ಕಳೆದ ವರ್ಷ 2025ರಲ್ಲಿ ದಾಖಲೆ ಪ್ರಮಾಣದಲ್ಲಿ 129 ಪತ್ರಕರ್ತರು ಮತ್ತು ಮಾಧ್ಯಮ ಕಾರ್ಯಕರ್ತರು ಜಾಗತಿಕವಾಗಿ ಹತ್ಯೆಗೀಡಾಗಿದ್ದಾರೆ. ಈ ಪೈಕಿ ಮೂರನೇ ಎರಡರಷ್ಟು ಅಂದರೆ 86 ಮಂದಿ ಪತ್ರಕರ್ತರ ಕೊಲೆಯನ್ನು ಇಸ್ರೇಲ್ ಮಾಡಿದೆ ಎಂದು ಪತ್ರಕರ್ತರ ರಕ್ಷಣಾ ಸಮಿತಿ ಬುಧವಾರ ತಿಳಿಸಿದೆ.
ಪತ್ರಕರ್ತರ ಹತ್ಯೆ ಸತತ ಎರಡನೇ ವರ್ಷ ಹೆಚ್ಚಳ ಕಾಣುತ್ತಿದೆ. ಅದರಲ್ಲೂ ಇಸ್ರೇಲ್ ಎರಡನೇ ಬಾರಿಗೆ ಅಧಿಕ ಪತ್ರಕರ್ತರ ಕೊಲೆಯಲ್ಲಿ ಭಾಗಿಯಾಗಿದೆ ಎಂದು ಪತ್ರಕರ್ತರ ಮೇಲಿನ ದಾಳಿಗಳನ್ನು ದಾಖಲಿಸುವ ನ್ಯೂಯಾರ್ಕ್ ಮೂಲದ ಸ್ವತಂತ್ರ ಸಂಸ್ಥೆ ಸಿಪಿಜೆ ವರದಿ ಹೇಳಿದೆ.
ಇದನ್ನು ಓದಿದ್ದೀರಾ? ಗಾಝಾದಲ್ಲಿ ಹತ್ಯೆಯಾದ ಯುವ ಪತ್ರಕರ್ತರೊಬ್ಬರ ಭಿನ್ನ ಉಯಿಲು !
2025ರಲ್ಲಿ ಇಸ್ರೇಲ್ ಗುಂಡೇಟಿಗೆ 86 ಪತ್ರಕರ್ತರು ಸಾವನ್ನಪ್ಪಿದ್ದು ಈ ಪೈಕಿ ಹೆಚ್ಚಿನವರು ಗಾಝಾದಲ್ಲಿನ ಪ್ಯಾಲೆಸ್ತೀನಿಯನ್ನರು. ಯೆಮೆನ್ನಲ್ಲಿರುವ ಹೌತಿ ಮಾಧ್ಯಮ ಕೇಂದ್ರದ ಮೇಲಿನ ದಾಳಿಯ ಮೂಲಕ 31 ಮಂದಿ ಮಾಧ್ಯಮ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಕಾರ್ಮಿಕರೂ ಇದರಲ್ಲಿ ಸೇರಿದ್ದಾರೆ. ಇದು ಸಿಪಿಜೆ ದಾಖಲಿಸಿದ ಎರಡನೇ ಅತ್ಯಂತ ಮಾರಕ ದಾಳಿಯಾಗಿದೆ ಎಂದು ಉಲ್ಲೇಖಿಸಿದೆ.
