ಈ ಹಿಂದೆ ವಿಶ್ವದ ಅತೀ ಶ್ರೀಮಂತ ವ್ಯಕ್ತಿ ಎನಿಸಿಕೊಂಡಿದ್ದ ಟೆಸ್ಲಾ ಮುಖ್ಯಸ್ಥ ಎಲಾನ್ ಮಸ್ಕ್ ಆದಾಯವನ್ನು ಕಳೆದುಕೊಳ್ಳುತ್ತಿದ್ದು ಬ್ಲೂಬರ್ಗ್ ಪ್ರಕಾರ ಮಸ್ಕ್ ಮೂರನೇ ಸ್ಥಾನಕ್ಕೆ ಕುಸಿದಿದ್ದಾರೆ. ವರದಿ ಪ್ರಕಾರ ಎಕ್ಸ್ (ಟ್ವಿಟ್ಟರ್) ಮಾಲೀಕ ಮಸ್ಕ್ 2024ರ ಈ ಎರಡು ತಿಂಗಳ ಅವಧಿಯಲ್ಲೇ ಬರೋಬ್ಬರಿ 40 ಬಿಲಿಯನ್ ಡಾಲರ್ ನಷ್ಟ ಕಂಡಿದ್ದಾರೆ.
ಬ್ಲೂಬರ್ಗ್ ಬಿಲಿಯನೇರ್ ಇಂಡೆಕ್ಸ್ ಪ್ರಕಾರ ಎಲಾನ್ ಮಸ್ಕ್ 189 ಬಿಲಿಯನ್ ಡಾಲರ್ ಆಸ್ತಿಯೊಂದಿಗೆ ವಿಶ್ವದ ಮೂರನೇ ಶ್ರೀಮಂತ ವ್ಯಕ್ತಿಯಾಗಿದ್ದು ಫೋರ್ಬ್ಸ್ ರಿಯಲ್ ಟೈಮ್ ಪ್ರಕಾರ 195.1 ಬಿಲಿಯನ್ ಡಾಲರ್ ಆಸ್ತಿಯೊಂದಿಗೆ ಎರಡನೇ ಸ್ಥಾನದಲ್ಲಿದ್ದಾರೆ.
ಬ್ಲೂಬರ್ಗ್ ಇಂಡೆಕ್ಸ್ನಂತೆ ಪ್ರಸ್ತುತ ಫ್ಯಾಷನ್ ಬ್ರ್ಯಾಂಡ್ ಲೂಯಿ ವಿಟಾನ್ನ ಮಾಲೀಕ ಬರ್ನಾರ್ಡ್ ಅರ್ನೌಲ್ಟ್ 201 ಬಿಲಿಯನ್ ಡಾಲರ್ನೊಂದಿಗೆ ವಿಶ್ವದ ಶ್ರೀಮಂತ ವ್ಯಕ್ತಿಯಾಗಿದ್ದು 198 ಬಿಲಿಯನ್ ಡಾಲರ್ ಆಸ್ತಿ ಹೊಂದಿರುವ ಅಮೆಜಾನ್ ಸಂಸ್ಥಾಪಕ ಜೆಫ್ ಬೆಜೊಸ್ ಎರಡನೇ ಸ್ಥಾನದಲ್ಲಿದ್ದಾರೆ.
ಈ ವಾರದ ಆರಂಭದಲ್ಲಿ ಜೆಫ್ ಬೆಜೊಸ್ ವಿಶ್ವದ ಶ್ರೀಮಂತ ವ್ಯಕ್ತಿ ಎಂಬ ಸ್ಥಾನವನ್ನು ಅಲಂಕರಿಸಿದ್ದು, ಕೆಲವೇ ದಿನಗಳಲ್ಲಿ ಜೆಫ್ ಬೆಜೊಸ್ರನ್ನು ಹಿಂದಿಕ್ಕಿ ಬರ್ನಾರ್ಡ್ ಅರ್ನೌಲ್ಟ್ ಅಗ್ರ ಸ್ಥಾನಕ್ಕೆ ಏರಿದ್ದಾರೆ. ಆದರೆ ಎಲಾನ್ ಮಸ್ಕ್ ಮಾತ್ರ ಆದಾಯ ಕಳೆದುಕೊಳ್ಳುತ್ತಾ ಪಟ್ಟಿಯಿಂದ ಕೆಳಕ್ಕಿಳಿಯುತ್ತಿದ್ದಾರೆ.
