ನವದೆಹಲಿಯ ಜವಾಹರಲಾಲ್ ನೆಹರು ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ವಿಶ್ವ ಪ್ಯಾರಾ ಅಥ್ಲೆಟಿಕ್ಸ್ ಚಾಂಪಿಯನ್ಶಿಪ್ನ ಪುರುಷರ ಜಾವೆಲಿನ್ ಥ್ರೋ F46 ಸ್ಪರ್ಧೆಯಲ್ಲಿ ಭಾರತದ ಸ್ಪರ್ಧಿ ರಿಂಕು ಹೂಡಾ ವಿಶ್ವದಾಖಲೆಯ ಚಿನ್ನದ ಪದಕಕ್ಕೆ ಮುತ್ತಿಕ್ಕಿದ್ದಾರೆ.
ರಿಂಕು ಹೂಡಾ 66.37 ಮೀಟರ್ ಜಾವೆಲಿನ್ ಎಸೆದು ಚೊಚ್ಚಲ ವಿಶ್ವ ಚಾಂಪಿಯನ್ಶಿಪ್ ಪ್ರಶಸ್ತಿ ತಮ್ಮದಾಗಿಸಿಕೊಂಡಿದ್ದಾರೆ. ತಮ್ಮ ಪ್ರತಿಸ್ಪರ್ಧಿ ಗುರ್ಜರ್ 64.76 ಮೀಟರ್ ಎಸೆದು ಬೆಳ್ಳಿ ಗೆದ್ದಿದ್ದಾರೆ. ಈ ವಿಭಾಗದಲ್ಲಿ ಇದಕ್ಕೂ ಮೊದಲು ಗುರ್ಜರ್ ವಿಶ್ವದಾಖಲೆ ಹೊಂದಿದ್ದರು. ಇದೀಗ ರಿಂಕು ಆ ದಾಖಲೆ ಅಳಿಸಿ ಹೊಸ ಮೈಲಿಗಲ್ಲು ಬರೆದಿದ್ದಾರೆ.
ಇದೇ ಸ್ಪರ್ಧೆಯಲ್ಲಿದ್ದ ಮತ್ತೊಬ್ಬ ಭಾರತೀಯ ಅಜೀತ್ ಸಿಂಗ್ 61.77 ಮೀಟರ್ ಎಸೆದು ನಾಲ್ಕನೇ ಸ್ಥಾನ ಪಡೆದಿದ್ದಾರೆ. ಕ್ಯೂಬಾದ ಗಿಲ್ಲೆರ್ಮೊ ವರೋನಾ ಗೊನ್ಜಾಲೆಜ್ 63.34 ಮೀಟರ್ ಎಸೆದು ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದಾರೆ.
F46 ವರ್ಗೀಕರಣ ಏನು?
ತೋಳಿನ ಕೊರತೆ, ಸ್ನಾಯು ಶಕ್ತಿಯ ದುರ್ಬಲತೆ ಅಥವಾ ತೋಳುಗಳಲ್ಲಿ ನಿಷ್ಕ್ರೀಯ ಚಲನೆ ಮುಂತಾದ ಸಮಸ್ಯೆ ಹೊಂದಿರುವ ಕ್ರೀಡಾಪಟುಗಳು ಈ ವಿಭಾಗದಲ್ಲಿ ಸ್ಪರ್ಧಿಸುತ್ತಾರೆ.
ಹರಿಯಾಣದ ರೋಹ್ಟಕ್ನ ಹೊರವಲಯದಲ್ಲಿರುವ ಧಮರ್ ಎಂಬ ಗ್ರಾಮದಲ್ಲಿ ಕೃಷಿ ಕುಟುಂಬದಲ್ಲಿ ಜನಿಸಿರುವ ರಿಂಕು ಹೂಡಾ ಅವರು ಚಿಕ್ಕವರಿದ್ದಾಗಲೇ ಭತ್ತ ಬಿತ್ತನೆ ಯಂತ್ರದಲ್ಲಿ ಅವರ ಎಡಗೈ ಸಿಲುಕಿ ತುಂಡಾಗಿತ್ತು.
“ಭಾರತದಲ್ಲಿ ಇದು ನನ್ನ ಮೊದಲ ಸ್ಪರ್ಧೆ. ನನಗೆ ಮೈದಾನದಲ್ಲಿ ಉತ್ತಮ ಭಾವನೆ ಇತ್ತು. ಇಂದು ನನ್ನ ದಿನ. ಹಾಗಾಗಿ, ಎಲ್ಲವೂ ನನ್ನ ಪರವಾಗಿತ್ತು. ನನ್ನ ಸಾಧನೆ ನನಗೆ ಹೊಸ ಅನುಭವ ನೀಡಿದೆ” ಎನ್ನುತ್ತಾರೆ ಗೋಲ್ಡ್ ಮೆಡಲಿಸ್ಟ್ ರಿಂಕು.
