ಬ್ರೆಜಿಲ್ನ ಇತಿಹಾಸದಲ್ಲೇ ಅತಿದೊಡ್ಡ ಡ್ರಗ್ ವಿರೋಧಿ ಕಾರ್ಯಾಚರಣೆಯೊಂದರಲ್ಲಿ ರಿಯೊ ಡಿ ಜನೈರೊದ ಉತ್ತರ ಭಾಗದ ಅಲೆಮಾವೊ ಮತ್ತು ಪೆನ್ಹಾ ಪ್ರದೇಶಗಳಲ್ಲಿ ನಡೆದ ಘರ್ಷಣೆಯಲ್ಲಿ ಕನಿಷ್ಠ 64 ಜನರು ಮೃತಪಟ್ಟಿದ್ದಾರೆ, ಇದರಲ್ಲಿ ನಾಲ್ಕು ಪೊಲೀಸ್ ಸಿಬ್ಬಂದಿಯೂ ಸೇರಿದ್ದಾರೆ ಎಂದು ಅಧಿಕಾರಿಗಳು ಮಂಗಳವಾರ ದೃಢಪಡಿಸಿದ್ದಾರೆ.
ದಿನವಿಡಿ ನಡೆದ ಕಾರ್ಯಾಚರಣೆಯಲ್ಲಿ 2,500ಕ್ಕೂ ಹೆಚ್ಚು ಪೊಲೀಸ್ ಮತ್ತು ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿತ್ತು. ‘ರೆಡ್ ಕಮಾಂಡ್’ ಗ್ಯಾಂಗ್ನ ಸದಸ್ಯರು ಪೊಲೀಸರ ಮೇಲೆ ಗುಂಡಿನ ದಾಳಿ ನಡೆಸಿದರು, ರಸ್ತೆಗಳಲ್ಲಿ ಬೆಂಕಿಯ ಬ್ಯಾರಿಕೇಡ್ಗಳನ್ನು ಒಡ್ಡಿದರು ಮತ್ತು ಡ್ರೋನ್ಗಳಿಂದ ಬಾಂಬ್ಗಳನ್ನು ಎಸೆದರು. ಇದಕ್ಕೆ ಪ್ರತಿಯಾಗಿ, ಅಧಿಕಾರಿಗಳು ಭಾರೀ ಶಸ್ತ್ರಾಸ್ತ್ರಗಳನ್ನು ಬಳಸಿ ನಿಯಂತ್ರಣ ಸಾಧಿಸಿದರು. ಕಾರ್ಯಾಚರಣೆಯಲ್ಲಿ 80ಕ್ಕೂ ಹೆಚ್ಚು ಜನರನ್ನು ಬಂಧಿಸಲಾಗಿದೆ ಮತ್ತು 200 ಕಿಲೋಗ್ರಾಂಗಿಂತಲೂ ಹೆಚ್ಚು ಡ್ರಗ್ಸ್, ಹಲವಾರು ರೈಫಲ್ಗಳು ಮತ್ತು ಇತರ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಸುಮಾರು 3 ಲಕ್ಷ ಜನರಿರುವ ಈ ಪ್ರದೇಶದ ನಿವಾಸಿಗಳಲ್ಲಿ ಗಾಬರಿ ಮನೆಮಾಡಿತ್ತು. ಪ್ರತ್ಯಕ್ಷದರ್ಶಿಗಳ ಪ್ರಕಾರ, ಗುಂಡಿನ ಸದ್ದು ಮತ್ತು ಸ್ಫೋಟಗಳಿಂದ ಈ ಪ್ರದೇಶ ಯುದ್ಧಭೂಮಿಯಂತೆ ಕಾಣುತ್ತಿತ್ತು. ಹಲವಾರು ನಾಗರಿಕರು ಸಹ ಘಟನೆಯಲ್ಲಿ ಗಾಯಗೊಂಡಿದ್ದಾರೆ, ಮತ್ತು ಭದ್ರತಾ ಕಾರ್ಯಾಚರಣೆಗಳಿಂದಾಗಿ ಹಲವು ರಸ್ತೆಗಳು ಇನ್ನೂ ಮುಚ್ಚಲ್ಪಟ್ಟಿವೆ.
