ಐಪಿಎಲ್ 16ನೇ ಆವೃತ್ತಿಯ ‘ದಕ್ಷಿಣ ಡರ್ಬಿ’ಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಗೆಲುವಿನ ನಗೆ ಬೀರಿದೆ.
ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ಧೋನಿ ಸಾರಥ್ಯದ ಸಿಎಸ್ಕೆ 8 ರನ್ಗಳ ಸ್ಮರಣೀಯ ಜಯ ಸಾಧಿಸಿದೆ.
ಒಂದು ಹಂತದಲ್ಲಿ ಆರ್ಸಿಬಿ ನಿರಾಯಾಸವಾಗಿ ಪಂದ್ಯ ಗೆಲ್ಲುವ ಭರವಸೆ ಮೂಡಿಸಿತ್ತು.
ಚೆನೈ ಮುಂದಿಟ್ಟಿದ್ದ 227 ರನ್ಗಳ ಗುರಿ ಬೆನ್ನಟ್ಟುವ ವೇಳೆ 12 ಓವರ್ಗಳ ಮುಕ್ತಾಯಕ್ಕೆ ಆರ್ಸಿಬಿ, ಕೇವಲ 2 ವಿಕೆಟ್ ನಷ್ಟದಲ್ಲಿ 141 ರನ್ ಗಳಿಸಿತ್ತು.
ಉಳಿದ 8 ಓವರ್ಗಳಲ್ಲಿ ಗೆಲುವಿಗೆ 86 ರನ್ಗಳ ಅಗತ್ಯವಿತ್ತು. ನಾಯಕ ಫಾಫ್ ಡುಪ್ಲೆಸಿಸ್ ಮತ್ತು ಗ್ಲೆನ್ ಮ್ಯಾಕ್ಸ್ ವೆಲ್ ಸ್ಫೋಟಕ ಅರ್ಧಶತಕ ಸಿಡಿಸಿ ಕ್ರೀಸ್ ನಲ್ಲಿದ್ದರು.
ಹೀಗಾಗಿ ಆತಿಥೇಯ ಆರ್ಸಿಬಿ ಸುಲಭ ಗೆಲುವು ಸಾಧಿಸಲಿದೆ ಎಂದು ಅಭಿಮಾನಿಗಳು ನಿರೀಕ್ಷೆಯಲ್ಲಿದ್ದರು.
ಆದರೆ 13ನೇ ಓವರ್ನಲ್ಲಿ ಮ್ಯಾಕ್ಸಿ ಮತ್ತು 14ನೇ ಓವರ್ನಲ್ಲಿ ಡುಪ್ಲೆಸಿಸ್ ವಿಕೆಟ್ ಪತನವಾಗುತ್ತಲೇ ಪಂದ್ಯ ರೋಚಕ ತಿರುವು ಪಡೆಯಿತು.
ಆ ಬಳಿಕ ಆರ್ಸಿಬಿ ನಿರಂತರವಾಗಿ ವಿಕೆಟ್ ಕಳೆದುಕೊಳ್ಳುತ್ತಲೇ ಸಾಗಿತು. ಅಂತಿಮ ಓವರ್ನಲ್ಲಿ ಗೆಲುವಿಗೆ 19 ರನ್ಗಳ ಅಗತ್ಯವಿತ್ತು. ಆದರೆ 10 ರನ್ಗಳಿಸಲಷ್ಟೇ ಆರ್ಸಿಬಿ ಶಕ್ತವಾಯಿತು. 8 ರನ್ಗಳಿಂದ ಗೆಲುವಿನಿಂದ ದೂರವೇ ಉಳಿಯಿತು.
ಆರ್ಸಿಬಿ ಬ್ಯಾಟರ್ ಗಳಿಂದ ದಂಡಿಸಿಕೊಂಡರೂ ಸಹ ನಿರ್ಣಾಯಕ ಹಂತದಲ್ಲಿ ವಿಕೆಟ್ ಪಡೆಯುವ ಮೂಲಕ ಚೆನ್ನೈ ಬೌಲರ್ಗಳು ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು.
ಈ ಗೆಲುವಿನೊಂದಿಗೆ ಅಂಕ ಪಟ್ಟಿಯಲ್ಲಿ ಚೆನ್ನೈ ಮೂರನೇ ಸ್ಥಾನಕ್ಕೇರಿದರೆ, ಆರ್ಸಿಬಿ 7ನೇ ಸ್ಥಾನಕ್ಕೆ ಜಾರಿದೆ.
