ಮಹಿಳಾ ಕ್ರಿಕೆಟ್ ಆಧುನಿಕ ಸಮಾಜದಲ್ಲಿ ಬದಲಾವಣೆಗೆ ಕಾರಣವಾಗಿದೆ. ಬಾಲಕಿಯರು ಕ್ರೀಡೆಯಲ್ಲಿ ಭಾಗವಹಿಸುವುದು ಹೆಚ್ಚಿದೆ. ಗ್ರಾಮೀಣ ಪ್ರದೇಶಗಳ ಶಾಲೆಗಳು ಕ್ರಿಕೆಟ್ ಕಲಿಸುತ್ತಿವೆ. BCCI ಮತ್ತು ರಾಜ್ಯ ಸರ್ಕಾರಗಳು ಇದಕ್ಕೆ ಬೆಂಬಲ ನೀಡುತ್ತಿವೆ.
ಮಹಿಳಾ ಕ್ರಿಕೆಟ್ ಎಂದರೆ ಇದು ಕೇವಲ ಒಂದು ಆಟವಲ್ಲ, ಅದು ಹಲವು ಮಹಿಳೆಯರ ಕನಸುಗಳು, ಹೋರಾಟಗಳು ಮತ್ತು ಸಾಧನೆಗಳ ಕಥೆ. ಒಂದು ಕಾಲದಲ್ಲಿ ಪುರುಷರ ಕ್ರಿಕೆಟ್ನ ನೆರಳಿನಲ್ಲಿ ಮರೆಯಾಗಿದ್ದ ಮಹಿಳಾ ಕ್ರಿಕೆಟ್, ಇಂದು ಜಾಗತಿಕ ಮಟ್ಟದಲ್ಲಿ ತನ್ನದೇ ಆದ ಸ್ಥಾನವನ್ನು ಪಡೆದುಕೊಂಡಿದೆ. ವಿಶೇಷವಾಗಿ ಭಾರತದಲ್ಲಿ, ಮಹಿಳಾ ಕ್ರಿಕೆಟ್ನ ಬೆಳವಣಿಗೆಯು ಹೊಸ ಮೈಲಿಗಲ್ಲಾಗಿದೆ. ಇದು ಕೇವಲ ಆಟಗಾರ್ತಿಯರ ದಾಖಲೆಗಳಲ್ಲ, ಅದು ಸಮಾಜದಲ್ಲಿ ಒಂದು ರೀತಿಯಲ್ಲಿ ಮಹಿಳೆಯರ ಸಬಲೀಕರಣದ ಸಂಕೇತವೂ ಆಗಿದೆ. ಮಹಿಳಾ ಕ್ರಿಕೆಟ್ನ ಹುಟ್ಟು ಮತ್ತು ಇತಿಹಾಸವು ಬಹಳ ಹಳೆಯದು. ಇದು 18ನೇ ಶತಮಾನದಲ್ಲಿ ಇಂಗ್ಲೆಂಡ್ನಲ್ಲಿ ಆರಂಭವಾಯಿತು. 1745ರಲ್ಲಿ ಮೊದಲ ದಾಖಲಾದ ಮಹಿಳಾ ಕ್ರಿಕೆಟ್ ಪಂದ್ಯವು ಹ್ಯಾಂಬಲ್ಡನ್ ಮತ್ತು ಬ್ರಾಮ್ಲಿ ತಂಡಗಳ ನಡುವೆ ನಡೆಯಿತು. ಆಗ ಮಹಿಳೆಯರು ಸ್ಕರ್ಟ್ಗಳನ್ನು ಧರಿಸಿ ಆಡುತ್ತಿದ್ದರು. ಮತ್ತು ಇದು ಒಂದು ಮನರಂಜನೆಯ ರೂಪದಲ್ಲಿತ್ತು. 19ನೇ ಶತಮಾನದ ಅಂತ್ಯದಲ್ಲಿ ಇದು ಹೆಚ್ಚು ಸಂಘಟಿತವಾಯಿತು. 1890ರಲ್ಲಿ ಇಂಗ್ಲೆಂಡ್ನಲ್ಲಿ ಮಹಿಳಾ ಕ್ರಿಕೆಟ್ ಕ್ಲಬ್ಗಳು ಸ್ಥಾಪನೆಯಾದವು. ನಂತರದ ಬೆಳವಣಿಗೆಯಿಂದ 1926ರಲ್ಲಿ ವಿಮೆನ್ಸ್ ಕ್ರಿಕೆಟ್ ಅಸೋಸಿಯೇಷನ್ ರಚನೆಯಾಯಿತು. ಇದು ಮಹಿಳಾ ಕ್ರಿಕೆಟ್ಗೆ ಮೊದಲ ಸಂಘಟಿತ ರೂಪ ನೀಡಿತು.
