ಇರಾನ್ ಮೇಲೆ ಅಮೆರಿಕ-ಇಸ್ರೆಲ್ ಜಂಟಿ ದಾಳಿ ನಡೆಸಿದ ಬಳಿಕ, ಮಧ್ಯಪ್ರಾಚ್ಯದಲ್ಲಿ ಸಂಘರ್ಷ ಭುಗಿಲೆದ್ದಿದೆ. ಕೊಲ್ಲಿ ರಾಷ್ಟ್ರಗಳಲ್ಲಿರುವ ಅಮೆರಿಕದ ಸೇನಾ ನೆಲೆಗಳ ಮೇಲೆ ಇರಾನ್ ಪ್ರತಿದಾಳಿ ನಡೆಸಿದೆ. ಒಂದು ವಾರದ ಘರ್ಷಣೆಯಲ್ಲಿ ಅಮೆರಿಕದ ಲಕ್ಷಾಂತರ ಡಾಲರ್ ಮೌಲ್ಯದ ರಾಡಾರ್ ರಕ್ಷಣಾ ವ್ಯವಸ್ಥೆಯು ನಾಶವಾಗಿದೆ ಎಂದು ಸುದ್ದಿ ಸಂಸ್ಥೆ ಬ್ಲೂಮ್ಬರ್ಗ್ ವರದಿ ಮಾಡಿದೆ.
ಅಮೆರಿಕದ ಥಾಡ್ (THAAD) ರಕ್ಷಣಾ ವ್ಯವಸ್ಥೆಯಲ್ಲಿ ಆರ್ಟಿಎಕ್ಸ್ ಕಾರ್ಪೊರೇಷನ್ನ (RTX Corp.) AN/TPY-2 ರಾಡಾರ್ ಮತ್ತು ಪೂರಕ ಉಪಕರಣಗಳು ಬಳಸಲಾಗುತ್ತದೆ. ಇವು ಅಮೆರಿಕದ ಕ್ಷಿಪಣಿ ರಕ್ಷಣಾ ಬ್ಯಾಟರಿಗಳನ್ನು ನಿರ್ದೇಶಿಸುವಲ್ಲಿ ನಿರ್ಣಾಯಕವಾಗಿವೆ. ಜೋರ್ಡಾನ್ನಲ್ಲಿರುವ ಅಮೆರಿಕದ ಥಾಡ್ ರಕ್ಷಣಾ ವ್ಯವಸ್ಥೆಯ ಮೇಲೆ ಫೆಬ್ರವರಿ 28 ಮತ್ತು ಮಾರ್ಚ್ 3 ರಂದು ಇರಾನ್ ದಾಳಿಗಳನ್ನು ನಡೆಸಿದೆ. ಇದರಿಂದ, ಸುಮಾರು 30 ಕೋಟಿ ಡಾಲರ್ ಮೌಲ್ಯದ ರಕ್ಷಣಾ ವ್ಯವಸ್ಥೆಯು ಧ್ವಂಸಗೊಂಡಿದೆ ಎಂದು ವರದಿ ಹೇಳಿದೆ.
“ಜೋರ್ಡಾನ್ನ ಥಾಡ್ ರಾಡಾರ್ ಮೇಲಿನ ದಾಳಿಯು ಇರಾನ್ ನಡೆಸಿರುವ ಈವರೆಗಿನ ದಾಳಿಗಳಲ್ಲಿ ಅತ್ಯಂತ ಯಶಸ್ವಿ ದಾಳಿಗಳಲ್ಲಿ ಒಂದಾಗಲಿದೆ,” ಎಂದು ಥಿಂಕ್ ಟ್ಯಾಂಕ್ನ ಮಿಲಿಟರಿ ಮತ್ತು ಪೊಲಿಟಿಕಲ್ ಪವರ್ ಕೇಂದ್ರದ ಉಪ ನಿರ್ದೇಶಕ ರಿಯಾನ್ ಬ್ರಾಬ್ಸ್ಟ್ ಹೇಳಿದ್ದಾರೆ.
ಆದಾಗ್ಯೂ, ಅಮೆರಿಕದ ಮಿಲಿಟರಿ ಮತ್ತು ಅದರ ಪಾಲುದಾರರು ವಾಯು ಮತ್ತು ಕ್ಷಿಪಣಿ ರಕ್ಷಣಾ ಕವರೇಜ್ ಅನ್ನು ಕಾಯ್ದುಕೊಳ್ಳಲು ಸಮರ್ಥವಾಗಿರುವ ಇತರ ರಾಡಾರ್ಗಳನ್ನು ನಿರ್ವಹಿಸುತ್ತಿವೆ. ಯಾವುದೇ ಒಂದು ವ್ಯವಸ್ಥೆಯನ್ನು ಕಳೆದುಕೊಳ್ಳುವುದರಿಂದ ಗಂಭೀರ ಪರಿಣಾಮವಾಗುವುದಿಲ್ಲ ಎಂದೂ ಅವರು ವಿವರಿಸಿದ್ದಾರೆ.
