ಟಿಕ್ಟಾಕ್ನ ರೀಲ್ಗಳು, ಇನ್ಸ್ಟಾಗ್ರಾಮ್ನ ಫಿಲ್ಟರ್ಗಳು ಮತ್ತು ಸ್ನ್ಯಾಪ್ಚಾಟ್ನ ಕ್ಷಣಿಕ ಸಂದೇಶಗಳ ಜಾಲದಲ್ಲಿ ಸಿಲುಕಿ ತಮ್ಮ ಅಮೂಲ್ಯ ಬಾಲ್ಯ ಮತ್ತು ಹದಿಹರೆಯದ ಅವಧಿಯನ್ನು ಕಳೆದುಕೊಳ್ಳುತ್ತಿರುವ ಶಾಲಾ ಮಕ್ಕಳನ್ನು ರಕ್ಷಿಸಲು ಆಸ್ಟ್ರೇಲಿಯಾ ಸರ್ಕಾರವು ಇತ್ತೀಚೆಗೆ ಐತಿಹಾಸಿಕ ಹೆಜ್ಜೆಯನ್ನಿಟ್ಟಿದೆ. ಇದು ಕೇವಲ ಕಾನೂನು ರೂಪಿಸುವಿಕೆಯಲ್ಲ, ಬದಲಿಗೆ ಹದಿಹರೆಯದವರ ಮಾನಸಿಕ ಆರೋಗ್ಯ ಮತ್ತು ಸುರಕ್ಷತೆಯ ಹಿತದೃಷ್ಟಿಯಿಂದ ಜಗತ್ತೇ ಸೂಕ್ಷ್ಮವಾಗಿ ಗಮನಿಸುತ್ತಿರುವ ಒಂದು ಸಾಮಾಜಿಕ ಪ್ರಯೋಗವಾಗಿದೆ.
ನಾಳೆಯಿಂದ (ಡಿಸೆಂಬರ್ 10) ಜಾರಿಗೆ ಬರುವ ಆನ್ಲೈನ್ ಸುರಕ್ಷತಾ ತಿದ್ದುಪಡಿ (ಸಾಮಾಜಿಕ ಮಾಧ್ಯಮ ಕನಿಷ್ಠ ವಯಸ್ಸು) ಕಾಯ್ದೆ 2024ರ ಅಡಿಯಲ್ಲಿ, 16 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಆಸ್ಟ್ರೇಲಿಯಾದ ಮಕ್ಕಳು ಪ್ರಮುಖ ಸಾಮಾಜಿಕ ಜಾಲತಾಣಗಳಾದ ಟಿಕ್ಟಾಕ್, ಇನ್ಸ್ಟಾಗ್ರಾಮ್, ಫೇಸ್ಬುಕ್, ಸ್ನ್ಯಾಪ್ಚಾಟ್, ಯೂಟ್ಯೂಬ್, ಎಕ್ಸ್ (ಟ್ವಿಟರ್), ರೆಡ್ಡಿಟ್, ಟ್ವಿಚ್ (Twitch) ಗಳಲ್ಲಿ ಖಾತೆ ಹೊಂದುವಂತಿಲ್ಲ.
ಏಕೆ ಈ ನಿರ್ಧಾರ?
ಆಸ್ಟ್ರೇಲಿಯಾ ಸರ್ಕಾರ ಈ ಕಠಿಣ ಕ್ರಮಕ್ಕೆ ಮುಂದಾಗಲು ಮುಖ್ಯ ಕಾರಣವೆಂದರೆ ಹದಿಹರೆಯದ ಮಕ್ಕಳಲ್ಲಿ ಹೆಚ್ಚುತ್ತಿರುವ ಮಾನಸಿಕ ಆರೋಗ್ಯ ಸಮಸ್ಯೆಗಳು. ಸ್ಕ್ರೀನ್ ಟೈಮ್ ಹೆಚ್ಚಾದಂತೆ ಆತಂಕ, ಖಿನ್ನತೆ ಮತ್ತು ಆತ್ಮಹತ್ಯಾ ಪ್ರವೃತ್ತಿ ಗಣನೀಯವಾಗಿ ಏರಿಕೆಯಾಗುತ್ತಿರುವುದು ದತ್ತಾಂಶಗಳಿಂದ ದೃಢಪಟ್ಟಿದೆ.