ಪುರುಷರ ವಿಶ್ವಕಪ್ಗಿಂತ ಮೊದಲು ನಡೆದ ಮಹಿಳೆಯರ ವಿಶ್ವಕಪ್
ಜಾಗತಿಕ ಮಟ್ಟದಲ್ಲಿ, 1958ರಲ್ಲಿ ಇಂಟರ್ನ್ಯಾಷನಲ್ ವಿಮೆನ್ಸ್ ಕ್ರಿಕೆಟ್ ಕೌನ್ಸಿಲ್ (IWCC) ಸ್ಥಾಪನೆಯಾಯಿತು. ಇದನ್ನು ನಂತರ 2005ರಲ್ಲಿ ICCಯೊಂದಿಗೆ ವಿಲೀನಗೊಳಿಸಲಾಯಿತು. ಮೊದಲ ಮಹಿಳಾ ವಿಶ್ವಕಪ್ 1973ರಲ್ಲಿ ನಡೆಯಿತು, ಮತ್ತು ಇದು ಪುರುಷರ ವಿಶ್ವಕಪ್ಗಿಂತಲೂ ಮೊದಲು ನಡೆದಿರುವುದು ವಿಶೇಷ. ಮಹಿಳಾ ಕ್ರಿಕೆಟ್ನಲ್ಲೂ ಕೂಡ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ದೇಶಗಳು ಮುಂಚೂಣಿಯಲ್ಲಿದ್ದವು. ಆದರೆ ಆರಂಭಿಕ ದಿನಗಳಲ್ಲಿ ಮಹಿಳೆಯರು ಹಲವು ಸವಾಲುಗಳನ್ನು ಎದುರಿಸಬೇಕಾಯಿತು. ಸಾಮಾಜಿಕ ಕಳಂಕ, ಸೌಲಭ್ಯಗಳ ಕೊರತೆ, ಆರ್ಥಿಕ ನೆರವಿನ ಅಭಾವ, ಇವೆಲ್ಲವೂ ಇದ್ದವು. ಮಹಿಳೆಯರು “ಪುರುಷರ ಆಟ” ಆಡುತ್ತಾರೆ ಎಂದು ಹಲವರು ಟೀಕಿಸುತ್ತಿದ್ದರು. ಅವರು ಸ್ವಂತ ಖರ್ಚಿನಲ್ಲಿ ಪ್ರವಾಸ ಮಾಡುತ್ತಿದ್ದರು, ಮೂಲಭೂತ ಸೌಕರ್ಯಗಳು ಇರಲಿಲ್ಲ. ಹುಡುಗಿಯರು ಕ್ರಿಕೆಟ್ ಆಡುವುದಕ್ಕೆ ಪ್ರೋತ್ಸಾಹ ಅಪರೂಪವಾಗಿತ್ತು. ಆದರೂ, ಅವರ ಛಲ ಮತ್ತು ಪ್ರತಿಭೆಯಿಂದ ತಂಡ ಮುಂದುವರೆಯಿತು. ಆದರೆ ಇವೆಲ್ಲ ಅಪಮಾನಗಳನ್ನು ಸಹಿಸಿ ತಮ್ಮ ಹೋರಾಟದ ಹಾದಿಯನ್ನು ಮುಂದುವರಿಸಿದರು.
