ಪ್ರಸಕ್ತ 2026ರ ಐಸಿಸಿ ಟಿ20 ವಿಶ್ವಕಪ್ ಟೂರ್ನಿಯ ಸೂಪರ್ 8 ಹಂತದ ಕೊನೆಯ ಪಂದ್ಯದಲ್ಲಿ ಆತಿಥೇಯ ಶ್ರೀಲಂಕಾ ವಿರುದ್ಧ ಪಾಕಿಸ್ತಾನ 5 ರನ್ಗಳ ರೋಚಕ ಜಯ ಸಾಧಿಸಿದರೂ, ನೆಟ್ ರನ್ರೇಟ್ (ಎನ್ಆರ್ಆರ್) ಲೆಕ್ಕಾಚಾರದಲ್ಲಿ ಎಡವಿ ಟೂರ್ನಿಯಿಂದ ಅಧಿಕೃತವಾಗಿ ಹೊರಬಿದ್ದಿದೆ. ಈ ಮೂಲಕ ಪಾಕ್ ಕ್ರಿಕೆಟ್ ಅಭಿಮಾನಿಗಳ ಸೆಮಿಫೈನಲ್ ಕನಸು ಭಗ್ನಗೊಂಡಿದ್ದು, ‘ಗುಂಪು 2’ರಿಂದ ನ್ಯೂಜಿಲೆಂಡ್ ತಂಡ ಸೆಮಿಫೈನಲ್ ಪ್ರವೇಶಿಸಿದೆ. ಇದು ಸತತ ನಾಲ್ಕು ಐಸಿಸಿ ಟೂರ್ನಿಗಳಲ್ಲಿ ವೈಫಲ್ಯ ಕಂಡಿರುವ ಪಾಕಿಸ್ತಾನದ ಪಾಲಿಗೆ ಮತ್ತೊಂದು ಐತಿಹಾಸಿಕ ಮುಖಭಂಗವಾಗಿ ಪರಿಣಮಿಸಿದೆ.
ಪಾಲೆಕೆಲೆಯಲ್ಲಿ ನಡೆದ ‘ಮಾಡು ಇಲ್ಲವೆ ಮಡಿ’ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಸಲ್ಮಾನ್ ಅಲಿ ಆಘಾ ನೇತೃತ್ವದ ಪಾಕಿಸ್ತಾನ ತಂಡ, ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 212 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತ್ತು. ಆರಂಭಿಕ ಆಟಗಾರ ಸಾಹಿಬ್ಜಾದಾ ಫರ್ಹಾನ್ ಅವರ ಸ್ಪೋಟಕ ಶತಕ (60 ಎಸೆತಗಳಲ್ಲಿ 100 ರನ್) ಹಾಗೂ ಫಖರ್ ಜಮಾನ್ ಅವರ ಭರ್ಜರಿ ಅರ್ಧಶತಕದ (84 ರನ್) ನೆರವಿನಿಂದ ಈ ಜೋಡಿ ಟಿ20 ವಿಶ್ವಕಪ್ ಇತಿಹಾಸದಲ್ಲೇ ಅತಿ ಹೆಚ್ಚು ಅಂದರೆ 176 ರನ್ಗಳ ಆರಂಭಿಕ ಜೊತೆಯಾಟದ ದಾಖಲೆ ಬರೆಯಿತು.
