ಟ್ವಿಟರ್ ಸಂಸ್ಥೆಯ ಮಾಲೀಕ ಎಲಾನ್ ಮಸ್ಕ್ ಆ್ಯಪ್ ಲೋಗೋ ಹಾಗೂ ಬ್ರಾಂಡ್ ಸ್ವರೂಪವನ್ನು ಬದಲಾಯಿಸಲು ಮುಂದಾಗಿದ್ದಾರೆ.
ಈ ಬಗ್ಗೆ ಇಂದು (ಜುಲೈ 23) ಟ್ವೀಟ್ ಮಾಡಿರುವ ಅವರು, “ಶೀಘ್ರದಲ್ಲೇ ನಾವು ಟ್ವಿಟರ್ ಬ್ರಾಂಡ್ಗೆ ಮತ್ತು ಕ್ರಮೇಣ ಎಲ್ಲ ಪಕ್ಷಿಗಳಿಗೆ ವಿದಾಯ ಹೇಳುತ್ತೇವೆ” ಎಂದಿದ್ದಾರೆ.
ಎಲ್ಲವೂ ಯೋಜನೆಯ ಪ್ರಕಾರ ನಡೆದರೆ ಮುಂಬರುವ ಲೋಗೋವನ್ನು ಇಂದು ರಾತ್ರಿ ಬಹಿರಂಗ ಪಡಿಸಲಾಗುವುದು ಮತ್ತು ನಾಳೆಯಿಂದ ಇದು ಲೈವ್ ಆಗಲಿದೆ. ಪ್ಲಾಟ್ ಫಾರ್ಮ್ ಅನ್ನು ‘ಎಕ್ಸ್’ ಹೆಸರಿನ ಎವೆರಿಥಿಂಗ್ ಆ್ಯಪ್ ಆಗಿ ಪರಿವರ್ತಿಸಲಾಗುವುದು ಎಂದು ಮಸ್ಕ್ ತಿಳಿಸಿದ್ದಾರೆ.
ಕಳೆದ ವರ್ಷ ಟ್ವಿಟರ್ನ ಸ್ವಾಧೀನದ ನಂತರ ಮಸ್ಕ್ ನೂತನ ಯೋಜನೆಗಳ ಬಗ್ಗೆ ಸುಳಿವು ನೀಡಿದ್ದರು. ಸಂಸ್ಥೆಗೆ ನೂತನ ಸಿಇಒ ಆಯ್ಕೆಯಾದ ಬಳಿಕ ಮಹತ್ವದ ಬದಲಾವಣೆಗಳಾಗುತ್ತಿದೆ. ನೂತನ ಟ್ವಿಟರ್ ಕಾರ್ಯಗಳು ಇನ್ನು ಮುಂದೆ ಚೀನಾದ ಮನರಂಜನಾ ಮಾಧ್ಯಮ ವಿ ಚಾಟ್ ರೀತಿ ಕಾರ್ಯನಿರ್ವಹಿಸಲಿದೆ ಎನ್ನಲಾಗುತ್ತಿದೆ.
ಮಸ್ಕ್ ಕಳೆದ ವರ್ಷ ಟ್ವಿಟರ್ ಅನ್ನು 44 ಬಿಲಿಯನ್ ಡಾಲರ್ಗೆ ಖರೀದಿಸಿ, ಕಂಪನಿಯನ್ನು ಎಕ್ಸ್ ಕಾರ್ಪ್ ಎಂಬ ತಮ್ಮದೇ ಸಂಸ್ಥೆಯೊಂದಿಗೆ ವಿಲೀನಗೊಳಿಸಿದ್ದರು.
ಈ ಸುದ್ದಿ ಓದಿದ್ದೀರಾ? ಥ್ರೆಡ್ಸ್: ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಕೋಟಿ ಮಂದಿ ಇನ್ಸ್ಟಾಲ್; ಆ್ಯಪ್ನಲ್ಲಿರುವ ವಿಶೇಷತೆಗಳೇನು?
ಟೆಸ್ಲಾ ಉದ್ಯಮಿ ಮಸ್ಕ್ ಕಳೆದ ವರ್ಷ ಟ್ವಿಟರ್ ಖರೀದಿಸಿದ ನಂತರ ಸಂಸ್ಥೆಯ ಶೇ.50ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ವಜಾಗೊಳಿಸಿ ಹಲವು ಮಾರ್ಪಾಡುಗಳನ್ನು ಮಾಡಿದ ನಂತರವೂ ಸಂಸ್ಥೆ ವೈಫಲ್ಯಗಳನ್ನು ಅನುಭವಿಸಿದೆ. ಜಾಹೀರಾತು ಆದಾಯವು ನಿರಂತರವಾಗಿ ಕುಸಿತಗೊಂಡಿದೆ. ಆದಾಯವನ್ನು ಹೆಚ್ಚಿಸಲು ನೀಲಿ ಲೋಗೊಗಳಿಗೆ ಮಾಸಿಕ 8 ಡಾಲರ್ಗಳ ಚಂದಾದಾರಿಕೆಯನ್ನು ಆರಂಭಿಸಿದ ನಂತರ ಸ್ವಲ್ಪಮಟ್ಟಿಗೆ ಆದಾಯ ಏರಿಕೆ ಕಂಡಿದೆ.
ಮಸ್ಕ್ ಇತ್ತೀಚಿಗಷ್ಟೆ ಹೊಸ ಕೃತಕ ಬುದ್ಧಿಮತ್ತೆ ಕಂಪನಿ xAI ಅನ್ನು ಸ್ಥಾಪಿಸುವುದಾಗಿ ತಿಳಿಸಿದ್ದರು. ಈ ಸಂಸ್ಥೆಯು ಇತರ ಕೃತಕ ಬುದ್ಧಿಮತ್ತೆಗಳಾದ OpenAI ಮತ್ತು ಗೂಗಲ್ನ ‘ಬಾರ್ಡ್’ ಕಂಪನಿಗಳಿಗೆ ಪ್ರತಿಸ್ಪರ್ಧಿಯಾಗಿದೆ.
ಅಲ್ಲದೆ ಪೇಸ್ಬುಕ್ ಮಾಲೀಕ ಮಾರ್ಕ್ ಜುಕರ್ಬರ್ಗ್ ಟ್ವಿಟರ್ ರೀತಿಯಲ್ಲಿಯೇ ಹಲವು ಫೀಚರ್ಗಳಿರುವ ಥ್ರೆಡ್ಸ್’ ಆ್ಯಪ್ ಅನ್ನು ಇತ್ತೀಚಿಗಷ್ಟೆ ಬಿಡುಗಡೆಗೊಳಿಸಿದ್ದರು. ಥ್ರೆಡ್ಸ್ ಆ್ಯಪ್ ಆರಂಭವಾದ ಕೆಲವೇ ದಿನಗಳಲ್ಲಿ ಕೊಟ್ಯಂತರ ಮಂದಿ ಇನ್ಸ್ಟಾಲ್ ಮಾಡಿಕೊಂಡಿದ್ದರು. ಇದು ಶುರುವಾದ ನಂತರ ಮಸ್ಕ್ ಅವರು ಮಾರ್ಕ್ ಜುಕರ್ಬರ್ಗ್ ಅವರೊಂದಿಗೆ ಪೈಪೋಟಿಗೆ ಇಳಿದಿದ್ದಾರೆ.
