ಮ್ಯಾನ್ಮಾರ್ನಲ್ಲಿ ಅಂತರ್ಯುದ್ಧ ತೀವ್ರಗೊಂಡಿದೆ. ಪಶ್ಚಿಮ ರಾಖೈನ್ ರಾಜ್ಯದ ಮ್ರೌಕ್-ಯು ಜನರಲ್ ಆಸ್ಪತ್ರೆ ಮೇಲೆ ಮ್ಯಾನ್ಮಾರ್ ಮಿಲಿಟರಿ ವಾಯುದಾಳಿ ನಡೆಸಿದ್ದು, ಕನಿಷ್ಠ 31 ಮಂದಿ ಬಲಿಯಾಗಿದ್ದಾರೆ. ಸುಮಾರು 68 ಜನರು ಗಾಯಗೊಂಡಿದ್ದಾರೆ.
ಇದೇ ತಿಂಗಳ ಅಂತ್ಯದಲ್ಲಿ ಮ್ಯಾನ್ಮಾರ್ನಲ್ಲಿ ಚುನಾವಣೆ ನಡೆಯಲಿದೆ. ಚುನಾವಣಾ ಪ್ರಚಾರಗಳು ನಡೆಯುತ್ತಿರುವ ಸಮಯದಲ್ಲಿಯೇ ಅಂತರ್ಯುದ್ಧವೂ ಭುಗಿಲೆದ್ದಿದೆ.
ಮ್ಯಾನ್ಮಾರ್ನಲ್ಲಿ 2021ರಲ್ಲಿ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಅಂತ್ಯಗೊಳಿಸಿ, ದೇಶದ ಅಧಿಕಾರವನ್ನು ಮಿಲಿಟರಿ ಕಸಿದುಕೊಂಡಿತ್ತು. ಮಿಲಿಟರಿ ಆಡಳಿತದ ವಿರುದ್ಧ ನಿರಂತರ ಪ್ರತಿಭಟನೆಗಳನ್ನು ನಡೆಯುತ್ತಲೇ ಇವೆ. ಜನಾಕ್ರೋಶವನ್ನು ಹತ್ತಿಕ್ಕಲು ಜುಂಟಾ (ಮ್ಯಾನ್ಮಾರ್ ಸೇನೆ) ವಾಯುದಾಳಿಗಳನ್ನು ನಡೆಸುತ್ತಿದೆ ಎಂದು ಸ್ಥಳೀಯ ನೆರವು ಕಾರ್ಯಕರ್ತ ವೈ ಹುನ್ ಆಂಗ್ ಹೇಳಿರುವುದಾಗಿ ವರದಿಯಾಗಿದೆ.
ಇದೆಲ್ಲದರ ನಡುವೆ, ಮಿಲಿಟರಿಯು ಡಿಸೆಂಬರ್ 28ರಿಂದ ಚುನಾವಣೆ ನಡೆಸಲು ನಿರ್ಧರಿಸಿದೆ. ಹೋರಾಟವನ್ನು ಬದಿಗಿಟ್ಟು, ಮತದಾನ ಮಾಡಬೇಕೆಂದು ಹೇಳುತ್ತಿದೆ.
“ಪರಿಸ್ಥಿತಿ ತುಂಬಾ ಭಯಾನಕವಾಗಿದೆ. ಈಗಾಗಲೇ 31 ಸಾವುಗಳು ಸಂಭವಿಸಿವೆ. ಸಾವಿನ ಸಂಖ್ಯೆ ಇನ್ನೂ ಹೆಚ್ಚಬಹುದು. 68 ಮಂದಿ ಗಾಯಗೊಂಡಿದ್ದಾರೆ. ರಕ್ಷಣೆ ಮತ್ತು ನೆರವು ಕಾರ್ಯಗಳು ನಡೆಯುತ್ತಿವೆ” ಎಂದು ಆಂಗ್ ಹೇಳಿದ್ದಾರೆ.
ಕಳೆದ ವಾರ, ಮ್ಯಾನ್ಮಾನ್ನ ಅಪ್ಪರ್-ಮಿಡ್ಲ್ ಸಾಗಿಂಗ್ ಪ್ರದೇಶದಲ್ಲಿ ಚಹಾ ಅಂಗಡಿಯ ಮೇಲೆ ಮ್ಯಾನ್ಮಾರ್ ಸೇನೆ ದಾಳಿ ನಡೆಸಿ, 18 ನಾಗರಿಕರನ್ನು ಕೊಂದಿತು. ದಾಳಿಯಲ್ಲಿ 20 ಮಂದಿ ಗಾಯಗೊಂಡಿದ್ದರು.
2021ರ ಫೆಬ್ರವರಿಯಲ್ಲಿ ಆಂಗ್ ಸಾನ್ ಸೂಕಿ ಅವರ ನೇತೃತ್ವದ ಚುನಾಯಿತ ಸರ್ಕಾರವನ್ನು ಮ್ಯಾನ್ಮಾರ್ ಸೇನೆಯು ಉರುಳಿಸಿತು. ಅಧಿಕಾರವನ್ನು ತನ್ನ ವಶಕ್ಕೆ ಪಡೆದುಕೊಂಡಿತು. ಅಂದಿನಿಂದ, ಮ್ಯಾನ್ಮಾರ್ ಪ್ರಕ್ಷುಬ್ಧತೆಯಿಂದ ಕೂಡಿದೆ. ವ್ಯಾಪಕವಾದ ಜನಾಕ್ರೋಶಕ್ಕೆ ಗುರಿಯಾಗಿದೆ. ಸೇನೆಯ ದಮನದ ವಿರುದ್ಧ ಕೆಲವು ಗುಂಪುಗಳು ಶಸ್ತ್ರಾಸ್ತ್ರ ಹೋರಾಟವನ್ನೂ ನಡೆಸುತ್ತಿವೆ.