ಆಘಾತಕಾರಿ ಅಂಕಿಅಂಶ: ತಜ್ಞರ ವರದಿಗಳ ಪ್ರಕಾರ, ಕಳೆದ ಐದು ವರ್ಷಗಳಲ್ಲಿ ಆಸ್ಟ್ರೇಲಿಯಾದಲ್ಲಿ 15-17 ವರ್ಷ ವಯಸ್ಸಿನವರ ಆತ್ಮಹತ್ಯೆ ಪ್ರಮಾಣವು ಶೇ. 13ರಷ್ಟು ಏರಿಕೆಯಾಗಿದೆ. ಮಾನಸಿಕ ಆರೋಗ್ಯ ತಜ್ಞರು ಈ ಹೆಚ್ಚಳಕ್ಕೆ ಅತಿಯಾದ ಸಾಮಾಜಿಕ ಜಾಲತಾಣ ಬಳಕೆಯನ್ನೇ ಪ್ರಮುಖವಾಗಿ ದೂಷಿಸಿದ್ದಾರೆ.
ಈ ಕಾಯ್ದೆಯನ್ನು ಪ್ರಕಟಿಸುವಾಗ ಆಸ್ಟ್ರೇಲಿಯಾದ ಪ್ರಧಾನಿ ಆಂಥೋನಿ ಅಲ್ಬಾನೀಸ್, “ಇದು ಬಾಲ್ಯವನ್ನು ರಕ್ಷಿಸುವ ಮತ್ತು ತಮ್ಮ ಮಕ್ಕಳಿಗೆ ಸರಿಯಾದ ಮಾರ್ಗದರ್ಶನ ನೀಡಲು ಪೋಷಕರಿಗೆ ಬೇಕಾದ ಸಾಧನಗಳನ್ನು ಒದಗಿಸುವ ಪ್ರಯತ್ನವಾಗಿದೆ” ಎಂದು ಹೇಳಿದ್ದಾರೆ.
ಇ-ಸುರಕ್ಷತಾ ಆಯುಕ್ತರ ವರದಿ: ಆಸ್ಟ್ರೇಲಿಯಾದ ಇ-ಸುರಕ್ಷತಾ ಆಯುಕ್ತ ಜೂಲಿ ಇನ್ಮನ್ ಗ್ರಾಂಟ್ ಅವರು, ವೇದಿಕೆಗಳ ‘ಹಾನಿಕಾರಕ ಮತ್ತು ವಂಚನಾತ್ಮಕ ವಿನ್ಯಾಸದ ವೈಶಿಷ್ಟ್ಯಗಳು’ ವಯಸ್ಕರಿಗೂ ನಿಯಂತ್ರಿಸಲಾಗದಷ್ಟು ಶಕ್ತಿಯುತವಾಗಿವೆ. “ಹಾಗಾದರೆ ನಮ್ಮ ಮಕ್ಕಳ ಭವಿಷ್ಯವೇನು?” ಎಂದು ಪ್ರಶ್ನಿಸಿದ್ದಾರೆ. 13-15 ವರ್ಷದೊಳಗಿನ ಒಂದು ಮಿಲಿಯನ್ಗಿಂತಲೂ ಹೆಚ್ಚು ಆಸ್ಟ್ರೇಲಿಯಾದ ಮಕ್ಕಳು ಈ ವೇದಿಕೆಗಳನ್ನು ಬಳಸುತ್ತಿದ್ದಾರೆಂದು ಅಂದಾಜಿಸಲಾಗಿದೆ.
ಕಡ್ಡಾಯ ಕನಿಷ್ಠ ವಯಸ್ಸು: 16 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಈ ನಿಷೇಧಿತ ವೇದಿಕೆಗಳಲ್ಲಿ ಖಾತೆ ತೆರೆಯುವುದನ್ನು ಮತ್ತು ನಿರ್ವಹಿಸುವುದನ್ನು ತಡೆಯಲು ‘ಸಮಂಜಸವಾದ ಕ್ರಮಗಳನ್ನು’ ತೆಗೆದುಕೊಳ್ಳುವುದು ಸಾಮಾಜಿಕ ಮಾಧ್ಯಮ ಕಂಪನಿಗಳಿಗೆ ಕಡ್ಡಾಯವಾಗಿದೆ.