ಇದನ್ನು ಓದಿದ್ದೀರಾ? 12 ರಾಜ್ಯಗಳಲ್ಲಿ 2ನೇ ಹಂತದ ಮತದಾರರ ವಿಶೇಷ ತೀವ್ರ ಪರಿಷ್ಕರಣೆ: ಚುನಾವಣಾ ಆಯೋಗ ಘೋಷಣೆ
ಒಂದು ವರ್ಷದ ತನಿಖೆಯ ನಂತರ, ಸಿವಿಲ್ ಮತ್ತು ಮಿಲಿಟರಿ ಪೊಲೀಸರ ಜಂಟಿ ಕಾರ್ಯಾಚರಣೆಯು ‘ರೆಡ್ ಕಮಾಂಡ್’ ಗ್ಯಾಂಗ್ನ ಡ್ರಗ್ಸ್ ಮತ್ತು ಶಸ್ತ್ರಾಸ್ತ್ರ ಕಳ್ಳಸಾಗಾಣಿಕೆ ಜಾಲವನ್ನು ಭೇದಿಸುವ ಗುರಿಯನ್ನು ಹೊಂದಿತ್ತು. ಈ ಗ್ಯಾಂಗ್ ನಾರ್ಕೋಟಿಕ್ಸ್ ಕಳ್ಳಸಾಗಾಣಿಕೆ, ಶಸ್ತ್ರಾಸ್ತ್ರ ಪೂರೈಕೆ ಮತ್ತು ಕರಾವಳಿ ಮಾರ್ಗಗಳ ಮೂಲಕ ಅಕ್ರಮ ವ್ಯಾಪಾರವನ್ನು ನಿಯಂತ್ರಿಸುತ್ತಿದೆ ಎಂದು ಸರ್ಕಾರ ಹೇಳಿದೆ.
ಈ ಕಾರ್ಯಾಚರಣೆಯ ದೇಶಕ್ಕೆ ಮಹತ್ವದ್ದಾಗಿದೆ, ಏಕೆಂದರೆ ರಾಜಧಾನಿ ರಿಯೊ ಡಿ ಜನೈರೊದಲ್ಲಿ ಮುಂದಿನ ವಾರ C40 ಮೇಯರ್ಗಳ ಶೃಂಗಸಭೆ ಮತ್ತು ಪ್ರಿನ್ಸ್ ವಿಲಿಯಂ ಅವರ ಸಮಾರಂಭವನ್ನು ಆಯೋಜಿಸಲಿದೆ. ಇದಲ್ಲದೇ, ನವೆಂಬರ್ನಲ್ಲಿ ಬ್ರೆಜಿಲ್ನ ಅಮೆಜಾನ್ನ ಬೆಲೆಮ್ನಲ್ಲಿ ವಿಶ್ವಸಂಸ್ಥೆಯ COP30 ಹವಾಮಾನ ಶೃಂಗಸಭೆ ನಡೆಯಲಿದೆ. ಈ ಕಾರ್ಯಕ್ರಮಗಳಿಗೆ ಸುರಕ್ಷತೆಯನ್ನು ಖಾತರಿಪಡಿಸುವುದು ಮತ್ತು ರಿಯೊದಂತಹ ಹಿಂಸಾತ್ಮಕ ನಗರದಲ್ಲಿ ಸಂಘಟಿತ ಅಪರಾಧವನ್ನು ತಡೆಗಟ್ಟಲು ಈ ಕಾರ್ಯಾಚರಣೆ ಕೈಗೊಳ್ಳಲಾಗಿತ್ತು.