ಸಿಪಿಜೆ ಉದ್ದೇಶಪೂರ್ವಕವಾಗಿ ಗುರಿಯಾಗಿಸಿಕೊಂಡ ಅಥವಾ ಕೊಲೆ ಎಂದು ವರ್ಗೀಕರಿಸಿದ 47 ಹತ್ಯೆಗಳಲ್ಲಿ ಶೇಕಡ 81ರಷ್ಟು ಸಾವಿಗೆ ಇಸ್ರೇಲ್ ಕಾರಣವಾಗಿದೆ ಎಂದು ಸಿಪಿಜೆ ಹೇಳಿದೆ. ಗಾಝಾದಲ್ಲಿ ಸದ್ಯ ಪ್ರವೇಶ ನಿರ್ಬಂಧ ಇರುವ ಕಾರಣದಿಂದಾಗಿ ಈ ಸಂಖ್ಯೆ ಬಹುಶಃ ಇನ್ನೂ ಅಧಿಕವಾಗಿರಬಹುದು ಎಂದೂ ವರದಿ ಹೇಳಿದೆ. ಇನ್ನು ಹಲವಾರು ಸಂದರ್ಭಗಳಲ್ಲಿ ಇಸ್ರೇಲ್ ಗಾಝಾದಲ್ಲಿರುವ ಪತ್ರಕರ್ತರನ್ನು ಗುರಿಯಾಗಿಸಿಕೊಂಡಿರುವುದನ್ನು ಒಪ್ಪಿಕೊಂಡಿದೆ. ಕೊಲ್ಲಲ್ಪಟ್ಟ ವರದಿಗಾರರಿಗೆ ಉಗ್ರಗಾಮಿಗಳೊಂದಿಗೆ ಸಂಪರ್ಕವಿದೆ ಎಂದು ಹೇಳಿಕೊಂಡಿದೆ. ಆದರೆ ಅಂತಾರಾಷ್ಟ್ರೀಯ ಸುದ್ದಿ ಸಂಸ್ಥೆಗಳು ಈ ಆರೋಪವನ್ನು ಬಲವಾಗಿ ನಿರಾಕರಿಸಿವೆ.
ಇಸ್ರೇಲ್ ವಿದೇಶಿ ಪತ್ರಕರ್ತರನ್ನು ಗಾಝಾ ಪ್ರವೇಶಿಸಲು ಅನುಮತಿಸುವುದಿಲ್ಲ. ಆದ್ದರಿಂದಾಗಿ ಅಲ್ಲಿ ಕೊಲ್ಲಲ್ಪಟ್ಟ ಎಲ್ಲಾ ಮಾಧ್ಯಮ ಕಾರ್ಯಕರ್ತರು ಪ್ಯಾಲೆಸ್ತೀನಿಯನ್ನರು. “ಇಸ್ರೇಲ್ ಮಿಲಿಟರಿ ಈಗ ಯಾವುದೇ ಇತರ ಸರ್ಕಾರದ ಮಿಲಿಟರಿಗಿಂತ ಹೆಚ್ಚು ಪತ್ರಕರ್ತರ ಹತ್ಯೆಗಳನ್ನು ಮಾಡಿದೆ” ಎಂದು ಸಿಪಿಜೆ ವರದಿ ಹೇಳಿದೆ.
ಕೊಲ್ಲಲ್ಪಟ್ಟ 129 ಪತ್ರಕರ್ತರಲ್ಲಿ ಕನಿಷ್ಠ 104 ಮಂದಿ ಸಂಘರ್ಷಗಳಲ್ಲಿ ಸಾವನ್ನಪ್ಪಿದ್ದಾರೆ. ಗಾಝಾ ಮತ್ತು ಯೆಮೆನ್ ಹೊರತುಪಡಿಸಿ, ಪತ್ರಕರ್ತರಿಗೆ ಅತ್ಯಂತ ಮಾರಕ ದೇಶಗಳಲ್ಲಿ ಸುಡಾನ್ ಸೇರಿವೆ. ಅಲ್ಲಿ ಒಂಬತ್ತು ಮಂದಿ ಸಾವನ್ನಪ್ಪಿದ್ದಾರೆ. ಮೆಕ್ಸಿಕೊದಲ್ಲಿ ಆರು ಮಂದಿ ಸಾವನ್ನಪ್ಪಿದ್ದಾರೆ. ರಷ್ಯಾದ ಪಡೆಗಳಿಂದ ನಾಲ್ಕು ಉಕ್ರೇನಿಯನ್ ಪತ್ರಕರ್ತರು ಕೊಲ್ಲಲ್ಪಟ್ಟಿದ್ದಾರೆ. ಫಿಲಿಪೈನ್ಸ್ನಲ್ಲಿ ಮೂವರು ಪತ್ರಕರ್ತರು ಸಾವನ್ನಪ್ಪಿದರು ಎಂದು ಸಿಪಿಜೆ ವರದಿ ಹೇಳಿದೆ.
