸಮಸ್ಯೆಗಳಿಂದಾಗಿ ಒಟ್ಟಾರೆ ದುಷ್ಪರಿಣಾಮಗಳು ಎದುರಾಗುತ್ತಿವೆ. ಇದು ಆರ್ಥಿಕ ಮತ್ತು ರಾಜಕೀಯ ಪರಿಣಾಮಗಳನ್ನು ಬೀರುತ್ತಿದೆ. ದುರದೃಷ್ಟವಶಾತ್, ನಾವು ‘ಅಂತಾರಾಷ್ಟ್ರೀಯ ಕಾನೂನು’ ಎಂದು ಯಾವುದನ್ನು ಕರೆಯುತ್ತೇವೆಯೋ, ಅದನ್ನು ನಾವೆಲ್ಲರೂ ಕಳೆದುಕೊಂಡಿದ್ದೇವೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಇನ್ನು ಮುಂದೆ ಅಂತಾರಾಷ್ಟ್ರೀಯ ಕಾನೂನಿನ ನಿಯಮಗಳು ಮತ್ತು ತತ್ವಗಳನ್ನು ಪಾಲಿಸುವಂತೆ ಯಾರಿಗಾದರೂ ಹೇಗೆ ಒತ್ತಾಯಿಸಬೇಕು ಎಂಬುದು ನನಗೇ ಅರ್ಥವಾಗುತ್ತಿಲ್ಲ. ಪ್ರಾಯೋಗಿಕವಾಗಿ ಅದು ಈಗ ಅಸ್ತಿತ್ವದಲ್ಲಿಲ್ಲ. ಕಾನೂನಿನ ರೀತ್ಯಾ (De jure) ಅದು ಇನ್ನೂ ಇರಬಹುದು, ಆದರೆ ವಾಸ್ತವದಲ್ಲಿ (De facto) ಅದು ಇಲ್ಲವೇ ಇಲ್ಲ. ಅಂತಾರಾಷ್ಟ್ರೀಯ ಕಾನೂನಿನ ಜಾಗವನ್ನು ಈಗ ಯಾವ ಕಾನೂನು ಆಕ್ರಮಿಸಿಕೊಂಡಿದೆ ಎಂಬುದನ್ನು ಸದ್ಯಕ್ಕೆ ಯಾರಾದರೂ ಸ್ಪಷ್ಟವಾಗಿ ವಿವರಿಸಬಲ್ಲರು ಎಂಬ ಬಗ್ಗೆ ನನಗೆ ಅನುಮಾನವಿದೆ ಎಂದಿದ್ದಾರೆ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ವಕ್ತಾರ ಡಿಮಿಟ್ರಿ ಪೆಸ್ಕೋವ್.
ಮೊದಲನೆಯದಾಗಿ, ಈಗ ಯಾರನ್ನಾದರೂ ಯಾಕೆ ಕಾನೂನಿನ ಹೆಸರಿನಲ್ಲಿ ಪ್ರಶ್ನಿಸಬೇಕು? ಎರಡನೆಯದಾಗಿ, ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಪಾಶ್ಚಿಮಾತ್ಯ ರಾಷ್ಟ್ರಗಳು ಅಂತಾರಾಷ್ಟ್ರೀಯ ಕಾನೂನನ್ನು ಯಾವಾಗಲೂ ತಮಗೆ ಬೇಕಾದಂತೆ ಅಥವಾ ತಮಗೆ ಅನುಕೂಲವಾಗುವಂತೆ ವ್ಯಾಖ್ಯಾನಿಸುತ್ತಾ ಬಂದಿವೆ. ಈ ಅಂತಾರಾಷ್ಟ್ರೀಯ ಕಾನೂನಿನ ಪ್ರತಿಯೊಂದು ಅಕ್ಷರವನ್ನೂ ಕಟ್ಟುನಿಟ್ಟಾಗಿ ಪಾಲಿಸುವ ಮೂಲಕ ಯಾರನ್ನೋ ಮೆಚ್ಚಿಸಬಹುದು ಎಂದು ರಷ್ಯಾ ಮಾತ್ರ ಇನ್ನೂ ನಂಬುತ್ತಿದೆ. ಬಹುಶಃ, ನಾವಿರುವುದು ಮಕ್ಕಳ ಆಟದ ಮೈದಾನದಲ್ಲಲ್ಲ ಎಂಬುದು ರಷ್ಯಾಕ್ಕೆ ಈಗಲಾದರೂ ಅರ್ಥವಾಗುತ್ತದೆಯೇ? ಈಗಲಾದರೂ ಅವರು ಪ್ರೌಢಿಮೆಯಿಂದ ವರ್ತಿಸುವ ಸಮಯ ಬಂದಿದೆಯಲ್ಲವೇ? ರಷ್ಯಾದ ಈ ಮುಗ್ಧತೆಯನ್ನು ಕಂಡು ಎಲ್ಲರಿಗೂ ಸಾಕಾಗಿ ಹೋಗಿದೆ ಎಂದಿದ್ದಾರೆ.
