ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೋಮವಾರ ಚೀನಾದ ಮೇಲಿನ ವಾಣಿಜ್ಯ ಒತ್ತಡವನ್ನು ಮತ್ತೊಮ್ಮೆ ಹೆಚ್ಚಿಸಿದ್ದು, “ನ್ಯಾಯಸಮ್ಮತ ವಾಣಿಜ್ಯ ಒಪ್ಪಂದ” ಕೈಗೊಳ್ಳದಿದ್ದಲ್ಲಿ ಚೀನಾದ ಸರಕುಗಳ ಮೇಲೆ ಶೇ 155 ರಷ್ಟು ಸುಂಕ ವಿಧಿಸುವ ಎಚ್ಚರಿಕೆ ನೀಡಿದ್ದಾರೆ.
ಆಸ್ಟ್ರೇಲಿಯಾದ ಪ್ರಧಾನಿ ಆಂಥೋನಿ ಅಲ್ಬನೀಸ್ ಅವರೊಂದಿಗೆ ಶ್ವೇತ ಭವನದಲ್ಲಿ “ಕ್ರಿಟಿಕಲ್ ಮಿನರಲ್ಸ್ ಒಪ್ಪಂದ”ಕ್ಕೆ ಸಹಿ ಹಾಕಿದ ನಂತರ ಟ್ರಂಪ್ ಈ ಹೇಳಿಕೆ ನೀಡಿದರು. ಈ ಒಪ್ಪಂದದ ಉದ್ದೇಶ ಅಮೆರಿಕಾದ ಸರಬರಾಜು ಸರಪಳಿಯನ್ನು ಬಲಪಡಿಸುವುದು ಮತ್ತು ಚೀನಾದ ಅವಲಂಬನೆಯನ್ನು ಕಡಿಮೆ ಮಾಡುವುದಾಗಿದೆ.
“ಚೀನಾ ನಮ್ಮೊಂದಿಗೆ ಗೌರವದಿಂದ ವರ್ತಿಸುತ್ತಿದೆ. ಅವರು ಈಗಾಗಲೇ 55 ಶೇಕಡಾ ಸುಂಕವನ್ನು ಪಾವತಿಸುತ್ತಿದ್ದಾರೆ. ಅದು ತುಂಬಾ ದೊಡ್ಡ ಮೊತ್ತ. ಆದರೆ ನವೆಂಬರ್ 1ರೊಳಗೆ ನ್ಯಾಯಸಮ್ಮತ ಒಪ್ಪಂದ ಆಗದಿದ್ದರೆ, ಆ ಸುಂಕವನ್ನು ಶೇ. 155 ಕ್ಕೆ ಏರಿಸುತ್ತೇವೆ,” ಎಂದು ಅವರು ಎಚ್ಚರಿಸಿದರು.
ಅಮೆರಿಕ ಕಳೆದ ಕೆಲವು ತಿಂಗಳಲ್ಲಿ ಹಲವು ರಾಷ್ಟ್ರಗಳೊಂದಿಗೆ ಹೊಸ ವಾಣಿಜ್ಯ ಒಪ್ಪಂದಗಳನ್ನು ಮಾಡಿಕೊಂಡಿದೆ ಎಂದು ಟ್ರಂಪ್ ತಿಳಿಸಿದ್ದಾರೆ. “ಹಿಂದೆ ಅಮೆರಿಕದ ಮೇಲೆ ಅನ್ಯಾಯವಾಗಿ ಲಾಭ ಪಡೆದಿದ್ದ ರಾಷ್ಟ್ರಗಳು ಈಗ ಅದನ್ನು ಮಾಡಲಾಗುವುದಿಲ್ಲ, ತನ್ನ ಆಡಳಿತವು ಅನ್ಯಾಯ ವಾಣಿಜ್ಯ ಕ್ರಮಗಳನ್ನು ಸಹಿಸಿಕೊಳ್ಳುವುದಿಲ್ಲ ಎಂದು ಅವರು ಹೇಳಿದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಸಂಘಪರಿವಾರದ ಹುನ್ನಾರಗಳನ್ನು ಅರಿತ ದಲಿತರು
ಇದಕ್ಕೂ ನಡುವೆ, ಚೀನಾ ಸೆಪ್ಟೆಂಬರ್ ತಿಂಗಳಲ್ಲಿ ಅಮೆರಿಕಾದಿಂದ ಒಂದು ಸಿಂಗಲ್ ಸೋಯಾಬೀನ್ ಸರಕನ್ನು ಕೂಡ ಆಮದು ಮಾಡಿಲ್ಲ ಎಂಬ ವರದಿ ಹೊರಬಿದ್ದಿದೆ. 2018ರ ನಂತರ ಇದೇ ಮೊದಲ ಬಾರಿಗೆ ಈ ರೀತಿಯ ಸ್ಥಿತಿ ಉಂಟಾಗಿದೆ ಎಂದು ವರದಿ ತಿಳಿಸಿದೆ.
ಟ್ರಂಪ್ ಈಗಾಗಲೇ ನವೆಂಬರ್ 1ರಿಂದ ಚೀನಾದ ಸರಕುಗಳ ಮೇಲೆ 100 ಶೇಕಡಾ ಹೊಸ ಸುಂಕಗಳು ಮತ್ತು ಕ್ರಿಟಿಕಲ್ ಸಾಫ್ಟ್ವೇರ್ಗಳ ಮೇಲೆ ಹೊಸ ರಫ್ತು ನಿರ್ಬಂಧಗಳು ಜಾರಿಗೆ ಬರುವುದಾಗಿ ಘೋಷಿಸಿದ್ದರು.
“ಚೀನಾದ ಅಧ್ಯಕ್ಷ ಜಿನ್ಪಿಂಗ್ ನಡುವಿನ ಸಂಬಂಧ ಅತ್ಯಂತ ಉತ್ತಮವಾಗಿದೆ. ನಾವು ಕೆಲವು ವಿಷಯಗಳಲ್ಲಿ ಭಿನ್ನಾಭಿಪ್ರಾಯ ಹೊಂದಿದ್ದರೂ, ಪರಸ್ಪರ ಗೌರವವಿದೆ. ಅವರು ಸುಂಕದ ಮೂಲಕ ಅಮೆರಿಕಾಗೆ ಬಹಳಷ್ಟು ಹಣ ಪಾವತಿಸುತ್ತಿದ್ದಾರೆ. ಅದನ್ನು ಕಡಿಮೆ ಮಾಡಲು ಅವರಿಗೆ ಬಯಕೆ ಇದೆ, ಆದರೆ ಅದಕ್ಕಾಗಿ ನಮಗೂ ಅನುಕೂಲಕರವಾದ ಬದಲಾವಣೆಗಳು ಬೇಕು,” ಎಂದು ಟ್ರಂಪ್ ಹೇಳಿದರು.
