ರಾಜಸ್ಥಾನ ರಾಯಲ್ಸ್ ಫ್ರಾಂಚೈಸಿಯ ಮಾಲೀಕತ್ವದಲ್ಲಿ ಶೀಘ್ರದಲ್ಲೇ ಬದಲಾವಣೆಯಾಗುವ ಸಾಧ್ಯತೆಯಿದ್ದು, ಜಾಗತಿಕ ಹೂಡಿಕೆ ಬ್ಯಾಂಕ್ ಆಗಿರುವ ‘ದಿ ರೈನ್ ಗ್ರೂಪ್’ ಇದರ ಮಾರಾಟ ಪ್ರಕ್ರಿಯೆಯ ಉಸ್ತುವಾರಿ ವಹಿಸಿದೆ. ಈ ಕುರಿತು ಸದ್ಯ ಮಾತುಕತೆಗಳು ನಡೆಯುತ್ತಿದ್ದು, ಪ್ರಾಂಚೈಸಿಯ ಮೌಲ್ಯವು ಅಂದಾಜು 10,161 ಕೋಟಿ ರೂ.ಎಂದು ನಿರ್ಣಯಿಸಲಾಗಿದೆ.
ಭಾಸ್ಕರ್ ಇಂಗ್ಲಿಷ್ ವರದಿಯ ಪ್ರಕಾರ, ಮಾರಾಟ ಪ್ರಕ್ರಿಯೆಯ ಮುಂದಿನ ಹಂತವನ್ನು ನಿರ್ಧರಿಸಲು ಪ್ರಮುಖ ಪಾಲುದಾರರು ಮಾರ್ಚ್ 16 ರಂದು ಸಭೆ ಸೇರುವ ನಿರೀಕ್ಷೆಯಿದೆ.
ಪ್ರಸ್ತುತ ಮಾಲೀಕತ್ವದ ವಿವರಗಳನ್ನು ಗಮನಿಸುವುದಾದರೆ, ರಾಜಸ್ಥಾನ ರಾಯಲ್ಸ್ ತಂಡದಲ್ಲಿ ಎಮರ್ಜಿಂಗ್ ಮೀಡಿಯಾ ವೆಂಚರ್ಸ್ನ ಮನೋಜ್ ಬದಾಲೆ ಅವರು ಶೇಕಡಾ 65 ರಷ್ಟು ಅತ್ಯಧಿಕ ಪಾಲು ಹೊಂದಿದ್ದಾರೆ. ರೆಡ್ ಕ್ಯಾಪಿಟಲ್ ಪಾರ್ಟ್ನರ್ಸ್ ಶೇಕಡಾ 15, ಲಚ್ಲಾನ್ ಮುರ್ಡೋಕ್ ಶೇಕಡಾ 13, ಮತ್ತು ಇಯಾನ್ ಮೆಕ್ಕಿನ್ನನ್, ಕಲ್ ಸೋಮಾನಿ, ಸಿಮರ್ ಮೇಯೊ ಹಾಗೂ ಮಿಹಿರ್ ಪಟೇಲ್ ಶೇಕಡಾ 7 ರಷ್ಟು ಷೇರುಗಳನ್ನು ಹೊಂದಿದ್ದಾರೆ.
