ಭಾರತದಲ್ಲಿ ಚೆನ್ನೈ ಜಿಲ್ಲೆಗೆ 2.20 ಲಕ್ಷ H-1B ವೀಸಾಗಳು ಮಂಜೂರಾಗಿವೆ ಎಂದು ಅಮೆರಿಕದ ಮಾಜಿ ಪ್ರತಿನಿಧಿ ಹಾಗೂ ಅರ್ಥಶಾಸ್ತ್ರಜ್ಞ ಡಾ. ಡೇವ್ ಬ್ರಾಟ್ ಆರೋಪಿಸಿದ್ದಾರೆ.
ಸ್ಟೀವ್ ಬ್ಯಾನನ್ ಅವರ ಪಾಡ್ಕಾಸ್ಟ್ನಲ್ಲಿ ಮಾತನಾಡಿದ ಬ್ರಾಟ್, ವಾರ್ಷಿಕ ಮಿತಿ 85,000 ಇದ್ದರೂ, ಭಾರತದ ಚೆನ್ನೈ ಜಿಲ್ಲೆಗೆ ಮಾತ್ರ 2.20 ಲಕ್ಷ H-1B ವೀಸಾಗಳು ಮಂಜೂರು ಮಾಡಲಾಗಿದೆ. H-1B ವೀಸಾ ಕೇಳುವಾಗ ನಿಮ್ಮ ಕುಟುಂಬದ ಬಗ್ಗೆ ಯೋಚಿಸಿ; ಈ ವಂಚಿತ ವೀಸಾಗಳು ಅವರ ಭವಿಷ್ಯ ಕದ್ದಿವೆ. H-1B ವೀಸಾಗಳಲ್ಲಿ ಚೀನಾದ ಪಾಲು ಕೇವಲ 12 ಶೇಕಡಾ ಎಂದೂ ಅವರು ಹೇಳಿದ್ದಾರೆ.
2024ರಲ್ಲಿ ಚೆನ್ನೈ ನಲ್ಲಿನ ಅಮೆರಿಕದ ರಾಯಭಾರ ಕಚೇರಿ 2.20 ಲಕ್ಷ H-1B ಮತ್ತು 1.40 ಲಕ್ಷ H-4 ಅವಲಂಬಿತ ವೀಸಾಗಳನ್ನು ಪ್ರಕ್ರಿಯೆಗೊಳಿಸಿದೆ.
ಶೇ.80–90 ರಷ್ಟು ಅರ್ಜಿಗಳು ನಕಲಿ
ಈ ನಡುವೆ, ಭಾರತೀಯ ಮೂಲದ ಅಮೆರಿಕದ ವಿದೇಶಾಂಗ ಸೇವೆಯಲ್ಲಿನ ಅಧಿಕಾರಿ ಮಹ್ವಾಶ್ ಸಿದ್ದಿಕಿ ಅವರು ಎರಡು ದಶಕಗಳ ಹಿಂದಿನ ಚೆನ್ನೈ ಕಾನ್ಸುಲೇಟ್ ಅನುಭವವನ್ನು ಹಂಚಿಕೊಂಡಿದ್ದು, ಮತ್ತೊಂದು ಚರ್ಚೆಗೆ ಕಾರಣವಾಗಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಕಾರ್ಪೊರೇಟ್ ಹಿತಕ್ಕಾಗಿ ಕಾರ್ಮಿಕರ ಹಕ್ಕುಗಳ ಹತ್ತಿಕ್ಕುತ್ತಿರುವ ಮೋದಿ
2005–07ರ ಅವಧಿಯಲ್ಲಿ ಕಾನ್ಸುಲೇಟ್ನಲ್ಲಿ ಸೇವೆ ಸಲ್ಲಿಸಿದ ಅವರು, “ಭಾರತದಿಂದ ಸಲ್ಲಿಸಲಾಗುವ H-1B ಅರ್ಜಿಗಳಲ್ಲಿ ಶೇ. 80–90 ರಷ್ಟು ನಕಲಿ ದಾಖಲೆಗಳೇ ತುಂಬಿರುತ್ತದೆ. ನಕಲಿ ಪದವಿಗಳು, ನಕಲಿ ವಿವಾಹ ಪ್ರಮಾಣಪತ್ರಗಳು, ನಕಲಿ ಶೈಕ್ಷಣಿಕ ದಾಖಲೆಗಳು ಇವೆಲ್ಲ ಸಾಮಾನ್ಯವಾಗಿದ್ದವು” ಎಂದು ಅವರು ಆರೋಪಿಸಿದ್ದಾರೆ.
ಚೆನ್ನೈ ಕಾನ್ಸುಲೇಟ್ ಆಗ ಹೈದರಾಬಾದ್, ಕರ್ನಾಟಕ, ಕೇರಳ ಮತ್ತು ತಮಿಳುನಾಡು ರಾಜ್ಯಗಳಿಂದ ಬಂದ ಅರ್ಜಿಗಳನ್ನು ನಿರ್ವಹಿಸುತ್ತಿತ್ತು. ಇದರಲ್ಲೂ ಹೈದರಾಬಾದ್ ಅತ್ಯಂತ ಕಳವಳಕಾರಿ ಕೇಂದ್ರವಾಗಿದ್ದು, ಅಮೀರ್ಪೇಟೆಯಲ್ಲಿ ವೀಸಾ ಪಡೆಯಲು ನಕಲಿ ದಾಖಲೆಗಳನ್ನು ‘ಪ್ಯಾಕೇಜ್’ ಆಗಿ ನೀಡುವ ಮಳಿಗೆಗಳು ಇದ್ದವು ಎಂದು ಅವರು ಹೇಳಿದ್ದಾರೆ.
ಈ ಪೈಕಿ ಮಹ್ವಾಶ್ ಸಿದ್ದಿಕಿ ಅವರು ಸ್ವತಃ ಕನಿಷ್ಠ 51,000 H-1B ವೀಸಾ ಅರ್ಜಿಗಳನ್ನು ವಿಲೇವಾರಿ ಮಾಡಿರುವುದಾಗಿ ತಿಳಿಸಿದ್ದಾರೆ.