ಆರಂಭಿಕ ದಿನಗಳಲ್ಲಿ ಆಟಗಾರ್ತಿಯರು ಹವ್ಯಾಸಿ ಸ್ಥಿತಿಯಲ್ಲಿದ್ದರು. ಅವರು ಉದ್ಯೋಗ ಮಾಡುತ್ತಾ ಆಡುತ್ತಿದ್ದರು. ಉದಾಹರಣೆಗೆ, ಡಯಾನಾ ಎಡುಲ್ಜಿ ಮತ್ತು ಶುಭಾಂಗಿ ಕುಲಕರ್ಣಿ ಅವರಂತಹ ಆಟಗಾರ್ತಿಯರು ತಮ್ಮ ಕೆಲಸದ ಜೊತೆಗೆ ಕ್ರಿಕೆಟ್ ಆಡುತ್ತಿದ್ದರು. ಸೌಲಭ್ಯಗಳ ಕೊರತೆಯಿಂದಾಗಿ ತರಬೇತಿ ಕಷ್ಟವಾಗಿತ್ತು. ಆದರೆ, ಅವರ ಹೋರಾಟವು ಭವಿಷ್ಯದ ಆಟಗಾರ್ತಿಯರಿಗೆ ಮಾರ್ಗದರ್ಶನವಾಯಿತು. 1978ರಲ್ಲಿ ಭಾರತ ಮೊದಲ ಮಹಿಳಾ ವಿಶ್ವಕಪ್ ಆಯೋಜಿಸಿತು, ಇದು ದೇಶದಲ್ಲಿ ಮಹಿಳಾ ಕ್ರಿಕೆಟ್ಗೆ ಹೊಸ ಉತ್ತೇಜನ ನೀಡಿತು.
ಟೀಂ ಇಂಡಿಯಾಗೆ ಕನ್ನಡತಿ ಪ್ರಥಮ ನಾಯಕಿ – ಶಾಂತಾ ರಂಗಸ್ವಾಮಿ
ಭಾರತದಲ್ಲಿ ಮಹಿಳಾ ಕ್ರಿಕೆಟ್ 1973ರಲ್ಲಿ ವಿಮೆನ್ಸ್ ಕ್ರಿಕೆಟ್ ಅಸೋಸಿಯೇಷನ್ ಆಫ್ ಇಂಡಿಯಾ (WCAI) ಸ್ಥಾಪನೆಯೊಂದಿಗೆ ಆರಂಭವಾಯಿತು. ಮೊದಲ ಅಂತಾರಾಷ್ಟ್ರೀಯ ಟೆಸ್ಟ್ ಪಂದ್ಯ 1976ರಲ್ಲಿ ನ್ಯೂಜಿಲೆಂಡ್ ವಿರುದ್ಧ ನಡೆಯಿತು. ಕನ್ನಡಿಗರ ಹೆಮ್ಮೆಯಾಗಿ, ಬೆಂಗಳೂರಿನ ಶಾಂತಾ ರಂಗಸ್ವಾಮಿ ಭಾರತೀಯ ಮಹಿಳಾ ತಂಡದ ಮೊದಲ ನಾಯಕಿಯಾದರು. 1954ರಲ್ಲಿ ಜನಿಸಿದ ಶಾಂತಾ ಅವರು ಆಲ್ರೌಂಡರ್ ಆಗಿ 1976ರಿಂದ 1991ರವರೆಗೆ ಆಡಿದರು. 1976ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಪಟ್ನಾದಲ್ಲಿ ನಡೆದ ಮೊದಲ ಟೆಸ್ಟ್ನಲ್ಲಿ ಭಾರತಕ್ಕೆ ಮೊದಲ ಗೆಲುವು ತಂದುಕೊಟ್ಟರು. 1977ರಲ್ಲಿ ನ್ಯೂಜಿಲೆಂಡ್ ವಿರುದ್ಧ ಮೊದಲ ಶತಕ (108) ಬಾರಿಸಿ ಇತಿಹಾಸ ಸೃಷ್ಟಿಸಿದರು. ಭಾರತೀಯ ಮಹಿಳೆಯರಲ್ಲಿ ಇದು ಪ್ರಥಮ ಶತಕ. ಶಾಂತಾ ಅವರ ಸಾಧನೆ ಇಂದಿನ ಮಿಥಾಲಿ ರಾಜ್, ಸ್ಮೃತಿ ಮಂಧಾನ, ಹರ್ಮನ್ಪ್ರೀತ್ ಕೌರ್ ಸೇರಿದಂತೆ ಹಲವರಿಗೆ ಸ್ಫೂರ್ತಿ. ಕನ್ನಡಿಗರ ಹೆಮ್ಮೆಯಾಗಿ, ಮಹಿಳಾ ಕ್ರಿಕೆಟ್ಗೆ ಶಾಂತಾ ರಂಗಸ್ವಾಮಿ ಅಪಾರ ಸಾಧನೆ ನೀಡಿದ್ದಾರೆ.