ಕಣದಲ್ಲಿರುವ ಹೊಸ ಬಿಡ್ದಾರರ ಮೌಲ್ಯಮಾಪನ ಹಂತದ ನಂತರ ಪ್ರಮುಖವಾಗಿ ನಾಲ್ಕು ಬಿಡ್ಡಿಂಗ್ ಗುಂಪುಗಳನ್ನು ಅಂತಿಮಗೊಳಿಸಲಾಗಿದೆ ಎಂದು ವರದಿ ತಿಳಿಸಿದೆ. ಇದರಲ್ಲಿ ಹೂಡಿಕೆದಾರ ಡೇವಿಡ್ ಬ್ಲಿಟ್ಜರ್ ಮತ್ತು ಆದಿತ್ಯ ಬಿರ್ಲಾ ಗ್ರೂಪ್ ನೇತೃತ್ವದ ಒಕ್ಕೂಟ, ಸತ್ಯನ್ ಗಜ್ವಾನಿ ನೇತೃತ್ವದ ಗುಂಪು, ಕಲ್ ಸೋಮಾನಿ ಮತ್ತು ಐಪಿಎಲ್ನ ಮಾಜಿ ಕಮಿಷನರ್ ಲಲಿತ್ ಮೋದಿ ಒಳಗೊಂಡಿರುವ ಒಕ್ಕೂಟ ಹಾಗೂ ಆದಾರ್ ಪೂನಾವಾಲಾ ನೇತೃತ್ವದ ಗುಂಪು ಸೇರಿವೆ.
ಇದನ್ನು ಓದಿದ್ದೀರಾ? ಟೀಕೆಗಳ ಸುಳಿಯಲ್ಲೂ ಮಿನುಗಿದ ಕೇರಳದ ತಾರೆ: ಸಂಜು ಸ್ಯಾಮ್ಸನ್ ಎಂಬ ಛಲದಂಕಮಲ್ಲ
ಬಿಡ್ದಾರರ ಹಿನ್ನೆಲೆಯನ್ನು ನೋಡುವುದಾದರೆ, ಸತ್ಯನ್ ಗಜ್ವಾನಿ ಅವರು ಜಾಗತಿಕ ಕ್ರಿಕೆಟ್ ಹೂಡಿಕೆಗಳಲ್ಲಿ ತಮ್ಮ ವ್ಯಾಪ್ತಿಯನ್ನು ನಿರಂತರವಾಗಿ ವಿಸ್ತರಿಸುತ್ತಿದ್ದಾರೆ. ನಿಕೇಶ್ ಅರೋರಾ ನೇತೃತ್ವದ ಒಕ್ಕೂಟದ ಮೂಲಕ ಅವರು ‘ಲಂಡನ್ ಸ್ಪಿರಿಟ್’ ಫ್ರಾಂಚೈಸಿಯಲ್ಲಿ ಶೇಕಡಾ 49ರಷ್ಟು ಪಾಲು ಹೊಂದಿದ್ದಾರೆ ಮತ್ತು ಅಮೆರಿಕದ ‘ಮೇಜರ್ ಲೀಗ್ ಕ್ರಿಕೆಟ್’ನ ಸ್ಥಾಪಕ ಹೂಡಿಕೆದಾರರಲ್ಲಿ ಒಬ್ಬರಾಗಿದ್ದಾರೆ. ಇನ್ನೊಂದೆಡೆ, ಉದ್ಯಮಿ ಕಲ್ ಸೋಮಾನಿ ಅವರು 2021ರಲ್ಲಿ ರಾಜಸ್ಥಾನ ರಾಯಲ್ಸ್ ಫ್ರಾಂಚೈಸಿಯಲ್ಲಿ ಅಲ್ಪಸಂಖ್ಯಾತ ಪಾಲನ್ನು ಪಡೆದುಕೊಂಡ ನಂತರ ತಂಡದ ವ್ಯವಹಾರಗಳೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದಾರೆ.
