ಮೈ ಸುಡುವ 103 ಡಿಗ್ರಿ ಜ್ವರ.. ವಿಪರೀತ ಸುಸ್ತು.. ಆದರೂ ಮೈದಾನಕ್ಕಿಳಿದು ಅಬ್ಬರಿಸಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ನಾಯಕಿ ಸ್ಮೃತಿ ಮಂದಾನ, ತಂಡಕ್ಕೆ ಎರಡನೇ ಬಾರಿಗೆ ಚಾಂಪಿಯನ್ ಪಟ್ಟ ತಂದುಕೊಡುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದಾರೆ. ಅವರ ಈ ಅಪ್ರತಿಮ ಆಟದ ಹಿಂದಿನ ರೋಚಕ ಸಂಗತಿಯನ್ನು ಕೋಚ್ ಮಲೋಲನ್ ರಂಗರಾಜನ್ ಬಹಿರಂಗಪಡಿಸಿದ್ದಾರೆ.
ಬುಧವಾರ ವಡೋದರಾದಲ್ಲಿ ನಡೆದ 2026ರ ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯುಪಿಎಲ್) ಫೈನಲ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಆರ್ಸಿಬಿ ಭರ್ಜರಿ ಜಯ ಸಾಧಿಸಿದ ಬಳಿಕ ಡ್ರೆಸ್ಸಿಂಗ್ ರೂಮ್ನಲ್ಲಿ ಮಾತನಾಡಿದ ಅವರು ಈ ವಿಚಾರವನ್ನು ಹಂಚಿಕೊಂಡರು.
“ಫೈನಲ್ ಪಂದ್ಯದ ಹಿಂದಿನ ದಿನ (ಬುಧವಾರ ಸಂಜೆ) ಸ್ಮೃತಿ 103 ಡಿಗ್ರಿ ಜ್ವರದಿಂದ ಬಳಲುತ್ತಿದ್ದರು. ವಿಪರೀತ ಫ್ಲೂ (ಶೀತಜ್ವರ) ಅವರನ್ನು ಬಾಧಿಸುತ್ತಿತ್ತು. ಇಷ್ಟೊಂದು ಅಸ್ವಸ್ಥರಾಗಿದ್ದರೂ ಅವರು ಇದನ್ನು ಎಲ್ಲಿಯೂ ತೋರಿಸಿಕೊಳ್ಳಲಿಲ್ಲ. ತಂಡದ ಇತರೆ ಆಟಗಾರ್ತಿಯರಿಗೂ ಈ ವಿಚಾರ ತಿಳಿದಿರಲಿಲ್ಲ.
ಮಧ್ಯಾಹ್ನ ನಾನು ಅವರ ಬಳಿ ಮಾತನಾಡಿದಾಗ, ‘ನನಗೆ ಯಾವುದೇ ಸಮಸ್ಯೆ ಇಲ್ಲ, ನಾನು ಆಡಲೇಬೇಕು, ಇಲ್ಲೇ ಇರುತ್ತೇನೆ’ ಎಂದು ಸ್ಮೃತಿ ಆತ್ಮವಿಶ್ವಾಸದಿಂದ ಹೇಳಿದರು. ಇದು ಅವರ ಆಟದ ಬದ್ಧತೆಯನ್ನು ತೋರಿಸುತ್ತದೆ,” ಎಂದು ರಂಗರಾಜನ್ ಭಾವುಕರಾಗಿ ನುಡಿದರು. ಕೋಚ್ ಈ ವಿಚಾರವನ್ನು ತಿಳಿಸಿದಾಗ, ತಂಡದ ಆಟಗಾರ್ತಿಯರು ಕ್ಷಣಕಾಲ ಆಘಾತಕ್ಕೊಳಗಾದರೂ, ನಂತರ ಚಪ್ಪಾಳೆ ತಟ್ಟಿ ತಮ್ಮ ನಾಯಕಿಯ ಬದ್ಧತೆಗೆ ತಲೆಬಾಗಿದರು.
ಇದನ್ನು ಓದಿದ್ದೀರಾ? WPL 2026: ಸ್ಮೃತಿ ಮಂಧನಾ ನೇತೃತ್ವದ ಆರ್ಸಿಬಿ ಮತ್ತೆ ಚಾಂಪಿಯನ್; ಬಹುಮಾನದ ಮೊತ್ತವೆಷ್ಟು?
ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್, ನಿಗದಿತ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 203 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ಈ ಕಠಿಣ ಗುರಿಯನ್ನು ಬೆನ್ನಟ್ಟಿದ ಆರ್ಸಿಬಿ, ಕೇವಲ 9 ರನ್ ಗಳಿಸುವಷ್ಟರಲ್ಲಿ ಆರಂಭಿಕ ಆಟಗಾರ್ತಿ ಗ್ರೇಸ್ ಹ್ಯಾರಿಸ್ (9 ರನ್) ಅವರ ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು.
ಈ ಹಂತದಲ್ಲಿ ಒಂದಾದ ನಾಯಕಿ ಸ್ಮೃತಿ ಮಂದಾನ ಮತ್ತು ಜಾರ್ಜಿಯಾ ವೋಲ್ ಡೆಲ್ಲಿ ಬೌಲರ್ಗಳ ಬೆವರಿಳಿಸಿದರು. ಜ್ವರವನ್ನೂ ಲೆಕ್ಕಿಸದೆ ಅಬ್ಬರಿಸಿದ ಸ್ಮೃತಿ, ವೋಲ್ ಜೊತೆಗೂಡಿ 2ನೇ ವಿಕೆಟ್ಗೆ ಬರೋಬ್ಬರಿ 92 ಎಸೆತಗಳಲ್ಲಿ 165 ರನ್ಗಳ ನಿರ್ಣಾಯಕ ಜೊತೆಯಾಟವಾಡಿದರು. ಇದು ತಂಡವನ್ನು ಜಯದತ್ತ ಕೊಂಡೊಯ್ಯಿತು.
ಪಂದ್ಯ ಗೆಲ್ಲಲು 13 ರನ್ಗಳು ಬೇಕಿದ್ದಾಗ ಸ್ಮೃತಿ ಮಂದಾನ 41 ಎಸೆತಗಳಲ್ಲಿ 12 ಬೌಂಡರಿ ಹಾಗೂ 3 ಸಿಕ್ಸರ್ ಒಳಗೊಂಡ 87 ರನ್ ಸಿಡಿಸಿ ಔಟಾದರು. ಅವರ ಈ ಸಾಹಸಮಯ ಇನಿಂಗ್ಸ್ಗೆ ಅರ್ಹವಾಗಿಯೇ ‘ಪಂದ್ಯಶ್ರೇಷ್ಠ’ ಗೌರವ ಒಲಿಯಿತು. ಅಂತಿಮವಾಗಿ ಆರ್ಸಿಬಿ ತಂಡವು ಡೆಲ್ಲಿ ವಿರುದ್ಧ ಗೆದ್ದು, 2ನೇ ಬಾರಿಗೆ ಡಬ್ಲ್ಯುಪಿಎಲ್ ಟ್ರೋಫಿಗೆ ಮುತ್ತಿಕ್ಕಿತು.
