ಇಂಗ್ಲೆಂಡ್ ವಿರುದ್ಧದ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತದ ವನಿತೆಯರ ತಂಡ ಮೊದಲ ಗೆಲುವು ಸಾಧಿಸಿ ಮೂರು ಪಂದ್ಯಗಳ ಸರಣಿಯಲ್ಲಿ 1–0 ಮುನ್ನಡೆ ಪಡೆದಿದೆ. ದ ರೋಸ್ ಬೌಲ್ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ದೀಪ್ತಿ ಶರ್ಮಾ(ಅಜೇಯ 62) ಮತ್ತು ಜೆಮಿಮಾ ರಾಡ್ರಿಗಸ್ (48) ಅವರ ಅಮೋಘ ಆಟದಿಂದ ಟೀಂ ಇಂಡಿಯಾ 4 ವಿಕೆಟ್ಗಳಿಂದ ಜಯಿಸಿತು.
ಟಾಸ್ ಗೆದ್ದ ಇಂಗ್ಲೆಂಡ್ ತಂಡವು 50 ಓವರ್ಗಳಲ್ಲಿ 6 ವಿಕೆಟ್ಗಳಿಗೆ 258 ರನ್ ಗಳಿಸಿತು. ಸೋಫಿಯಾ (83; 92ಎ, 4X9) ಮತ್ತು ಅಲೈಸ್ ಡೇವಿಡ್ಸನ್ ರಿಚರ್ಡ್ಸ್ (53; 73ಎ, 4X2) ಅವರ ಶತಕದ ಜೊತೆಯಾಟದಿಂದಾಗಿ (108 ರನ್) ಉತ್ತಮ ಮೊತ್ತ ಪೇರಿಸಲು ಸಾಧ್ಯವಾಯಿತು. ಅದಕ್ಕುತ್ತರವಾಗಿ ಭಾರತ ತಂಡವು 48.2 ಓವರ್ಗಳಲ್ಲಿ 6 ವಿಕೆಟ್ಗಳನ್ನು ಕಳೆದುಕೊಂಡು 262 ರನ್ ಗಳಿಸಿತು.
ಭಾರತ ತಂಡವು 124 ರನ್ಗಳಿಗೆ 4 ವಿಕೆಟ್ಗಳನ್ನು ಕಳೆದುಕೊಂಡಿತು. ಇದರಿಂದಾಗಿ ಜಯ ಕೈತಪ್ಪುವ ಆತಂಕ ಮೂಡಿತು. ಈ ಹಂತದಲ್ಲಿ ಜಿಮಿಮಾ (48; 54 ಎ) ಮತ್ತು ಅಜೇಯ ಅರ್ಧಶತಕ ಗಳಿಸಿದ ದೀಪ್ತಿ ಶರ್ಮಾ (ಔಟಾಗದೇ 62) ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು.
ಇದನ್ನು ಓದಿದ್ದೀರಾ? Wimbledon 2025: 23 ವರ್ಷದ ಯಾನಿಕ್ ಸಿನರ್ ಚೊಚ್ಚಲ ವಿಂಬಲ್ಡನ್ ಚಾಂಪಿಯನ್
ಭಾರತ ತಂಡದ ಭರವಸೆಯ ಮಧ್ಯಮವೇಗಿ ಕ್ರಾಂತಿ ಗೌಡ್ (55ಕ್ಕೆ2) ಅವರು ಆತಿಥೇಯರಿಗೆ ಆರಂಭದಲ್ಲಿಯೇ ಪೆಟ್ಟುಕೊಟ್ಟರು. ತಮ್ಮ ಮೊದಲ ಓವರ್ನಲ್ಲಿ ಎಮಿ ಜೋನ್ಸ್ ಅವರನ್ನು ಕ್ಲೀನ್ಬೌಲ್ಡ್ ಮಾಡಿದರು. ಎರಡನೇ ಓವರ್ನಲ್ಲಿ ಟಾಮಿ ಬೆಮೌಂಟ್ ಅವರನ್ನು ಎಲ್ಬಿ ಬಲೆಗೆ ಕೆಡವಿದರು. ಆನಂತರದಲ್ಲಿ ಎಮಾ ಲ್ಯಾಂಬ್ (39; 50ಎ, 4X4) ಮತ್ತು ನಾಯಕಿ ನ್ಯಾಟ್ ಶಿವರ್ ಬ್ರಂಟ್ (41; 52ಎ, 4X5) ಮೂರನೇ ವಿಕೆಟ್ ಜೊತೆಯಾಟದಲ್ಲಿ 71 ರನ್ ಸೇರಿಸಿದರು. ಈ ಜೋಡಿ ಆಟ ಮುಂದುವರಿಯದಂತೆ ಆಫ್ಸ್ಪಿನ್ನರ್ ಸ್ನೇಹ ರಾಣಾ ನೋಡಿಕೊಂಡರು. ಅವರು ಮೊದಲಿಗೆ ಬ್ರಂಟ್ ವಿಕೆಟ್ ಪಡೆದರು.
ಸ್ನೇಹ ಹಾಕಿದ ಇನ್ನೊಂದು ಓವರ್ನಲ್ಲಿ ಜೆಮಿಮಾ ಪಡೆದ ಆಕರ್ಷಕ ಕ್ಯಾಚ್ಗೆ ಬ್ರಂಟ್ ಆಟ ಮುಗಿಯಿತು. ತದ ನಂತರ ಸೋಫಿಯಾ ಮತ್ತು ಡೇವಿಡಸನ್ ಜೋಡಿ ಮಿಂಚಿತು.
ಸಂಕ್ಷಿಪ್ತ ಸ್ಕೋರು: ಇಂಗ್ಲೆಂಡ್: 50 ಓವರ್ಗಳಲ್ಲಿ 6ಕ್ಕೆ258, ಭಾರತ: 48.2 ಓವರ್ಗಳಲ್ಲಿ 6 ವಿಕೆಟ್ಗಳಿಗೆ 262
ಪಂದ್ಯದ ಆಟಗಾರ್ತಿ: ದೀಪ್ತಿ ಶರ್ಮಾ
