ದಿಯಾ ಯಾದವ್ ಐಪಿಎಲ್ನಲ್ಲಿ ಹರಾಜಾದ ಅತ್ಯಂತ ಕಿರಿಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗುವ ಮೂಲಕ ಹೊಸ ದಾಖಲೆಯನ್ನು ನಿರ್ಮಿಸಿದ್ದಾರೆ. ಹಾಗೆಯೇ 16 ವರ್ಷದ ದಿಯಾ ಜತೆ ಒಪ್ಪಂದ ಮಾಡಿಕೊಳ್ಳುವ ಮೂಲಕ ಡೆಲ್ಲಿ ಕ್ಯಾಪಿಟಲ್ಸ್ ಇತಿಹಾಸ ನಿರ್ಮಿಸಿದೆ.ಮುಂಬರುವ ಮಹಿಳಾ ಪ್ರೀಮಿಯರ್ ಲೀಗ್ನ(WPL) ಮೆಗಾ ಹರಾಜು ಪ್ರಕ್ರಿಯೆ ನವೆಂಬರ್ 27ರಂದು ದೆಹಲಿಯಲ್ಲಿ ನಡೆದಿದೆ. ಈ ಹರಾಜಿನಲ್ಲಿ ಅತ್ಯಂತ ಕಿರಿಯ ಕ್ರಿಕೆಟ್ ಆಟಗಾರ್ತಿ ದಿಯಾ ಯಾದವ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪಾಲಾಗಿದ್ದಾರೆ. 16 ವರ್ಷದ ದಿಯಾ ಜತೆ ಒಪ್ಪಂದ ಮಾಡಿಕೊಳ್ಳುವ ಮೂಲಕ ಡೆಲ್ಲಿ ಇತಿಹಾಸ ನಿರ್ಮಿಸಿದೆ.
ಹರಿಯಾಣ ಮೂಲಕ ಉದಯೋನ್ಮುಖ ಆರಂಭಿಕ ಬ್ಯಾಟ್ಸ್ಮನ್ ದಿಯಾ ಯಾದವ್ ಇದೇ ಮೊದಲ ಬಾರಿಗೆ WPLನಲ್ಲಿ ಆಡಲಿದ್ದಾರೆ. ಐಪಿಎಲ್ನಲ್ಲಿ ಹರಾಜಾದ ಅತ್ಯಂತ ಕಿರಿಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗುವ ಮೂಲಕ ಹೊಸ ದಾಖಲೆಯನ್ನು ನಿರ್ಮಿಸಿದ್ದಾರೆ. ಈ ಹಿಂದೆ ವೈಭವ್ ಸೂರ್ಯವಂಶಿ 13ನೇ ವಯಸ್ಸಿನಲ್ಲಿಯೇ ಇಂಡಿಯನ್ ಪ್ರೀಮಿಯರ್ ಲೀಗ್ (IPL)ನಲ್ಲಿ ಆಯ್ಕೆಯಾಗುವ ಮೂಲಕ ದಾಖಲೆ ನಿರ್ಮಿಸಿದ್ದಾರೆ. ಇದೀಗ WPLನಲ್ಲಿ ದಿಯಾ ಇತಿಹಾಸ ಬರೆದಿದ್ದಾರೆ.
ಇದನ್ನು ಓದಿದ್ದೀರಾ? ಚುನಾವಣಾ ಫಲಿತಾಂಶದ ಭಯದಿಂದ ಬಿಜೆಪಿ ‘ಒಂದು ರಾಷ್ಟ್ರ, ಒಂದು ಚುನಾವಣೆ’ ಪರಿಕಲ್ಪನೆ ಮುಂದಿಡುತ್ತಿದೆ: ಯೋಗೇಂದ್ರ ಯಾದವ್
ದೆಹಲಿ ತಂಡವು ದಿಯಾ ಯಾದವ್ ಅವರನ್ನು 10 ಲಕ್ಷ ರೂಪಾಯಿ ಮೂಲ ಬೆಲೆಗೆ ಖರೀದಿಸಿದೆ. ದಿಯಾ ಅವರನ್ನು ತಂಡದ ಆರನೇ ಆಟಗಾರ್ತಿಯಾಗಿ ಆಯ್ಕೆ ಮಾಡಲಾಗಿದ್ದು, ಲಾರಾ ವೋಲ್ವಾರ್ಡ್ ಮತ್ತು ಸ್ನೇಹ ರಾಣಾ ಅವರಂತಹ ಅನುಭವಿ ಕ್ರಿಕೆಟಿಗರೊಂದಿಗೆ ದಿಯಾ ಸೇರಿಕೊಂಡಿದ್ದಾರೆ.
16 ವಯಸ್ಸಿನ ದಿಯಾ ಯಾದವ್ ಯಾರು?
ಹರಿಯಾಣದ ದೇಶೀಯ ತಂಡ ಮತ್ತು ಮಹಿಳಾ ಪ್ರೀಮಿಯರ್ ಲೀಗ್ನಲ್ಲಿ ದೆಹಲಿ ಕ್ಯಾಪಿಟಲ್ಸ್ (Delhi Capitals) ತಂಡವನ್ನು ಪ್ರತಿನಿಧಿಸುತ್ತಿರುವ ದಿಯಾ ಯಾದವ್ ತಮ್ಮ ಆಕ್ರಮಣಕಾರಿ ಆರಂಭಿಕ ಬ್ಯಾಟಿಂಗ್ಗೆ ಹೆಸರುವಾಸಿಯಾಗಿದ್ದಾರೆ.