ಇದನ್ನು ಓದಿದ್ದೀರಾ? ಲಾರಾ ಮೇಲಿನ ಗೌರವದಿಂದ 400ರ ಗಡಿ ಸಮೀಪಿಸಲಿಲ್ಲ; 367 ರನ್ ಸಿಡಿಸಿದ ವಿಯಾನ್ ಮುಲ್ಡರ್ ಮಾತು
BCCI ಅಧೀನಕ್ಕೆ ಬಂದ ನಂತರದ ಹೊಸ ಯುಗ
2006ರಲ್ಲಿ ಒಂದು ದೊಡ್ಡ ಬದಲಾವಣೆಯಾಯಿತು. WCAIಯನ್ನು BCCI ಅಧೀನಕ್ಕೆ ತೆಗೆದುಕೊಂಡಿತು. ಇದು ಮಹಿಳಾ ಕ್ರಿಕೆಟ್ಗೆ ಹೊಸ ಆಯಾಮ ನೀಡಿತು. ಮೊದಲು ಆರ್ಥಿಕ ನೆರವು ಹೆಚ್ಚಾಯಿತು. ಆಟಗಾರ್ತಿಯರಿಗೆ ವೇತನ, ತರಬೇತಿ ಶಿಬಿರಗಳು, ವೃತ್ತಿಪರ ಕೋಚ್ಗಳು ಸಿಕ್ಕವು. ಸೌಲಭ್ಯಗಳು ಸುಧಾರಿಸಿದವು. ಇವುಗಳಲ್ಲಿ ಉತ್ತಮ ಮೈದಾನಗಳು, ಜಿಮ್, ಫಿಸಿಯೋಥೆರಪಿ ಇತ್ಯಾದಿ ಒಳಗೊಂಡಿದ್ದವು. ಈ ಬದಲಾವಣೆಯ ಪರಿಣಾಮವು ಪ್ರಯೋಜನಕಾರಿಯಾಯಿತು. ತಂಡದ ಗುಣಮಟ್ಟ ಹೆಚ್ಚಾಯಿತು. 2022ರಲ್ಲಿ BCCI ಪುರುಷ ಮತ್ತು ಮಹಿಳಾ ಆಟಗಾರರಿಗೆ ಸಮಾನ ಸಂಭಾವನೆ ಘೋಷಿಸಿತು. ಇದು ಲಿಂಗ ಸಮಾನತೆಯ ದೊಡ್ಡ ಹೆಜ್ಜೆಯಾಯಿತು. ಇದರಿಂದ ಮಹಿಳಾ ಆಟಗಾರ್ತಿಯರು ವೃತ್ತಿಪರವಾಗಿ ಕ್ರಿಕೆಟ್ ಅನ್ನು ಆರಿಸಿಕೊಳ್ಳಲು ಸಾಧ್ಯವಾಯಿತು. ಹಿಂದೆ ಅವರು ಉದ್ಯೋಗ ಮಾಡುತ್ತಾ ಆಡುತ್ತಿದ್ದರು, ಈಗ ಕ್ರಿಕೆಟ್ ಅವರ ಮುಖ್ಯ ವೃತ್ತಿಯಾಯಿತು. BCCIಯ ಬೆಂಬಲದಿಂದ ದೇಶೀಯ ಟೂರ್ನಮೆಂಟ್ಗಳು ಹೆಚ್ಚಾದವು. ಉದಾಹರಣೆಗೆ, ಸೀನಿಯರ್ ವಿಮೆನ್ಸ್ ಟ್ರೋಫಿ, ಚಾಲೆಂಜರ್ ಟ್ರೋಫಿ ಇತ್ಯಾದಿ. ಇದು ಯುವ ಆಟಗಾರ್ತಿಯರಿಗೆ ಅವಕಾಶ ನೀಡಿತು. ಸಾಮಾಜಿಕವಾಗಿ ಕೂಡ ಬದಲಾವಣೆಯಾಯಿತು. ಬಾಲಕಿಯರು ಕ್ರಿಕೆಟ್ ಕಲಿಯಲು ಶಾಲೆಗಳು ಮತ್ತು ಅಕಾಡೆಮಿಗಳು ಹೆಚ್ಚಾದವು.
ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಸಾಧನೆಗಳು
ಭಾರತೀಯ ಮಹಿಳಾ ತಂಡದ ಸಾಧನೆಗಳು ಅನೇಕ. 2005ರ ಮಹಿಳಾ ವಿಶ್ವಕಪ್ನಲ್ಲಿ ಮೊದಲ ಬಾರಿಗೆ ಫೈನಲ್ ತಲುಪಿತು. ಆಗ ಮಿಥಾಲಿ ರಾಜ್ ನೇತೃತ್ವದಲ್ಲಿ ತಂಡ ಉತ್ತಮವಾಗಿ ಆಡಿತು, ಆದರೆ ಆಸ್ಟ್ರೇಲಿಯಾ ವಿರುದ್ಧ ಪರಾಭವಗೊಂಡಿತು. ಇದು ಭಾರತದಲ್ಲಿ ಮಹಿಳಾ ಕ್ರಿಕೆಟ್ಗೆ ಹೊಸ ಮೆರುಗು ನೀಡಿತು. 2017ರ ವಿಶ್ವಕಪ್ನಲ್ಲಿ ಮತ್ತೊಂದು ಮೈಲಿಗಲ್ಲು. ಮಿಥಾಲಿ ರಾಜ್ ನಾಯಕತ್ವದಲ್ಲಿ ತಂಡ ಫೈನಲ್ ತಲುಪಿತು. ಇಂಗ್ಲೆಂಡ್ ವಿರುದ್ಧ ಸೋತರೂ, ಪ್ರದರ್ಶನ ಅದ್ಭುತವಾಗಿತ್ತು. ಮಿಥಾಲಿ ರಾಜ್ ಅವರ ಶತಕಗಳು, ಜೂಲನ್ ಗೋಸ್ವಾಮಿ ಅವರ ಬೌಲಿಂಗ್ – ಎಲ್ಲವೂ ಮೆಚ್ಚುಗೆಗೆ ಪಾತ್ರವಾಯಿತು. ಈ ವಿಶ್ವಕಪ್ ನಂತರ ಭಾರತದಲ್ಲಿ ಮಹಿಳಾ ಕ್ರಿಕೆಟ್ಗೆ ಅಭಿಮಾನಿಗಳ ಸಂಖ್ಯೆ ಹೆಚ್ಚಾಯಿತು.
2020ರ ಟಿ20 ವಿಶ್ವಕಪ್ನಲ್ಲಿ ಹರ್ಮನ್ಪ್ರೀತ್ ಕೌರ್ ನೇತೃತ್ವದ ತಂಡ ಫೈನಲ್ ತಲುಪಿತು. ಆಸ್ಟ್ರೇಲಿಯಾ ವಿರುದ್ಧ ಸೋತರೂ, ಶಫಾಲಿ ವರ್ಮಾ ಅವರ ಸ್ಫೋಟಕ ಬ್ಯಾಟಿಂಗ್ ಕ್ರಿಕೆಟ್ ಜಗತ್ತನ್ನು ಆಶ್ಚರ್ಯಗೊಳಿಸಿತು. ಟೀಂ ಇಂಡಿಯಾ 2022ರ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ರಜತ ಪದಕ ಗೆದ್ದಿತು. ಇದು ಮಹಿಳಾ ಕ್ರಿಕೆಟ್ಗೆ ಅಂತಾರಾಷ್ಟ್ರೀಯ ಮನ್ನಣೆ ತಂದಿತು. 2025ರಲ್ಲಿ ಭಾರತೀಯ ಮಹಿಳಾ ತಂಡ ಅದ್ಭುತ ಪ್ರದರ್ಶನ ನೀಡಿದೆ. ಮೊದಲು ಇಂಗ್ಲೆಂಡ್ ಪ್ರವಾಸದಲ್ಲಿ ತ್ರಿಕೋನ ಸರಣಿಯನ್ನು 2-1ರಿಂದ ಗೆದ್ದರು. ಹರ್ಮನ್ಪ್ರೀತ್ ಕೌರ್ ಅವರ ನಾಯಕತ್ವದಲ್ಲಿ ತಂಡ ಉತ್ತಮ ಪ್ರದರ್ಶನ ತೋರಿತು. ಏಕದಿನ ಸರಣಿ ಕೂಡ 2-1ರಿಂದ ಗೆದ್ದರು. ಕೌರ್ ಅವರ ಶತಕ ಗಮನ ಸೆಳೆದಿತ್ತು. ಇದು ಇಂಗ್ಲೆಂಡ್ನ ತವರಿನಲ್ಲಿ ಮೊದಲ ಬಾರಿಗೆ ಸರಣಿ ಗೆಲುವು.
