ಇಷ್ಟೂ ವರ್ಷ ಕಳೆದರೂ ಸೂಕ್ತ ರಸ್ತೆ ಇಲ್ಲ, ಒಂದೆಕಡೆ ನಿಂತ ಹಿಟಾಚಿ, ಕಾಮಗಾರಿ ಮಾಡಲು ಬಂದಿದ್ದ ಗುತ್ತಿಗೆದಾರ ನಾಪತ್ತೆ, ಎರಡು ವರ್ಷದಿಂದ ನಿಂತಲ್ಲೇ ನಿಂತ ಹಿಟಾಚಿ. ಅಧಿಕಾರಿಗಳು, ಶಾಸಕರು ಬರೀ ನಮಗೆ ಸುಳ್ಳು ಭರವಸೆ ಮಾತ್ರ ಕೊಡುತ್ತಾರಷ್ಟೆ ಗ್ರಾಮಸ್ಥರ ಆರೋಪ.
ಸುಮಾರು ವರ್ಷದಿಂದ ಮಲೆನಾಡಿನ ಭಾಗಗಳಲ್ಲಿ ಮೂಲ ಭೂತ ಸೌಕರ್ಯದಿಂದ ಅದೆಷ್ಟೋ ಗ್ರಾಮಗಳು ವಂಚಿತರಾಗಿದ್ದಾರೆ. ಹಾಗೆಯೇ, ಚಿಕ್ಕಮಗಳೂರು ಜಿಲ್ಲೆಯ ಕಳಸ ತಾಲೂಕಿನ ಕಳಸ, ಇಡಕಣಿ ಮತ್ತು ಮರಸಣಿಗೆ ಈ ಮೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಬರುವ ಬಾಳೆಖಾನ್, ಹಿಂಚಲ್ಲಿ, ಟಾಂಕಿಕಾಡು, ಕೆರೆಮನೆ, ಅಂಕೋಲಮನೆ, ಬಂಗಾರ್ ಕುಡಿಗೆ, ಹೊಳೆಬಾಗಿಲು., ಎಡೂರು, ಕೆ. ಕೆಳಗೂರು, ಹೊಸತೋಟ, ಇನ್ನು ಹಲವಾರು ಗ್ರಾಮಗಳಿಗೆ ಸಂಪರ್ಕ ರಸ್ತೆ ಹಾಗೂ ಕುಡಿಯುವ ನೀರಿನ ವ್ಯವಸ್ಥೆ ಇಲ್ಲದೆ, ಈ ಗ್ರಾಮಗಳಲ್ಲಿ ವಾಸ ಮಾಡುತ್ತಿರುವ ಗ್ರಾಮಸ್ಥರು ಸಂಕಷ್ಟಕ್ಕೀಡಾಗಿದ್ದಾರೆ.
ಇದಕ್ಕೆ ಸಂಬಂಧಿಸಿದಂತೆ ಇಲ್ಲಿನ ಗ್ರಾಮಸ್ಥರು, “ಗ್ರಾಮ ಪಂಚಾಯಿತಿ ಹಾಗೂ ಕಳಸ ಕ್ಷೇತ್ರದ ಶಾಸಕರಿಗೆ ಹಲವು ಬಾರಿ ಮನವಿ ಮಾಡಿದರೂ ಏನೂ ಪ್ರಯೋಜನವಾಗಿಲ್ಲ” ಈ ಸರ್ಕಾರ ಬಂದ ಮೇಲೆ ಎಷ್ಟೋ ವರ್ಷಗಳ ನಂತರ ನಮ್ಮೂರಿನ ರಸ್ತೆಗೆ ಜಲ್ಲಿಯನ್ನು ಹಾಕಲಾಯಿತು. ಆದರೇ, ಜಲ್ಲಿ ಹಾಕಿ ಕಾಮಗಾರಿ ಶುರು ಮಾಡಿದ ಗುತ್ತಿಗೆದಾರ ನಾಪತ್ತೆಯಾಗಿದ್ದಾನೆ ಎಂದು ಗ್ರಾಮದ ಗ್ರಾಮಸ್ಥರು ಆಕ್ರೋಶವನ್ನು ವ್ಯಕ್ತಪಡಿಸಿದ್ದಾರೆ.
“ದಿನ ನಿತ್ಯ ಈ ರಸ್ತೆಯಲ್ಲಿ ಸಾವಿರಾರು ಜನರು ಓಡಾಡುತ್ತಾರೆ. ಈ ಕಾಮಗಾರಿ ಕುರಿತು ಇಂಜಿನಿಯರ್ ಗಳ ಗಮನಕ್ಕೂ ತಂದಿದ್ದೇವೆ. ಇಲ್ಲಿಯವರೆಗೂ ಶಾಸಕರು ಹಾಗೂ ಅಧಿಕಾರಿಗಳಾಗಲಿ ಸ್ಥಳಕ್ಕೆ ಭೇಟಿ ಕೂಡ ಮಾಡಿಲ್ಲವೆಂದು” ಮೆರವಣಿಗೆಯ ಗ್ರಾಮಸ್ಥರು ಆರೋಪಿಸಿದ್ದಾರೆ.
