ಅಮೆರಿಕ-ಇಸ್ರೇಲ್-ಇರಾನ್ ಯುದ್ಧವು 11ನೇ ದಿನಕ್ಕೆ ಕಾಲಿಟ್ಟಿದೆ. ಸಾಕಷ್ಟು ಬ್ಯಾಲಿಸ್ಟಿಕ್ ಕ್ಷಿಪಣಿ ಅಥವಾ ಕಾಮಿಕೇಜಿ ಡ್ರೋನ್ಗಳನ್ನು ಹೊಂದಿರುವ ಇರಾನ್, ಎಷ್ಟು ದಿನ ಬೇಕಿದ್ದರೂ ಯುದ್ಧ ಮುಂದುವರೆಸುತ್ತೇವೆಂದು ಹೇಳುತ್ತಿದೆ. ಜಾಗತಿಕ ಆರ್ಥಿಕ ಸಂಕಷ್ಟವೇ ಈ ಯುದ್ಧವನ್ನು ಅಂತ್ಯಗೊಳಿಸುತ್ತದೆ ಎನ್ನುತ್ತಿರುವ ಇರಾನ್, ಜಾಗತಿಕ ಇಂಧನ ಬಿಕ್ಕಟ್ಟು ಸೃಷ್ಟಿಸಿದೆ.
ಇರಾನ್ನ ಐಆರ್ಜಿಸಿ (IRGC) ಪಡೆಗಳು ಮಧ್ಯಪ್ರಾಚ್ಯ, ಇಸ್ರೇಲ್ ಹಾಗೂ ಗಲ್ಫ್ ರಾಷ್ಟ್ರಗಳಲ್ಲಿನ ಅಮೆರಿಕದ ಸೇನಾ ನೆಲೆಗಳ ಮೇಲೆ ದಾಳಿ ಮುಂದುವರೆಸಿವೆ. ಇರಾನ್ ಕೇವಲ 35,000 ಡಾಲರ್ಗಳಷ್ಟು ಅಗ್ಗದ ಡ್ರೋನ್ಗಳನ್ನು ಬಳಸುತ್ತಿದ್ದು, ಅಮೆರಿಕ ಮತ್ತು ಅದರ ಗಲ್ಫ್ ಮಿತ್ರರಾಷ್ಟ್ರಗಳು ಭಾರಿ ಹಣಕಾಸಿನ ನಷ್ಟ ಅನುಭವಿಸುವಂತೆ ಇರಾನ್ ಮಾಡಿದೆ. ಈವರೆಗೆ, ಅಮೆರಿಕ ಲಕ್ಷಾಂತರ ಡಾಲರ್ ಮೌಲ್ಯದ ಕ್ಷಿಪಣಿಗಳನ್ನು ಹಾರಿಸಿದ್ದು, ಭಾರೀ ನಷ್ಟ ಅನುಭವಿಸಿವೆ. ಇರಾನ್ ಶಾಹೆದ್ 136 ಡ್ರೋನ್ ದಾಳಿಯನ್ನು ತಡೆಯಲಾಗದ ಅಮೆರಿಕ ಮತ್ತು ಮಿತ್ರಕೂಟವು ಉಕ್ರೇನ್ ನೆರವು ಕೋರಿವೆ.
ಒಂದೆಡೆ, ಅಮೆರಿಕ-ಇಸ್ರೇಲ್ಅನ್ನು ಯುದ್ಧಭೂಮಿಯಲ್ಲಿ ಪ್ರಬಲವಾಗಿ ಇರಾನ್ ಎದುರಿಸುತ್ತಿದೆ. ಮತ್ತೊಂದೆಡೆ, ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಿದ್ದು, ತೈಲ ಸಂಚಾರವನ್ನು ತಡೆದಿದೆ. ವಿಶ್ವದ ಒಟ್ಟು ತೈಲ ಪೂರೈಕೆಯ 20%ರಷ್ಟು ಈ ಮಾರ್ಗದಲ್ಲೇ ಸಾಗುತ್ತದೆ. ಈಗ, ಸಂಚಾರ ಸ್ಥಗಿತಗೊಂಡಿರುವುದು ಜಾಗತಿಕ ಇಂಧನ ಬಿಕ್ಕಟ್ಟಿಗೆ ಕಾರಣವಾಗಿದೆ. ಸುಮಾರು 700ಕ್ಕೂ ಹೆಚ್ಚು ಹಡಗುಗಳು ಹಾರ್ಮುಜ್ ಜಲಸಂಧಿಯ ಎರಡೂ ಬದಿಗಳಲ್ಲಿ ಸಾಲುಗಟ್ಟಿ ನಿಂತಿವೆ. ಇಡೀ ಜಗತ್ತಿನ ಸುಮಾರು ಅರ್ಧದಷ್ಟು ವಹಿವಾಟು ಸ್ಥಗಿತಗೊಂಡಿದೆ.
ಈ ಲೇಖನ ಓದಿದ್ದೀರಾ?: ಇಸ್ರೇಲ್ಗೆ ತೈಲ, ಇರಾನ್ಗೆ ನೀರಿನ ಅಭಾವ, ಅಮೆರಿಕ್ಕೆ ಅನಗತ್ಯ ವೆಚ್ಚ: ಯುದ್ಧದ ಭೀಕರ ಪರಿಣಾಮಗಳು
ಇರಾನ್ ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಿರುವುದು ಯುದ್ಧದ ಪರಿಕಲ್ಪನೆಯನ್ನೇ ಬದಲಿಸಿದೆ. ಈಗ, ಅಮೆರಿಕದ ಮೇಲೆ ಅಂತರಾಷ್ಟ್ರೀಯ ಮತ್ತು ದೇಶೀಯ ಒತ್ತಡ ಹೆಚ್ಚುವಂತೆ ಮಾಡಿದೆ. ಹಲವು ರಾಷ್ಟ್ರಗಳು ತಮ್ಮ ಬೇಡಿಕೆ-ಪೂರೈಕೆಯನ್ನು ಸಮತೋಲನಗೊಳಿಸಲು ಯುದ್ಧ ನಿಲ್ಲಿಸುವಂತೆ ಅಮೆರಿಕ ಮೇಲೆ ಒತ್ತಡ ಹೇರುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಇರಾನ್ನ ಡ್ರೋನ್ ದಾಳಿಯನ್ನು ಎದುರಿಸಲಾಗದ ಅಮೆರಿಕ, ತಾನೇ ಸೃಷ್ಟಿಸಿದ ಯುದ್ಧದಿಂದ ತತ್ತರಿಸುತ್ತಿದೆ. ಜಾಗತಿಕ ಒತ್ತಡಕ್ಕೂ ಗುರಿಯಾಗುತ್ತಿದೆ. ಈ ಇಂಧನ ಬಿಕ್ಕಟ್ಟು ಯುದ್ಧದ ಅವಧಿಯನ್ನು ಕಡಿಮೆ ಮಾಡುವ ಸಾಧ್ಯತೆ ಇದೆ.