ಮಾರ್ಚ್ನಲ್ಲಿ ನಡೆದ WPL 2025ರಲ್ಲಿ ಮುಂಬೈ ಇಂಡಿಯನ್ಸ್ ಚಾಂಪಿಯನ್ ಆದರು. ಫೈನಲ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಅನ್ನು 8 ರನ್ಗಳಿಂದ ಸೋಲಿಸಿದರು. ಹರ್ಮನ್ಪ್ರೀತ್ ಕೌರ್ ನಾಯಕತ್ವದ ತಂಡ ಉತ್ತಮವಾಗಿ ಆಡಿತು. ನ್ಯಾಟ್ ಸಿವರ್-ಬ್ರಂಟ್ ಅವರ ಬೌಲಿಂಗ್ ಮುಖ್ಯವಾಯಿತು. ಈ ಲೀಗ್ ಯುವ ಆಟಗಾರ್ತಿಯರಿಗೆ ಅವಕಾಶ ನೀಡಿತು ಮತ್ತು ಸಂಭಾವನೆ ಹೆಚ್ಚಿಸಿತು. ಅಕ್ಟೋಬರ್ನಿಂದ ಭಾರತದಲ್ಲಿ ನಡೆಯುತ್ತಿರುವ ICC ಮಹಿಳಾ ವಿಶ್ವಕಪ್ನಲ್ಲಿ ಭಾರತ ಐತಿಹಾಸಿಕ ಸಾಧನೆ ಮಾಡಿದೆ. ಸೆಮಿಫೈನಲ್ನಲ್ಲಿ ಆಸ್ಟ್ರೇಲಿಯಾವನ್ನು 5 ವಿಕೆಟ್ಗಳಿಂದ ಸೋಲಿಸಿ ಫೈನಲ್ ಪ್ರವೇಶಿಸಿದೆ. ದಕ್ಷಿಣ ಆಫ್ರಿಕಾದೊಂದಿಗೆ ಫೈನಲ್ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಸೆಣಸಲಿದ್ದಾರೆ. ಇದು ಭಾರತದ ಮೂರನೇ ವಿಶ್ವಕಪ್ ಫೈನಲ್. ಈ ಸಾಧನೆಗಳು ತಂಡದ ಆತ್ಮವಿಶ್ವಾಸವನ್ನು ಹೆಚ್ಚಿಸಿವೆ. ಸ್ಮೃತಿ ಮಂಧಾನ, ದೀಪ್ತಿ ಶರ್ಮಾ, ಶಫಾಲಿ ವರ್ಮಾ ಅವರ ಪ್ರದರ್ಶನಗಳು ಉನ್ನತ ಮಟ್ಟದಲ್ಲಿವೆ. ದೀಪ್ತಿ ODI ಬೌಲಿಂಗ್ ಶ್ರೇಣಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ.