15 ವರ್ಷದೊಳಗಿನವರ (U-15) ಪಂದ್ಯಾವಳಿಯು ದಿಯಾ ಅವರ ವೃತ್ತಿ ಜೀವನದ ಪ್ರಮುಖ ತಿರುವಾಗಿದೆ. ಚಿಕ್ಕ ವಯಸ್ಸಿನಲ್ಲಿಯೇ ದಿಯಾ ಅವರ ‘ಸ್ಟ್ರೋಕ್-ಪ್ಲೇಯಿಂಗ್’ ಮತ್ತು ‘ಪವರ್-ಹಿಟ್ಟಿಂಗ್’ ಅನೇಕ ಅನುಭವಿ ಬೌಲರ್ಗಳನ್ನು ದಂಗಾಗಿಸಿದೆ. ಕೇವಲ 14 ವರ್ಷ ವಯಸ್ಸಿನಲ್ಲಿಯೇ ದಿಯಾ ಮಹಿಳಾ ಅಂಡರ್-15 ಏಕದಿನ ಕಪ್ನಲ್ಲಿ ದೆಹಲಿ ವಿರುದ್ಧ ಅಜೇಯ 124 ರನ್ ಗಳಿಸುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಇತ್ತೀಚೆಗೆ, ದಿಯಾ ಸೀನಿಯರ್ ಮಹಿಳಾ ಅಂತರ-ವಲಯ ಟಿ20 ಟ್ರೋಫಿಯಲ್ಲಿ ಉತ್ತರ ವಲಯದ ಪರ ಆಡಿದ್ದು ಐದು ಇನ್ನಿಂಗ್ಸ್ಗಳಲ್ಲಿ 151 ರನ್ ಗಳಿಸಿದರು. ಅವರ ಸರಾಸರಿ 30.20 ಮತ್ತು ಅವರ ಸ್ಟ್ರೈಕ್ ರೇಟ್ ಸುಮಾರು 150 ಆಗಿತ್ತು. ಹಾಗೆಯೇ ಈ ಟೂರ್ನಮೆಂಟ್ನಲ್ಲಿ ಅತ್ಯುತ್ತಮ ಸ್ಟ್ರೈಕ್ ರೇಟ್ ಪಟ್ಟಿಯಲ್ಲಿ ಮೂರನೇ ಸ್ಥಾನ ಪಡೆದ ಅವರು, ಬೌಂಡರಿಗಳ ಸಂಖ್ಯೆಯಲ್ಲಿ ಎರಡನೇ ಸ್ಥಾನ ಪಡೆದರು. ತಮ್ಮ ಟಿ20 ವೃತ್ತಿಜೀವನದಲ್ಲಿ, ದಿಯಾ 19 ಇನ್ನಿಂಗ್ಸ್ಗಳಲ್ಲಿ ನಾಲ್ಕು ಅರ್ಧಶತಕಗಳು ಸೇರಿದಂತೆ ಸುಮಾರು 590 ರನ್ ಗಳಿಸಿದ್ದಾರೆ.
ಭಾರತದ ಆರಂಭಿಕ ಆಟಗಾರ್ತಿ ಶಫಾಲಿ ವರ್ಮಾ ಜತೆ ಹರಿಯಾಣ ತಂಡದಲ್ಲಿ ಆಡಿರುವ ದಿಯಾ, ತಂಡದ ನಾಯಕಿ ಶಫಾಲಿ ವರ್ಮಾ ಅವರಿಂದಲೇ ಆಕ್ರಮಣಕಾರಿ ಆಟದ ಶೈಲಿಯನ್ನು ಕಲಿತಿರುವುದಾಗಿ ಈ ಹಿಂದೆ ಹೇಳಿಕೊಂಡಿದ್ದಾರೆ.
ಶಫಾಲಿ ತಮ್ಮ ‘ರೋಲ್ ಮಾಡೆಲ್’ ಎಂದು ಪರಿಗಣಿಸುವ ದಿಯಾ ಅವರು, “ಶಫಾಲಿ ಅವರ ಬ್ಯಾಟಿಂಗ್ ಶೈಲಿ ಮತ್ತು ಒತ್ತಡದ ಪರಿಸ್ಥಿತಿಗಳನ್ನು ನಿಭಾಯಿಸುವ ಸಾಮರ್ಥ್ಯ ನನಗೆ ಸ್ಫೂರ್ತಿಯಾಗಿದೆ” ಎಂದಿದ್ದಾರೆ. ಇದೀಗ ಮಹಿಳಾ ಪ್ರೀಮಿಯರ್ ಲೀಗ್ನಲ್ಲಿಯೂ ಶಫಾಲಿ, ದಿಯಾ ಒಂದೇ ತಂಡದಲ್ಲಿ ಆಡಲಿದ್ದಾರೆ.
ಪತ್ರಕರ್ತೆ, 2019ರಿಂದ ಪತ್ರಿಕೋದ್ಯಮವೇ ಬದುಕು. ರಾಜಕೀಯ, ಬ್ಯುಜಿನೆಸ್ ಸುದ್ದಿಗಳಲ್ಲಿ ಆಸಕ್ತಿ.
