ವಿಶ್ವಪ್ರಸಿದ್ಧ WWE ಕುಸ್ತಿಪಟು ಹಲ್ಕ್ ಹೊಗನ್ (71) ಗುರುವಾರ ಬೆಳಗ್ಗೆ ಅಮೆರಿಕದ ಫ್ಲೋರಿಡಾದ ಆಸ್ಪತ್ರೆಯೊಂದರಲ್ಲಿ ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಕುತ್ತಿಗೆ ಮತ್ತು ಬೆನ್ನು ನೋವಿನ ಸಮಸ್ಯೆಯಿಂದ ಬಳಲುತ್ತಿದ್ದ ಅವರು ಮೇ ತಿಂಗಳಲ್ಲಿ ಕುತ್ತಿಗೆ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಕೆಲ ದಿನಗಳಿಂದ ಕೋಮಾದಲ್ಲಿದ್ದ ಹೊಗನ್, ಚಿಕಿತ್ಸೆ ಫಲಕಾರಿಯಾಗದೇ ಕೊನೆಯುಸಿರೆಳೆದರು.
ಆಗಸ್ಟ್ 11, 1953ರಂದು ಅಮೆರಿಕದ ಜಾರ್ಜಿಯಾದಲ್ಲಿ ಜನಿಸಿದ ಹಲ್ಕ್ ಹೊಗನ್, 1980 ಮತ್ತು 1990ರ ದಶಕದಲ್ಲಿ ವೃತ್ತಿಪರ ಕುಸ್ತಿಯ ಸೂಪರ್ಸ್ಟಾರ್ ಆಗಿ ಮಿಂಚಿದ್ದರು. ಹ್ಯಾಂಡಲ್ಬಾರ್ ಮೀಸೆ, ಹಳದಿ ಕನ್ನಡಕ ಮತ್ತು “ಹಲ್ಕಮೇನಿಯಾ” ಘೋಷಣೆಯಿಂದ ಜನಮನ ಗೆದ್ದಿದ್ದ ಅವರು ಆರು ಬಾರಿ WWE ಚಾಂಪಿಯನ್ ಆಗಿದ್ದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಮಹದಾಯಿ: ನಾಯಕರೇ ನಾಡದ್ರೋಹಿಗಳು
ಕುಸ್ತಿಯನ್ನು ಜನಪ್ರಿಯಗೊಳಿಸುವಲ್ಲಿ ಅವರ ವಿಚಿತ್ರ ವರ್ತನೆ ಮತ್ತು ನಾಟಕೀಯ ಅಭಿನಯ ಮಕ್ಕಳು, ಕುಟುಂಬಗಳ ಸೇರಿದಂತೆ ಲಕ್ಷಾಂತರ ಅಭಿಮಾನಿಗಳನ್ನು ಸೆಳೆಯಿತು. ಚಲನಚಿತ್ರಗಳು, ಟಿವಿ ಕಾರ್ಯಕ್ರಮಗಳು ಮತ್ತು ಜಾಹೀರಾತುಗಳಲ್ಲಿಯೂ ಅವರು ಗುರುತಿಸಿಕೊಂಡಿದ್ದರು.
ಹಲ್ಕ್ ಹೊಗನ್ ಅವರನ್ನು ಮೊದಲು 2005 ರಲ್ಲಿ WWE ಹಾಲ್ ಆಫ್ ಫೇಮ್ಗೆ ಸೇರಿಸಲಾಗಿತ್ತು. 2015ರಲ್ಲಿ Gawker ಮಾಧ್ಯಮ ಸಂಸ್ಥೆಯಿಂದ ಸೆಕ್ಸ್ ಟೇಪ್ ಮತ್ತು ಜನಾಂಗೀಯ ಹೇಳಿಕೆ ಆರೋಪದಿಂದ ವಿವಾದಕ್ಕೆ ಸಿಲುಕಿದ್ದರು. ಇದರಿಂದಾಗಿ ಅವರ ಹೆಸರನ್ನು ಹಾಲ್ ಆಫ್ ಫೇಮ್ನಿಂದ ತೆಗೆದುಹಾಕಲಾಗಿತ್ತು. ಆದರೆ, Gawker ವಿರುದ್ಧ ಕಾನೂನು ಹೋರಾಟದಲ್ಲಿ ಗೆದ್ದ ಹೊಗನ್ ಭಾರೀ ಪರಿಹಾರ ಪಡೆದರು. ಈ ಪ್ರಕರಣದಿಂದ Gawker ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿ ದಿವಾಳಿಯಾಯಿತು.