ಲಲಿತ್ ಮೋದಿ ಅವರ ಹಿನ್ನೆಲೆಯನ್ನು ಗಮನಿಸುವುದಾದರೆ, 2008ರಲ್ಲಿ ಪ್ರಾರಂಭವಾದ ಕೇವಲ ಕೆಲವೇ ಸೀಸನ್ಗಳಲ್ಲಿ, ಐಪಿಎಲ್ ಕ್ರಿಕೆಟ್ ಜಗತ್ತಿನ ಅತ್ಯಮೂಲ್ಯ ವಾಣಿಜ್ಯ ಆಸ್ತಿಯಾಗಿ ಬೆಳೆಯಿತು. ಆದರೆ, ಮೂರನೇ ಸೀಸನ್ ವೇಳೆಗೆ, ಲಲಿತ್ ಮೋದಿ ವಿರುದ್ಧ ಹಣಕಾಸಿನ ಅಕ್ರಮಗಳು ಮತ್ತು ನಿಯಮಗಳ ಉಲ್ಲಂಘನೆಯ ಗಂಭೀರ ಆರೋಪಗಳು ಕೇಳಿಬಂದವು. ಪರಿಣಾಮವಾಗಿ, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯು ಅವರನ್ನು ತಕ್ಷಣವೇ ಅಮಾನತುಗೊಳಿಸಿತ್ತು. ನಂತರ ಲಂಡನ್ಗೆ ತೆರಳಿದ ಅವರು, ಕ್ರಿಕೆಟ್ ಆಡಳಿತದಲ್ಲಿದ್ದಾಗಿನ ಅಕ್ರಮಗಳ ಆರೋಪಕ್ಕೆ ಸಂಬಂಧಿಸಿದಂತೆ ಹಲವು ಕಾನೂನು ಮತ್ತು ನಿಯಂತ್ರಣ ಸವಾಲುಗಳನ್ನು ಎದುರಿಸುತ್ತಿದ್ದಾರೆ. ವ್ಯವಸ್ಥೆಯಿಂದ ಹೊರಗಿದ್ದರೂ, ಲಲಿತ್ ಮೋದಿ ಅವರು ಕ್ರಿಕೆಟ್ ಆಟದ ಆಡಳಿತ ಮತ್ತು ವ್ಯವಹಾರದ ಕುರಿತು ಆಗಾಗ್ಗೆ ತಮ್ಮ ತೀಕ್ಷ್ಣ ಪ್ರತಿಕ್ರಿಯೆಗಳನ್ನು ನೀಡುತ್ತಲೇ ಬಂದಿದ್ದಾರೆ.
ಸಾವಿರಾರು ಕೋಟಿ ವಂಚಿಸಿದ ಆರೋಪದ ಮೇಲೆ ಬಿಸಿಸಿಐನಿಂದ ಉಚ್ಚಾಟನೆಗೊಂಡಿದ್ದ ಮಾಜಿ ಐಪಿಎಲ್ ಕಮಿಷನರ್ ಲಲಿತ್ ಮೋದಿ, ಕಾನೂನಿನ ಕಣ್ಣಿಗೆ ಮಣ್ಣೆರಚಿ 2010ರಲ್ಲೇ ಲಂಡನ್ಗೆ ಪರಾರಿಯಾದರು. ದೇಶದ ಸಂಪತ್ತು ಲೂಟಿ ಮಾಡಿದ ಈತನ ಹಸ್ತಾಂತರ ಪ್ರಕ್ರಿಯೆಯಲ್ಲಿ ಕೇಂದ್ರದ ಬಿಜೆಪಿ ನೇತೃತ್ವದ ನರೇಂದ್ರ ಮೋದಿ ಸರ್ಕಾರದ ಸಂಪೂರ್ಣ ನಿರ್ಲಕ್ಷ್ಯ ಹಾಗೂ ಉದ್ದೇಶಪೂರ್ವಕ ವಿಳಂಬ ನೀತಿಯನ್ನು ಅನುಸರಿಸುತ್ತಿರುವುದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಕಾನೂನಿನಿಂದ ನುಣುಚಿಕೊಂಡು ವಿದೇಶದಲ್ಲಿ ರಾಜಾರೋಷವಾಗಿರುವ ಈತ, ಈಗಲೂ ಕ್ರಿಕೆಟ್ ಆಡಳಿತದ ಬಗ್ಗೆ ಹೇಳಿಕೆಗಳನ್ನು ನೀಡುತ್ತಿರುವುದು ನಮ್ಮ ಒಟ್ಟು ವ್ಯವಸ್ಥೆಯನ್ನೇ ಅಣಕಿಸುವಂತಿದೆ.