ಮಹಿಳಾ ಪ್ರೀಮಿಯರ್ ಲೀಗ್ (WPL)ಯ ಪ್ರಭಾವ
ಸೌರವ್ ಗಂಗೂಲಿ ಅವರ ನೇತೃತ್ವದಲ್ಲಿ 2023ರಲ್ಲಿ WPL ಆರಂಭವಾಯಿತು, ಇದು ಮಹಿಳಾ ಕ್ರಿಕೆಟ್ನ್ನು ಜನಪ್ರಿಯಗೊಳಿಸಿತು. ದು ಮಹಿಳಾ ಕ್ರಿಕೆಟ್ನಲ್ಲಿ ಕ್ರಾಂತಿ ತಂದಿತು. ಪುರುಷರ IPLಯಂತೆ, ಇದು ದೇಶೀಯ ಮತ್ತು ವಿದೇಶಿ ಆಟಗಾರರನ್ನು ಒಟ್ಟುಗೂಡಿಸುತ್ತದೆ. 2023ರಲ್ಲಿ ಮುಂಬೈ ಇಂಡಿಯನ್ಸ್ ಗೆದ್ದರು, 2024ರಲ್ಲಿ RCB ಮತ್ತು 2025ರಲ್ಲಿ ಮತ್ತೆ ಮುಂಬೈ. ಈ ಲೀಗ್ ಆಟಗಾರ್ತಿಯರಿಗೆ ಉತ್ತಮ ಸಂಭಾವನೆ ನೀಡುತ್ತದೆ. ಉದಾಹರಣೆಗೆ, 2025ರ ಹರಾಜಿನಲ್ಲಿ ಸಿಮ್ರಾನ್ ಶೇಕ್ 1.90 ಕೋಟಿ ರೂಪಾಯಿಗೆ ಹರಾಜಾದರು. WPLಯು ಆಟದ ಗುಣಮಟ್ಟ ಹೆಚ್ಚಿಸಿದೆ. ಯುವ ಆಟಗಾರ್ತಿಯರು ವಿದೇಶಿ ಸ್ಟಾರ್ಗಳೊಂದಿಗೆ ಆಡಿ ಕಲಿಯುತ್ತಾರೆ. ಕರ್ನಾಟಕದ ನಿಕಿ ಪ್ರಸಾದ್ ಮತ್ತು ರಾಜೇಶ್ವರಿ ಗಾಯಕ್ವಾಡ್ ಅವರು ವಿವಿಧ ತಂಡಗಳಲ್ಲಿ ಮಿಂಚಿದರು. ಈ ಲೀಗ್ ಅಭಿಮಾನಿಗಳನ್ನು ಆಕರ್ಷಿಸಿದೆ. ಇದು ಗ್ರಾಮೀಣ ಆಟಗಾರರಿಗೂ ಸ್ಫೂರ್ತಿಯಾಗಿದೆ.
ಆಟಗಾರರ ವೈಯಕ್ತಿಕ ಸಾಧನೆಗಳು
ಮಹಿಳಾ ಕ್ರಿಕೆಟ್ನಲ್ಲಿ ಹಲವು ಸ್ಫೂರ್ತಿದಾಯಕ ಕಥೆಗಳಿವೆ. ಮಿಥಾಲಿ ರಾಜ್ ಅವರನ್ನು “ಲೇಡಿ ಸಚಿನ್” ಎಂದು ಕರೆಯುತ್ತಾರೆ. ಅವರು 10,000ಕ್ಕೂ ಹೆಚ್ಚು ಅಂತರರಾಷ್ಟ್ರೀಯ ರನ್ ಗಳಿಸಿದ್ದಾರೆ. ಜೂಲನ್ ಗೋಸ್ವಾಮಿ ಅವರು ವಿಶ್ವದ ಅತ್ಯುತ್ತಮ ಬೌಲರ್ ಆಗಿದ್ದು 255 ODI ವಿಕೆಟ್ಗಳೊಂದಿಗೆ ನಿವೃತ್ತಿ ಹೊಂದಿದರು. ಹರ್ಮನ್ಪ್ರೀತ್ ಕೌರ್ ಅವರ ಕಥೆಯು ಹೋರಾಟದದ್ದು. ಪಂಜಾಬ್ನ ಗ್ರಾಮದಿಂದ ಬಂದ ಅವರು, ಪೋಷಕರ ಬೆಂಬಲದಿಂದ ಟೀಂ ಇಂಡಿಯಾದ ನಾಯಕಿಯಾಗುವವಗೂ ಬೆಳೆದಿದ್ದಾರೆ. 2017ರ ವಿಶ್ವಕಪ್ ಸೆಮಿಫೈನಲ್ನಲ್ಲಿ ಅವರ ಅಜೇಯ 171 ರನ್ ಐತಿಹಾಸಿಕ. ಸ್ಮೃತಿ ಮಂಧಾನ ಅವರು ಸ್ಟೈಲಿಶ್ ಬ್ಯಾಟರ್, ಅವರ ಶತಕಗಳು ಅಭಿಮಾನಿಗಳನ್ನು ಆಕರ್ಷಿಸುತ್ತವೆ. ಯುವ ಆಟಗಾರ್ತಿಯರು ಕೂಡ ಇತ್ತೀಚಿನ ದಿನಗಳಲ್ಲಿ ಮಿಂಚುತ್ತಿದ್ದಾರೆ. ಶಫಾಲಿ ವರ್ಮಾ 16 ವರ್ಷದಲ್ಲಿ ತಂಡಕ್ಕೆ ಆಯ್ಕೆಯಾಗಿ ಸ್ಫೋಟಕ ಬ್ಯಾಟಿಂಗ್ಗೆ ಪ್ರಸಿದ್ಧರಾದರು. ರಾಜಸ್ಥಾನದ ಸುಶೀಲಾ ಮೀನಾ ಅವರ ಬೌಲಿಂಗ್ ವಿಡಿಯೋವನ್ನು ಸಚಿನ್ ತೆಂಡೂಲ್ಕರ್ ಕೂಡ ಮೆಚ್ಚಿದ್ದರು. ಈ ಕಥೆಗಳು ದೇಶದ ಕ್ರೀಡಾ ಪ್ರತಿಭೆಗಳಿಗೆ ಸ್ಫೂರ್ತಿ ನೀಡುತ್ತವೆ.