ದಂಡ: ನಿಯಮಗಳನ್ನು ಪಾಲಿಸದ ಸಾಮಾಜಿಕ ಜಾಲತಾಣಗಳ ಮಾಲೀಕತ್ವದ ಕಂಪನಿಗಳಿಗೆ 49.5 ಮಿಲಿಯನ್ ಆಸ್ಟ್ರೇಲಿಯನ್ ಡಾಲರ್ಗಳವರೆಗೆ (ಸುಮಾರು 290 ಕೋಟಿ ರೂ.) ದಂಡ ವಿಧಿಸಲಾಗುತ್ತದೆ.
ವಯಸ್ಸಿನ ಪರಿಶೀಲನೆ: ವಯಸ್ಸಿನ ಪರಿಶೀಲನೆಗಾಗಿ ಫೋಟೋ ಅಥವಾ ವಿಡಿಯೊ ಆಧಾರಿತ ಅಂದಾಜು, ಐಡಿ ಪರಿಶೀಲನೆ ಸೇರಿದಂತೆ ಹಲವು ಮಾರ್ಗಗಳನ್ನು ಬಳಸಲು ವೇದಿಕೆಗಳಿಗೆ ಅವಕಾಶ ನೀಡಲಾಗಿದೆ. ಆದಾಗ್ಯೂ, ಗುರುತಿನ ಚೀಟಿಯನ್ನು ಕಡ್ಡಾಯಗೊಳಿಸದೇ ಪರ್ಯಾಯ ವ್ಯವಸ್ಥೆ ಒದಗಿಸುವುದು ಮುಖ್ಯ.
ಯುವಜನರಿಗೆ ಶಿಕ್ಷೆ ಇಲ್ಲ: ಈ ಕಾನೂನು ಉಲ್ಲಂಘನೆ ಮಾಡಿದರೆ ಮಕ್ಕಳು ಅಥವಾ ಅವರ ಪೋಷಕರಿಗೆ ಯಾವುದೇ ದಂಡ ಅಥವಾ ಶಿಕ್ಷೆ ವಿಧಿಸುವುದಿಲ್ಲ. ಶಿಕ್ಷೆ ಕೇವಲ ವೇದಿಕೆಗಳನ್ನು ನಿರ್ವಹಿಸುವ ಟೆಕ್ ಕಂಪನಿಗಳಿಗೆ ಮಾತ್ರ.
ಟೆಕ್ ದೈತ್ಯರ ಅನುಸರಣೆ ಮತ್ತು ಆಕ್ಷೇಪಣೆ
ಮೊದಲಿಗೆ ವಿರೋಧ ವ್ಯಕ್ತಪಡಿಸಿದ್ದರೂ, ಕಾನೂನು ಜಾರಿಯಾದ ನಂತರ ಮೆಟಾ (ಫೇಸ್ಬುಕ್, ಇನ್ಸ್ಟಾಗ್ರಾಮ್), ಸ್ನ್ಯಾಪ್ಚಾಟ್ ಮತ್ತು ಟಿಕ್ಟಾಕ್ ಸೇರಿದಂತೆ ಎಲ್ಲ ಪ್ರಮುಖ ಕಂಪನಿಗಳು ಈ ನಿಯಮಗಳನ್ನು ಅನುಸರಿಸಲು ಒಪ್ಪಿಕೊಂಡಿವೆ.
ಮೆಟಾ ಮತ್ತು ಸ್ನ್ಯಾಪ್ಚಾಟ್: ಈ ಕಂಪನಿಗಳು ಈಗಾಗಲೇ 16 ವರ್ಷದೊಳಗಿನವರು ಎಂದು ನಂಬಲಾದ ಲಕ್ಷಾಂತರ ಖಾತೆಗಳನ್ನು ನಿಷ್ಕ್ರಿಯಗೊಳಿಸಲು ಅಥವಾ ವಯಸ್ಸು ದೃಢೀಕರಿಸಲು ಮುಂದಾಗಿವೆ.