ನಮ್ಮ ಗ್ರಾಮಗಳಿಗೆ ಜಲ ಜೀವನ್ ಎಂಬ ಸರ್ಕಾರದ ಯೋಜನೆಯಡಿ ನೀರಿನ ಪೈಪನ್ನು ಅಳವಡಿಸಿದ್ದಾರೆ. ಆದರೆ ನಮ್ಮ ಗ್ರಾಮಗಳಿಗೆ ನೀರು ಬರುತ್ತಿಲ್ಲ , ಸರ್ಕಾರದ ಹಣವನ್ನು ಲೂಟಿ ಮಾಡುತ್ತಿದ್ದಾರೆ. ಸರ್ಕಾರದಿಂದ ಬಂದಂತಹ ಹಣವನ್ನು ಸರಿಯಾಗಿ ಸಾರ್ವಜನಿಕರಿಗೆ ಉಪಯೋಗಿಸುವ ಬದಲು ಇದಕ್ಕೆ ಸಂಬಂಧಿಸಿದ ಅಧಿಕಾರಿಗಳು ದುರುಪಯೋಗ ಪಡಿಸಿಕೊಳ್ಳುತ್ತಿದ್ದಾರೆಂದು ಇಡಕಣಿ ಗ್ರಾಮಸ್ಥರು ತಮ್ಮ ನೋವನ್ನು ಈದಿನ.ಕಾಂ ಜೊತೆ ಮಾತಾಡಿದ್ದಾರೆ.
ಮೂರು ಗ್ರಾಮ ಪಂಚಾಯಿತಿಗೆ ಸೇರಿದ ಗ್ರಾಮಗಳಲ್ಲಿ ವಿದ್ಯಾಭ್ಯಾಸ ಮಾಡುತ್ತಿರುವ ವಿದ್ಯಾರ್ಥಿಗಳಿಗೆ ಪ್ರತಿ ದಿನ ಶಾಲೆಗೆ ತೆರಳಲು ತುಂಬಾ ತೊಂದರೆಯಾಗುತ್ತಿದೆ. ಹಾಗೆಯೇ, ಅನಾರೋಗ್ಯ ಪೀಡಿತರಾದ ವೃದ್ಧಾಪ್ಯಗಳನ್ನು ಆಸ್ಪತ್ರೆಗೆ ತೆರಳಲು ಬಹಳ ಕಷ್ಟವಾಗುತ್ತಿದೆ. ಈ ರಸ್ತೆಯಲ್ಲಿ ಕರೆದೊಯ್ಯುವತ್ತಿಗೆ ಅವರು ಜೀವ ಕಳೆದುಕೊಳ್ಳುವ ಸಾಧ್ಯತೆಯೇ ಹೆಚ್ಚು. ಎರಡು – ಮೂರು ವರ್ಷಗಳಿಂದಲೂ ಸುಳ್ಳು ಭರವಸೆಯನ್ನು ನೀಡುತ್ತಾ ಬಂದಂತ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ವಿರುದ್ಧ ಜನರು ಆಕ್ರೋಶ ಹೊರಹಾಕಿದ್ದಾರೆ.
ಶಾಲಾ ಮಕ್ಕಳನ್ನಗಲಿ, ವಯಸ್ಸಾದ ವೃದ್ಧರನ್ನಗಲಿ ಹಾಗೂ ಸಾರ್ವಜನಿಕರಿಗೆ ಓಡಾಡುವುದಕ್ಕೆ ಗಾಡಿ ಬಾಡಿಗೆ ಮಾಡಿಕೊಂಡು ಹೋಗಬೇಕಾದರೆ 600-1000 ರೂಪಾಯಿಗಳನ್ನು ಹಣ ಕೊಡಬೇಕು. ಕೂಲಿ ಮಾಡಿ ಬದುಕು ಕಟ್ಟಿಕೊಳ್ಳುವ ಜನರು ಒಂದು ದಿನದ ಸಂಬಳ ಬರಿಸಬೇಕಾಗಿದೆ. ಹಣ ಕೊಟ್ಟರೂ ನಮ್ಮೂರಿನ ರಸ್ತೆಯಲ್ಲಿ ಬಾಡಿಗೆದಾರರು ಬರುವುದಿಲ್ಲವೆಂದು ಕಳಸ ಗ್ರಾಮ ಪಂಚಾಯಿತಿಗೆ ಸೇರುವ ಗ್ರಾಮಸ್ಥರು ಈ ದಿನ. ಕಾಂ ಮೂಲಕ ಬೇಸರ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿದ್ದೀರಾ?ತರೀಕೆರೆ | ಕರಡಿ ದಾಳಿ: ರೈತ ಗಂಭೀರ
ನಮ್ಮೂರಿಗೆ ಸರಿಯಾದ ಸಂಪರ್ಕ ರಸ್ತೆ ಹಾಗೂ ಸೂಕ್ತವಾದ ಕುಡಿಯುವ ನೀರಿನ ವ್ಯವಸ್ಥೆ ಮಾಡದಿದ್ದರೇ ಗ್ರಾಮಸ್ಥರೆಲ್ಲರೂ ಸೇರಿ ಧರಣಿ ಕೂರುತ್ತೇವೆ. ಆಗೂ ಕ್ರಮ ಕೈಗೊಳ್ಳದಿದ್ದರೆ ಮುಂದೆ ಬರುವ ಚುನಾವಣೆಯನ್ನು ಬಹಿಷ್ಕರಿಸುತ್ತೇವೆಂದು ಮೂರು ಗ್ರಾಮ ಪಂಚಾಯಿತಿಗೆ ಸೇರುವ ಗ್ರಾಮಸ್ಥರು ಎಚ್ಚರಿಕೆ ನೀಡಿದ್ದಾರೆ.
