ಇಂಗ್ಲಿಷ್ ಪ್ರೀಮಿಯರ್ ಲೀಗ್ ಕ್ಲಬ್ ವೆಸ್ಟ್ ಹ್ಯಾಮ್ ಯುನೈಟೆಡ್ ತಂಡದ ನಾಲ್ಕು ದಶಕಗಳ ಟ್ರೋಫಿ ಬರ ಕೊನೆಗೂ ನೀಗಿದೆ.
ಯುರೋಪಾ ಕಾನ್ಫರೆನ್ಸ್ ಲೀಗ್ ಫೈನಲ್ ಪಂದ್ಯದಲ್ಲಿ ಫಿಯೊರೆಂಟಿನಾ ತಂಡವನ್ನು 2-1 ಗೋಲುಗಳ ಅಂತರದಲ್ಲಿ ರೋಚಕವಾಗಿ ಮಣಿಸಿದ ವೆಸ್ಟ್ ಹ್ಯಾಮ್, 43 ವರ್ಷಗಳ ಬಳಿಕ ಮೊದಲ ಬಾರಿಗೆ ಯುರೋಪ್ ಫುಟ್ಬಾಲ್ ಟೂರ್ನಿಯೊಂದರಲ್ಲಿ ಚಾಂಪಿಯನ್ ಪಟ್ಟವನ್ನೇರಿದೆ.
ಜೆಕ್ ಗಣರಾಜ್ಯದ ರಾಜಧಾನಿ ಪ್ರಾಗ್ನಲ್ಲಿ ನಡೆದ ಫೈನಲ್ ಪಂದ್ಯದ ಪೂರ್ಣಾವಧಿಯ ಅಂತಿಮ ನಿಮಿಷದಲ್ಲಿ (90) ಜರೋಡ್ ಬೋವೆನ್ ಗಳಿಸಿದ ಗೋಲು ವೆಸ್ಟ್ ಹ್ಯಾಮ್ ತಂಡಕ್ಕೆ 1980ರ ಬಳಿಕ ಮೊದಲ ಟ್ರೋಫಿ ತಂದುಕೊಟ್ಟಿತು.
2022/23ನೇ ಸಾಲಿನ ಯುರೋಪಾ ಕಾನ್ಫರೆನ್ಸ್ ಲೀಗ್ ಟೂರ್ನಿಯಲ್ಲಿ ಫೈನಲ್ ಸೇರಿದಂತೆ ಒಟ್ಟು 13 ಪಂದ್ಯಗಳನ್ನಾಡಿರುವ ವೆಸ್ಟ್ ಹ್ಯಾಮ್. ಒಂದೇ ಒಂದು ಸೋಲು ಕಾಣದೆ ಚಾಂಪಿಯನ್ ಪಟ್ಟ ಅಲಂಕರಿಸಿದೆ.
ಪಂದ್ಯದ 62ನೇ ನಿಮಿಷದಲ್ಲಿ ದೊರೆತ ಪೆನಾಲ್ಟಿ ಅವಕಾಶವನ್ನು ಗೋಲಾಗಿ ಪರಿವರ್ತಿಸಿದ್ದ ಸೈದ್ ಬೆನ್ರಹ್ಮಾ, ವೆಸ್ಟ್ ಹ್ಯಾಮ್ ತಂಡಕ್ಕೆ ಮುನ್ನಡೆ ತಂದುಕೊಟ್ಟಿದ್ದರು. ಆದರೆ 67ನೇ ನಿಮಿಷದಲ್ಲಿ ಜಿಯಾಕೊಮೊ ಬೊನಾವೆಂಟುರಾ ಗೋಲಿನ ಮೂಲಕ ಫಿಯೊರೆಂಟಿನಾ ತಂಡ ಸಮಬಲ ಸಾಧಿಸಿತ್ತು. UEFA Europa Conference League: Bowen late goal helps West Ham clinch title