ಯೂಟ್ಯೂಬ್ನ ನಿಲುವು: ಶೈಕ್ಷಣಿಕ ವಿಷಯಕ್ಕಾಗಿ ಯೂಟ್ಯೂಬ್ ಅನ್ನು ವಿನಾಯಿತಿ ನೀಡಲು ಆರಂಭದಲ್ಲಿ ಪರಿಗಣಿಸಲಾಗಿತ್ತು. ಆದರೆ, ‘ಅಪಾಯಕಾರಿ ಅಲ್ಗಾರಿದಮ್ಗಳಿಂದ’ ಮಕ್ಕಳನ್ನು ರಕ್ಷಿಸಲು ಸರ್ಕಾರ ನಿರ್ಧರಿಸಿದ ನಂತರ, ಯೂಟ್ಯೂಬ್ ಕೂಡ ಒಪ್ಪಿದೆ. ಯೂಟ್ಯೂಬ್ ಸಹ ತನ್ನ 16 ವರ್ಷದೊಳಗಿನ ಬಳಕೆದಾರರನ್ನು ಸ್ವಯಂಚಾಲಿತವಾಗಿ ಲಾಗ್ಔಟ್ ಮಾಡಿದೆ. ಅವರು ಸೈನ್ ಇನ್ ಮಾಡದೆ ವಿಡಿಯೋಗಳನ್ನು ವೀಕ್ಷಿಸಬಹುದು, ಆದರೆ ಕಾಮೆಂಟ್, ಲೈಕ್ ಅಥವಾ ಚಂದಾದಾರಿಕೆ ವೈಶಿಷ್ಟ್ಯಗಳನ್ನು ಬಳಸಲು ಸಾಧ್ಯವಿಲ್ಲ.
ನಿಷೇಧದ ಸವಾಲುಗಳು
ಈ ನಿಷೇಧ ಕ್ರಾಂತಿಕಾರಿ ಹೆಜ್ಜೆಯಾಗಿದ್ದರೂ, ಹಲವು ಸವಾಲುಗಳು ಮತ್ತು ಟೀಕೆಗಳನ್ನು ಎದುರಿಸುತ್ತಿದೆ.
ನಿಷೇಧವು ಹದಿಹರೆಯದವರನ್ನು ಇಂಟರ್ನೆಟ್ನ ‘ಡಾರ್ಕ್ ವೆಬ್’ ನಂತಹ ನಿಯಂತ್ರಣವಿಲ್ಲದ ಮತ್ತು ಹೆಚ್ಚು ಅಪಾಯಕಾರಿ ಸ್ಥಳಗಳಿಗೆ ಅಥವಾ ಗೇಮಿಂಗ್ ಚಾಟ್ರೂಮ್ಗಳಿಗೆ ತಳ್ಳಬಹುದು. ಇದು ಸಮಸ್ಯೆಗಳನ್ನು ತೆಗೆದುಹಾಕುವ ಬದಲು ಸ್ಥಳಾಂತರಿಸಬಹುದು.
ಪರಿಶೀಲನೆಯ ಸುಲಭ ಉಲ್ಲಂಘನೆ: ಸಂಶೋಧಕರು, ಮುಖ ಗುರುತಿಸುವಿಕೆ ವ್ಯವಸ್ಥೆಗಳನ್ನು ಸಾಮಾನ್ಯ ಪಾರ್ಟಿ ಮಾಸ್ಕ್ಗಳು ಅಥವಾ ಗೈ ಫಾಕ್ಸ್ ಮಾಸ್ಕ್ಗಳನ್ನು ಬಳಸಿ ಸುಲಭವಾಗಿ ಮೋಸಗೊಳಿಸಬಹುದು ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ. ವಯಸ್ಸನ್ನು ಪರಿಶೀಲಿಸಲು ಇರುವ ವಿಧಾನಗಳ ದುರ್ಬಲತೆಯು ಕಾನೂನಿನ ಪರಿಣಾಮಕಾರಿತ್ವದ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಡಿಜಿಟಲ್ ಕೌಶಲ್ಯಗಳ ಮಿತಿ: ಸಾಮಾಜಿಕ ಜಾಲತಾಣಗಳು ಸೃಜನಾತ್ಮಕ ಅಭಿವ್ಯಕ್ತಿ ಮತ್ತು ಶೈಕ್ಷಣಿಕ ಸಹಯೋಗಕ್ಕೆ ಒಂದು ವೇದಿಕೆಯಾಗಿದೆ. ನಿಷೇಧವು ಈ ಪ್ರಮುಖ ಡಿಜಿಟಲ್ ಕೌಶಲ್ಯಗಳನ್ನು ಬೆಳೆಸಿಕೊಳ್ಳುವ ಅವಕಾಶವನ್ನು ಯುವಜನರಿಂದ ಕಸಿದುಕೊಳ್ಳಬಹುದು ಎಂಬುದು ಮತ್ತೊಂದು ಟೀಕೆ.