ಆದರೆ, ಕೇವಲ ಪಂದ್ಯ ಗೆದ್ದರಷ್ಟೇ ಸಾಲದು, ನ್ಯೂಜಿಲೆಂಡ್ ತಂಡವನ್ನು ನೆಟ್ ರನ್ರೇಟ್ನಲ್ಲಿ ಹಿಂದಿಕ್ಕಿ ಸೆಮಿಫೈನಲ್ ತಲುಪಬೇಕಿದ್ದರೆ, ಪಾಕಿಸ್ತಾನ ಈ ಪಂದ್ಯದಲ್ಲಿ ಶ್ರೀಲಂಕಾವನ್ನು ಕನಿಷ್ಠ 147 ರನ್ಗಳ ಒಳಗೆ ಕಟ್ಟಿಹಾಕಲೇಬೇಕಾದ ಅನಿವಾರ್ಯತೆ ಇತ್ತು. 12ನೇ ಓವರ್ಗೆ ಲಂಕಾವನ್ನು 101/5 ರನ್ಗಳಿಗೆ ನಿಯಂತ್ರಿಸಿ ಪಾಕ್ ಉತ್ತಮ ಹಾದಿಯಲ್ಲೇ ಇತ್ತು. ಆದರೆ ಲಂಕಾ ನಾಯಕ ದಸುನ್ ಶಾನಕ (31 ಎಸೆತಗಳಲ್ಲಿ ಅಜೇಯ 76) ಮತ್ತು ಪವನ್ (58) ಅವರ ಅದ್ಭುತ ಹೋರಾಟದಿಂದಾಗಿ ಶ್ರೀಲಂಕಾ ಕೊನೆಯಲ್ಲಿ 207 ರನ್ ಗಳಿಸುವಲ್ಲಿ ಯಶಸ್ವಿಯಾಯಿತು. ಕೊನೆಯ ಓವರ್ನಲ್ಲಿ ಶಹೀನ್ ಶಾ ಆಫ್ರಿದಿ ಬೌಲಿಂಗ್ನಲ್ಲಿ ಶಾನಕ ಸತತ ಸಿಕ್ಸರ್ಗಳನ್ನು ಸಿಡಿಸಿ ಪಾಕ್ ರನ್ರೇಟ್ ಲೆಕ್ಕಾಚಾರವನ್ನು ತಲೆಕೆಳಗಾಗಿಸಿದರು. ಇದರಿಂದಾಗಿ ಪಂದ್ಯ ಗೆದ್ದರೂ ಪಾಕಿಸ್ತಾನ ಅಂಕಪಟ್ಟಿಯಲ್ಲಿ ನ್ಯೂಜಿಲೆಂಡ್ಗಿಂತ ಹಿಂದೇ ಉಳಿಯಿತು.
ಸೂಪರ್-8 ಹಂತದಲ್ಲಿ ಪಾಕಿಸ್ತಾನದ ಹಾದಿ ಸುಗಮವಾಗಿರಲಿಲ್ಲ. ನ್ಯೂಜಿಲೆಂಡ್ ವಿರುದ್ಧದ ಮೊದಲ ಪಂದ್ಯ ಮಳೆಯಿಂದ ರದ್ದಾಗಿದ್ದು ತಂಡಕ್ಕೆ ಹಿನ್ನಡೆಯುಂಟುಮಾಡಿತ್ತು. ಆನಂತರ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಹ್ಯಾರಿ ಬ್ರೂಕ್ ಅವರ ಶತಕದ ಮುಂದೆ 165 ರನ್ಗಳನ್ನು ರಕ್ಷಿಸಿಕೊಳ್ಳುವಲ್ಲಿ ವಿಫಲವಾಗಿ ಸೋಲನುಭವಿಸಿದ್ದು ತಂಡದ ಸೆಮಿಫೈನಲ್ ಹಾದಿಯನ್ನು ಮತ್ತಷ್ಟು ಕಠಿಣಗೊಳಿಸಿತ್ತು. ಪ್ರಮುಖ ಪಂದ್ಯದಲ್ಲಿ ಹಿರಿಯ ಆಟಗಾರ, ಮಾಜಿ ನಾಯಕ ಬಾಬರ್ ಆಜಂ ಅವರನ್ನು ಕೈಬಿಟ್ಟ ನಿರ್ಧಾರ ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು.