ಅಮೆರಿಕದ ಟರ್ಮಿನಲ್ ಹೈ ಆಲ್ಟಿಟ್ಯೂಡ್ ಏರಿಯಾ ಡಿಫೆನ್ಸ್ (THAAD) ವ್ಯವಸ್ಥೆಯನ್ನು ತನ್ನ ವ್ಯಾಪ್ತಿಯ ಕಟ್ಟಕಡೆಯ ತುದಿಯಲ್ಲಿಯೇ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ನಾಶಪಡಿಸಲು ವಿನ್ಯಾಸಗೊಳಿಸಲಾಗಿದೆ. ಇದು ಕಡಿಮೆ ವ್ಯಾಪ್ತಿಯ ಪೇಟ್ರಿಯಾಟ್ ಕ್ಷಿಪಣಿ ವ್ಯವಸ್ಥೆಯ ಬ್ಯಾಟರಿಗಳಿಗಿಂತ ಹೆಚ್ಚು ಸಂಕೀರ್ಣವಾದ ಬೆದರಿಕೆಗಳನ್ನು ತಡೆಯಲು ಅನುವು ಮಾಡಿಕೊಡುತ್ತದೆ ಎಂದು ಅವರು ಹೇಳಿದ್ದಾರೆ.
ಈ ಲೇಖನ ಓದಿದ್ದೀರಾ?: ಅಮೆರಿಕ ಕೈಯಿಟ್ಟ ಕಡೆಯೆಲ್ಲ ವಿನಾಶವೇ ಎಂಬುದು ಚಾರಿತ್ರಿಕ ಸತ್ಯ!
ದಕ್ಷಿಣ ಕೊರಿಯಾ ಮತ್ತು ಗುವಾಮ್ ಸೇರಿದಂತೆ ವಿಶ್ವದಾದ್ಯಂತ ಅಮೆರಿಕ ಎಂಟು THAAD ವ್ಯವಸ್ಥೆಗಳನ್ನು ನಿರ್ವಹಿಸುತ್ತಿದೆ.
ಸೆಂಟರ್ ಫಾರ್ ಸ್ಟ್ರಾಟೆಜಿಕ್ ಅಂಡ್ ಇಂಟರ್ನ್ಯಾಷನಲ್ ಸ್ಟಡೀಸ್ ಪ್ರಕಾರ, ಥಾಡ್ ವ್ಯವಸ್ಥೆಯಲ್ಲಿ ಬಳಸಲಾಗುವ ಪ್ರತಿ ಬ್ಯಾಟರಿಯ ವೆಚ್ಚ ಸುಮಾರು 1 ಶತಕೋಟಿ ಡಾಲರ್ ಆಗಿದ್ದು, ರಾಡಾರ್ ಒಂದಕ್ಕೇ ಸರಿಸುಮಾರು 30 ಕೋಟಿ ಡಾಲರ್ ವೆಚ್ಚವಾಗುತ್ತದೆ. ಇವುಗಳು ವಿರಳವಾದ ಕಾರ್ಯತಂತ್ರದ ಸಂಪನ್ಮೂಲಗಳಾಗಿದ್ದು, ಇವನ್ನು ಕಳೆದುಕೊಳ್ಳುವುದು ದೊಡ್ಡ ಹೊಡೆತವಾಗಿದೆ.
ಒಂದು ವಿಶಿಷ್ಟವಾದ THAAD ಬ್ಯಾಟರಿಯು 90 ಸೈನಿಕರು, ಟ್ರಕ್-ಮೌಂಟೆಡ್ ಒಂಬತ್ತು ಲಾಂಚರ್ಗಳು, 48 ಇಂಟರ್ಸೆಪ್ಟರ್ ಕ್ಷಿಪಣಿಗಳು, ಒಂದು TPY-2 ರಾಡಾರ್, ಒಂದು ಯುದ್ಧತಾಂತ್ರಿಕ ಅಗ್ನಿ-ನಿಯಂತ್ರಣ ಮತ್ತು ಸಂವಹನ ಘಟಕ ಹಾಗೂ ಲಾಕ್ಹೀಡ್ ಮಾರ್ಟಿನ್ಅನ್ನು ಹೊಂದಿರುತ್ತದೆ.