ಮಾಹಿತಿ ಕೊರತೆ: ನಿಷೇಧದಿಂದಾಗಿ, ಯುವಜನರು ಸುದ್ದಿ, ರಾಜಕೀಯ ಮತ್ತು ಪ್ರಸ್ತುತ ಘಟನೆಗಳ ಬಗ್ಗೆ ತಿಳಿದುಕೊಳ್ಳುವಲ್ಲಿ ಹಿಂದುಳಿಯಬಹುದು ಎಂಬ ಕಳವಳವೂ ವ್ಯಕ್ತವಾಗಿದೆ.
ಜಾಗತಿಕ ಪರಿಣಾಮ
ಆಸ್ಟ್ರೇಲಿಯಾದ ಈ ಕ್ರಮವನ್ನು ವಿಶ್ವದಾದ್ಯಂತದ ಸರ್ಕಾರಗಳು ಬಹಳ ಆಸಕ್ತಿಯಿಂದ ನೋಡುತ್ತಿವೆ. ಜೂಲಿ ಇನ್ಮನ್ ಗ್ರಾಂಟ್ ಅವರು ಹೇಳುವಂತೆ, ಆಸ್ಟ್ರೇಲಿಯಾ ಈ ಜಾಗತಿಕ ನಿಯಂತ್ರಣದ ಪರ್ವದಲ್ಲಿ ‘ಮೊದಲ ಡಾಮಿನೊ’ ಆಗಬಹುದು. ಯುಕೆ ಮತ್ತು ಐರೋಪ್ಯ ಒಕ್ಕೂಟ ಸೇರಿದಂತೆ ಹಲವು ದೇಶಗಳು ಈಗಾಗಲೇ ಮಕ್ಕಳಿಗೆ ಆನ್ಲೈನ್ ಸುರಕ್ಷತೆಯನ್ನು ಹೆಚ್ಚಿಸುವ ನಿಯಮಗಳನ್ನು ಪರಿಗಣಿಸುತ್ತಿವೆ.
ಭಾರತದಂತಹ 500 ಮಿಲಿಯನ್ಗೂ(50 ಕೋಟಿ) ಹೆಚ್ಚು ಸಾಮಾಜಿಕ ಮಾಧ್ಯಮ ಬಳಕೆದಾರರಿರುವ ದೇಶಗಳಿಗೆ, ಆಸ್ಟ್ರೇಲಿಯಾದ ಈ ಪ್ರಯೋಗವು ಮಹತ್ವದ ಪಾಠಗಳನ್ನು ನೀಡಲಿದೆ. ಸಾಮಾಜಿಕ ಜಾಲತಾಣಗಳ ‘ವ್ಯಸನ’ದಿಂದ ಮಕ್ಕಳನ್ನು ರಕ್ಷಿಸಲು ಕೇವಲ ಪೋಷಕರ ನಿಯಂತ್ರಣ ಸಾಲದು; ಕಠಿಣ ಸರ್ಕಾರಿ ನಿಯಂತ್ರಣಗಳ ಅಗತ್ಯವಿದೆ ಎಂಬುದನ್ನು ಈ ಪ್ರಯೋಗ ಸೂಚಿಸುತ್ತದೆ. ಆಸ್ಟ್ರೇಲಿಯಾದ ಈ ಪ್ರಯೋಗವು ಪ್ರಪಂಚದ ಒಂದು ಭಾಗದಲ್ಲಿ ಹದಿಹರೆಯದವರ ಬಾಲ್ಯವನ್ನು ಡಿಜಿಟಲ್ ಕಪಿಮುಷ್ಟಿಯಿಂದ ಬಿಡಿಸಲು ಒಂದು ದಿಟ್ಟ ಮತ್ತು ಪ್ರಮುಖ ಹೆಜ್ಜೆ ಇಡಲಾಗಿದೆ ಎಂಬುದಂತೂ ಸತ್ಯ.