ಇದನ್ನು ಓದಿದ್ದೀರಾ? ‘ಚಿನ್ನಸ್ವಾಮಿ’ಯಲ್ಲಿ ಐಪಿಎಲ್ ಪಂದ್ಯಗಳು ಇನ್ನೂ ಅತಂತ್ರ: ಬೇಷರತ್ ಅನುಮತಿಗೆ ಆರ್ಸಿಬಿ ಪಟ್ಟು
ಸತತ ನಾಲ್ಕು ಐಸಿಸಿ ಟೂರ್ನಿಗಳಲ್ಲಿ (2023ರ ಏಕದಿನ ವಿಶ್ವಕಪ್, 2024ರ ಟಿ20, 2025ರ ಚಾಂಪಿಯನ್ಸ್ ಟ್ರೋಫಿ ಹಾಗೂ ಪ್ರಸಕ್ತ 2026ರ ಟಿ20) ಕನಿಷ್ಠ ಸೆಮಿಫೈನಲ್ ತಲುಪುವಲ್ಲಿಯೂ ವಿಫಲವಾಗಿರುವ ಪಾಕ್ ತಂಡದ ವಿರುದ್ಧ ತೀವ್ರ ಜನಾಕ್ರೋಶ ವ್ಯಕ್ತವಾಗಿದೆ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರು ತಂಡದ ಈ ತೀರಾ ಕಳಪೆ ಪ್ರದರ್ಶನದಿಂದ ಬೇಸತ್ತು, ಪ್ರತಿಯೊಬ್ಬ ಆಟಗಾರನಿಗೂ ತಲಾ 50 ಲಕ್ಷ ಪಾಕಿಸ್ತಾನಿ ರೂಪಾಯಿ (ಸುಮಾರು 16.28 ಲಕ್ಷ ಭಾರತೀಯ ರೂ.) ದಂಡ ವಿಧಿಸಿದ್ದಾರೆ.
ಪಾಕ್ ಕ್ರಿಕೆಟ್ ದಿಗ್ಗಜ ಶೋಯೆಬ್ ಅಖ್ತರ್ ತಂಡದ ಆಡಳಿತ ಮಂಡಳಿಯನ್ನು ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡಿದ್ದು, “ಆಡಳಿತ ಮಂಡಳಿಗೆ ಯಾವುದೇ ಸ್ಪಷ್ಟತೆ ಇಲ್ಲ, ಖವಾಜಾ ನಾಫೆ ಬದಲಿಗೆ ಸೈಮ್ ಅಯೂಬ್ ಅವರನ್ನು ಆಡಿಸಬೇಕಿತ್ತು. ತಂಡದ ಆಯ್ಕೆಯಲ್ಲಿಯೇ ಸಂಪೂರ್ಣವಾಗಿ ಎಡವಿದ್ದಾರೆ. ಪಿಸಿಬಿ ವ್ಯವಸ್ಥೆಯಲ್ಲಿ ಏನೋ ಗಂಭೀರ ದೋಷವಿದೆ” ಎಂದು ಕಟುವಾಗಿ ಟೀಕಿಸಿದ್ದಾರೆ.
ಶ್ರೀಲಂಕಾ ವಿರುದ್ಧದ ಈ ಒಂದು ಪಂದ್ಯದ ಸಾಂತ್ವನ ಗೆಲುವು ಪಾಕಿಸ್ತಾನದ ಕಳಪೆ ಕ್ರಿಕೆಟ್ ವ್ಯವಸ್ಥೆಯನ್ನು ಮರೆಮಾಚಲು ಸಾಧ್ಯವಿಲ್ಲ. ತಂಡದ ಈ ಸತತ ವೈಫಲ್ಯವು ಪಾಕ್ ಕ್ರಿಕೆಟ್ನಲ್ಲಿ ಆಮೂಲಾಗ್ರ ಬದಲಾವಣೆಯ ಅನಿವಾರ್ಯತೆಯನ್ನು ಸಾರಿ ಹೇಳುತ್ತಿದೆ.
