- ವಿರಾಟ್ ಜೊತೆಗೆ ಸೆಲ್ಫೀಗೆ ಮುಗಿಬಿದ್ದ ಅಭಿಮಾನಿಗಳು
- ಭಾನುವಾರದ ಪಂದ್ಯಕ್ಕಾಗಿ ಬೆಂಗಳೂರಿಗೆ ಬಂದಿಳಿದಿರುವ ಕೊಹ್ಲಿ
ಐಪಿಎಲ್ ಟೂರ್ನಿಯಲ್ಲಿ ಬ್ಯುಸಿಯಾಗಿರುವ ಟೀಂ ಇಂಡಿಯಾದ ಮಾಜಿ ನಾಯಕ, ಆರ್ಸಿಬಿ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು) ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ, ತಮ್ಮ ಪತ್ನಿ ಅನುಷ್ಕಾ ಶರ್ಮಾ ಮತ್ತು ಕುಟುಂಬದವರ ಜೊತೆಗೆ ಶನಿವಾರ ಬೆಂಗಳೂರಿನ ಮಲ್ಲೇಶ್ವರಂನಲ್ಲಿರುವ ಪ್ರಸಿದ್ಧ ಸಿಟಿಆರ್ (ಸೆಂಟ್ರಲ್ ಟಿಫನ್ ರೂಂ) ಹೋಟೆಲ್ನಲ್ಲಿ ದೋಸೆ ಸವಿದಿದ್ದಾರೆ.
ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ ತಮ್ಮ ಆಪ್ತರ ಜೊತೆಗೆ ʼಸಿಟಿಆರ್ʼನಲ್ಲಿ ಉಪಹಾರ ಸೇವಿಸಿ ಹೊರಬರುತ್ತಿರುವ ಸಂದರ್ಭದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಸ್ಟಾರ್ ದಂಪತಿ ಸಿಟಿಆರ್ ಭೇಟಿ ನೀಡಿದ ವಿಚಾರ ತಿಳಿದು ನೂರಾರು ಅಭಿಮಾನಿಗಳು ಹೋಟೆಲ್ ಮುಂಭಾಗದಲ್ಲಿ ಜಮಾಯಿಸಿದ್ದಾರೆ. ವಿರಾಟ್ ಹೋಟೆಲ್ನಿಂದ ಹೊರಬರುತ್ತಲೇ ʼಆರ್ಸಿಬಿʼ ಪರ ಘೋಷಣೆ ಕೂಗಲು ಆರಂಭಿಸಿದ ಅಭಿಮಾನಿಗಳು ಸೆಲ್ಫೀಗಾಗಿ ಮುಗಿಬಿದ್ದಿದ್ದಾರೆ. ನೂಕು ನುಗ್ಗಲು ಹೆಚ್ಚಾಗುತ್ತಲೇ ಸೆಲ್ಫೀ ನೀಡಲು ನಿರಾಕರಿಸಿರುವ ವಿರಾಟ್ ಕಾರ್ ಏರಿ ಸ್ಥಳದಿಂದ ತೆರಳಿದ್ದಾರೆ.
Pakad road aliro MTR ge hogod bittu CTR ge yaake hodri🏃 https://t.co/puHsnCIDrQ
— Hasanmuki (@haage_sumane) April 22, 2023
ಈ ಸುದ್ದಿ ಓದಿದ್ದೀರಾ?: ಐಪಿಎಲ್ 2023 | ಫೈನಲ್, ಕ್ವಾಲಿಫೈಯರ್ ಪಂದ್ಯಗಳ ವೇಳಾಪಟ್ಟಿ ಘೋಷಿಸಿದ ಬಿಸಿಸಿಐ
ವಿರುಷ್ಕಾ ದಂಪತಿ ʼಸಿಟಿಆರ್ʼಗೆ ಭೇಟಿ ನೀಡಿದ್ದ ವಿಡಿಯೋ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, “ಪಕ್ಕದ ರಸ್ತೆಯಲ್ಲಿ ಇರುವ ʼಎಂಟಿಆರ್ʼಗೆ ಹೋಗುವ ಬದಲು ʼಸಿಟಿಆರ್ʼಗೆ ಯಾಕೆ ಹೋದ್ರಿ” ಎಂದಿದ್ದಾರೆ. ವಿರಾಟ್ ಜೊತೆಗೆ ಸೆಲ್ಫೀಗಾಗಿ ಜನ ಮುಗಿಬಿದ್ದಿರುವುದನ್ನು ಕಂಡು “ಅವರ ಖಾಸಗಿತನಕ್ಕೆ ಬೆಲೆ ಕೊಡಿ” ಎಂಬ ಮಾತುಗಳು ಕೂಡ ಕೇಳಿ ಬಂದಿವೆ.
ಏಪ್ರಿಲ್ 23ರ ಮಧ್ಯಾಹ್ನ ʼಆರ್ಸಿಬಿʼ ಮತ್ತು ʼಆರ್ಆರ್ʼ (ರಾಜಸ್ತಾನ ರಾಯಲ್ಸ್) ತಂಡದ ನಡುವೆ ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪಂದ್ಯ ನಡೆಯಲಿದೆ. ಈ ಹಿನ್ನೆಲೆಯಲ್ಲಿ ವಿರಾಟ್ ಕೊಹ್ಲಿ ಕುಟುಂಬ ಸಮೇತ ಬೆಂಗಳೂರಿಗೆ ಆಗಮಿಸಿದ್ದು, ಪಂದ್ಯಕ್ಕೆ ತಯಾರಿ ನಡೆಸುತ್ತಿದ್ದಾರೆ.