ಮಸ್ಕ್ಗೆ ಟೆಸ್ಲಾ ನೀಡಿದ ಪೆಟ್ಟು
ಟೆಸ್ಲಾದಲ್ಲಿ ಶೇಕಡ 21ರಷ್ಟು ಪಾಲು ಹೊಂದಿರುವ ಮಸ್ಕ್ನ ಆದಾಯಕ್ಕೆ ಟೆಸ್ಲಾ ಸಂಸ್ಥೆಯ ಕೊಡುಗೆ ಅಧಿಕ. ಆದರೆ ಸಂಸ್ಥೆಯ ಷೇರುಗಳು ನಿರಂತರವಾಗಿ ಕುಸಿಯುತ್ತಿದ್ದು, ಇದು ಮಸ್ಕ್ ಆದಾಯದ ಮೇಲೆ ಪ್ರಭಾವಿಸಿದೆ. ಟೆಸ್ಲಾ ಷೇರು ಈ ವರ್ಷದಲ್ಲಿ ಶೇಕಡ 29ರಷ್ಟು ಕುಸಿದಿದ್ದು, ಕಳೆದ ವಹಿವಾಟಿನ ಅಂತ್ಯದಲ್ಲಿ ಶೇಕಡ 1.85ರಷ್ಟು ಇಳಿದು 175.34ಕ್ಕೆ ತಲುಪಿದೆ.
ಈ ಕಾರು ತಯಾರಕ ಸಂಸ್ಥೆಯ ಉತ್ಪನ್ನಗಳ ಮಾರಾಟ ಚೀನಾದಲ್ಲಿ ಕಡಿಮೆಯಾಗುತ್ತಿದ್ದು, ಬರ್ಲಿನ್ನಲ್ಲಿರುವ ಟೆಸ್ಲಾ ಫ್ಯಾಕ್ಟರಿ ಉತ್ಪಾದನೆಯನ್ನೇ ಸ್ಥಗಿತಗೊಳಿಸಿದೆ. ಇದು ಟೆಸ್ಲಾ ಷೇರಿನ ಮೇಲೆ ಪರಿಣಾಮ ಬೀರಿದ್ದು, 2021ರ ಬೆಲೆಗಿಂತ ಶೇಕಡ 50ರಷ್ಟು ಇಳಿಕೆಯಾಗಿದೆ.
ಅದಾನಿ ಆದಾಯ ಏರಿಕೆ!
ವಿಶ್ವದಲ್ಲಿ ಅತೀ ಶ್ರೀಮಂತರ ಆದಾಯ ಕುಸಿಯುತ್ತಿರುವಾಗ ಷೇರುಪೇಟೆಯಲ್ಲಿ ವಂಚನೆಯ ಆರೋಪ ಹೊತ್ತಿರುವ ಅದಾನಿ ಸಂಸ್ಥೆಯ ಷೇರುಗಳು ಜಿಗಿಯುತ್ತಿದ್ದು, ಗೌತಮ್ ಅದಾನಿ ಆದಾಯ ಏರಿಕೆಯಾಗಿದೆ. ಭಾರತೀಯರ ಪೈಕಿ ಅಧಿಕ ಆದಾಯ ಗಳಿಸಿರುವವರು ಗೌತಮ್ ಅದಾನಿಯಾಗಿದ್ದಾರೆ. ವಿಶ್ವದ ಬಿಲಿಯನೇರ್ಗಳ ಪಟ್ಟಿಯಲ್ಲಿ ಮುಕೇಶ್ ಅಂಬಾನಿ 11 ಸ್ಥಾನದಲ್ಲಿದ್ದರೆ, ಗೌತಮ್ ಅದಾನಿ 13ನೇ ಸ್ಥಾನದಲ್ಲಿದ್ದಾರೆ.
