ಅಮೆರಿಕದ ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಸಾವಿನ ಅಪರಾಧಿ ಮಿನ್ನಿಯಾಪೋಲಿಸ್ ಮಾಜಿ ಪೊಲೀಸ್ ಅಧಿಕಾರಿ ಡೆರೆಕ್ ಚೌವಿನ್ ಫೆಡರಲ್ ಜೈಲಿನಲ್ಲಿ ಇರಿತಕ್ಕೊಳಗಾಗಿದ್ದಾರೆ ಮತ್ತು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಅಸೋಸಿಯೇಟೆಡ್ ಪ್ರೆಸ್ ವರದಿ ತಿಳಿಸಿದೆ.
ಟಕ್ಸನ್ನಲ್ಲಿರುವ ಫೆಡರಲ್ ಕರೆಕ್ಷನಲ್ ಇನ್ಸ್ಟಿಟ್ಯೂಷನ್ನಲ್ಲಿ ಶುಕ್ರವಾರ ಮತ್ತೊಬ್ಬ ಕೈದಿ ಚೌವಿನ್ಗೆ ಇರಿದಿದ್ದಾನೆ ಎಂದು ಸುದ್ದಿ ಸಂಸ್ಥೆ ಹೇಳಿದೆ. ಆದರೆ, ಟಕ್ಸನ್ ಜೈಲಿನ ಮೂಲಗಳು ಈ ಸುದ್ದಿಯನ್ನು ಇನ್ನೂ ದೃಢೀಕರಿಸಿಲ್ಲ.
ಏನಿದು ಪ್ರಕರಣ: 2020ರ ಮೇ ತಿಂಗಳಲ್ಲಿ 46 ವರ್ಷದ ಅಮೆರಿಕದ ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಅವರನ್ನು ಮಿನ್ನಿಯಾಪೊಲೀಸ್ನ ಅಂಗಡಿಯೊಂದರಲ್ಲಿ ನಕಲಿ 20 ಡಾಲರ್ ಹಣ ಪಾವತಿಸಿದ ಅನುಮಾನದಡಿ ಪೊಲೀಸ್ ಅಧಿಕಾರಿ ಡೆರಿಕ್ ಚೌವಿನ್ ಬಂಧಿಸಿದ್ದರು. ಫ್ಲಾಯ್ಡ್ ಕೈಗಳಿಗೆ ಕೋಳ ತೊಡಿಸಿದ್ದ ಚೌವಿನ್, ಅವರ ಮುಖವನ್ನು ರಸ್ತೆಯಲ್ಲಿಯೇ ನೆಲದ ಮೇಲೆ ಮೊಣಕಾಲಿನಿಂದ ಒತ್ತಿಹಿಡಿದ ಚಿತ್ರ ವೈರಲ್ ಆಗಿತ್ತು. ಪೊಲೀಸ್ ಅಧಿಕಾರಿ ಡೆರಿಕ್ ಚೌವಿನ್ 9 ನಿಮಿಷ 29 ಸೆಕೆಂಡ್ ಕಾಲ ಫ್ಲಾಯ್ಡ್ ಕುತ್ತಿಗೆಯ ಮೇಲೆ ತನ್ನ ಕಾಲನ್ನು ಒತ್ತಿ ಹಿಡಿದೇ ಇದ್ದ. ಉಸಿರು ಗಟ್ಟಿ ಫ್ಲಾಯ್ಡ್ ನಿಧನ ಹೊಂದಿದ್ದರು.
ಈ ಸುದ್ದಿ ಓದಿದ್ದೀರಾ: ಈ ದಿನ ಸಂಪಾದಕೀಯ | ದುಡಿವ ಜನರ ಮಹಾಧರಣಿ: ಶುರುವಾಗಲಿ ಜನಪರ್ಯಾಯ
ಮಿನ್ನಿಯಾಪೊಲೀಸ್ ನ್ಯಾಯಾಲಯದಲ್ಲಿ ಚೌವಿನ್, ಫ್ಲಾಯ್ಡ್ ಕುಟುಂಬಕ್ಕೆ ಸಂತಾಪ ಸೂಚಿಸಿದರೂ ಕ್ಷಮೆ ಕೇಳಿರಲಿಲ್ಲ. ಚೌವಿನ್ಗೆ 22 ವರ್ಷ ಆರು ತಿಂಗಳು ಜೈಲು ಶಿಕ್ಷೆ ವಿಧಿಸಲಾಗಿತ್ತು. ಫ್ಲಾಯ್ಡ್ ಹತ್ಯೆ ವಿಶ್ವದಾದ್ಯಂತ ಜನಾಂಗೀಯ ಅನ್ಯಾಯ ಮತ್ತು ಪೊಲೀಸ್ ದೌರ್ಜನ್ಯದ ವಿರುದ್ಧ ಪ್ರತಿಭಟನೆಗೆ ನಾಂದಿ ಹಾಡಿತ್ತು. ಅಮೆರಿಕದಲ್ಲಿ ‘ಬ್ಲ್ಯಾಕ್ ಲೈವ್ಸ್ ಮ್ಯಾಟರ್’ ಅಂದೋಲನ ತೀವ್ರವಾಗಿತ್ತು.