ಸವಾಲುಗಳೂ ಇವೆ
ಮಹಿಳಾ ಕ್ರಿಕೆಟ್ ಸಮಾಜದಲ್ಲಿ ಬದಲಾವಣೆ ತಂದಿದೆ. ಇದು ಮಹಿಳೆಯರನ್ನು ಸಬಲಕರಣಗೊಳಿಸುತ್ತದೆ. ಬಾಲಕಿಯರು ಕ್ರೀಡೆಯಲ್ಲಿ ಭಾಗವಹಿಸುವುದು ಹೆಚ್ಚಿದೆ. ಗ್ರಾಮೀಣ ಪ್ರದೇಶಗಳ ಶಾಲೆಗಳು ಕ್ರಿಕೆಟ್ ಕಲಿಸುತ್ತಿವೆ. BCCI ಮತ್ತು ರಾಜ್ಯ ಸರ್ಕಾರಗಳು ಇದಕ್ಕೆ ಬೆಂಬಲ ನೀಡುತ್ತಿವೆ. ಎಕ್ಸ್, ಇನ್ಸ್ಟಾಗ್ರಾಂನಲ್ಲಿ ಆಟಗಾರರ ಪೋಸ್ಟ್ಗಳು ಲಕ್ಷಾಂತರ ಜನರನ್ನು ತಲುಪುತ್ತವೆ. ವೀಕ್ಷಕರ ಸಂಖ್ಯೆ ಹೆಚ್ಚಿದೆ. ಮಹಿಳಾ ಕ್ರಿಕೆಟ್ ಹೆಚ್ಚು ಪ್ರಗತಿ ಸಾಧಿಸಿದರೂ ಹಲವು ಸವಾಲುಗಳಿವೆ. ದೇಶೀಯ ವ್ಯವಸ್ಥೆಯನ್ನು ಇನ್ನೂ ಸುಧಾರಿಸಬೇಕಿದೆ. ಗ್ರಾಮೀಣ ಪ್ರತಿಭೆಗಳಿಗೆ ಅವಕಾಶ ಕಡಿಮೆಯಿದೆ. ಪುರುಷರ ಕ್ರಿಕೆಟ್ಗೆ ಹೋಲಿಸಿದರೆ ಪ್ರಚಾರ ಮತ್ತು ಪ್ರಾಯೋಜಕತ್ವ ಕಡಿಮೆ. ಆಟಗಾರರ ಆರೋಗ್ಯ ನಿರ್ವಹಣೆ ಅಗತ್ಯ. ಆದರೂ ಭಾರತೀಯ ಮಹಿಳಾ ಕ್ರಿಕೆಟ್ ಯಶಸ್ಸಿಗೆ ಸಾಗಿದೆ. ಶಾಂತಾ ರಂಗಸ್ವಾಮಿ ಅವರಂತಹ ಕನ್ನಡಿಗರ ಕೊಡುಗೆಯಿಂದ ಹಿಡಿದು 2025ರ ಸಾಧನೆಗಳವರೆಗೆ, ಇದು ಹೊಸ ಸಾಧನೆಯನ್ನು ಸೃಷ್ಟಿಸಿದೆ.
