ಭಾರತ ಮತ್ತು ಚೀನಾ ನಡುವಿನ ಸಂಬಂಧಗಳು ಸುಧಾರಣೆಯತ್ತ ಸಾಗುತ್ತಿರುವಂತೆ, ಎರಡೂ ದೇಶಗಳ ನಡುವೆ ನೇರ ವಿಮಾನ ಸಂಪರ್ಕ ಪುನರಾರಂಭವಾಗಿದೆ.
ಕೋಲ್ಕತ್ತಾದಿಂದ ಇಂಡಿಗೋ ವಿಮಾನ 6E 1703 ಸೋಮವಾರ 180 ಪ್ರಯಾಣಿಕರೊಂದಿಗೆ ಚೀನಾದ ಗುವಾಂಗ್ಝೌಗೆ ತಲುಪಿತು. ಕೋವಿಡ್-19 ಸಾಂಕ್ರಾಮಿಕ ರೋಗದಿಂದಾಗಿ 2020ರಲ್ಲಿ ವಿಮಾನ ಸಂಪರ್ಕ ಸ್ಥಗಿತಗೊಂಡಿತ್ತು. ಜೊತೆಗೆ, ವಿವಾದಿತ ಹಿಮಾಲಯದ ಗಡಿಯಲ್ಲಿ 2020ರಲ್ಲಿ ನಡೆದ ಘರ್ಷಣೆಯಿಂದಾಗಿ ಉದ್ವಿಗ್ನತೆ ಹೆಚ್ಚಾಗಿ, ಸಂಪರ್ಕ ಚೇತರಿಸಿಕೊಂಡಿರಲಿಲ್ಲ.
ಆದರೆ, ಇತ್ತೀಚಿನ ದಿನಗಳಲ್ಲಿ ಎರಡೂ ದೇಶಗಳು ಸಂಬಂಧವನ್ನು ಮರುಸ್ಥಾಪಿಸಲು ಪ್ರಯತ್ನಿಸುತ್ತಿವೆ. ಕಳೆದ ವರ್ಷ ಗಡಿಗಾವಲು ಒಪ್ಪಂದವೊಂದಕ್ಕೆ ಸಹಿ ಹಾಕಲಾಗಿತ್ತು. ಆಗಸ್ಟ್ನಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ ಏಳು ವರ್ಷಗಳ ಬಳಿಕ ಚೀನಾಕ್ಕೆ ಭೇಟಿ ನೀಡಿದ್ದರು. ಅದೇ ತಿಂಗಳು ಚೀನಾದ ವಿದೇಶಾಂಗ ಸಚಿವ ವಾಂಗ್ ಯಿ ಭಾರತಕ್ಕೆ ಆಗಮಿಸಿದ್ದರು.
ಕೇಂದ್ರ ಸರ್ಕಾರವು, ವಿಮಾನ ಸಂಪರ್ಕ ಪುನರಾರಂಭವು ಜನರ ನಡುವಿನ ಸಂಪರ್ಕವನ್ನು ಸುಗಮಗೊಳಿಸಲಿದೆ ಎಂದು ಹೇಳಿದೆ. ಚೀನಾದ ಪ್ರವಾಸಿಗರಿಗೆ ಭಾರತವು ವೀಸಾ ನೀಡಿಕೆಯನ್ನೂ ಪುನರಾರಂಭಿಸಿದೆ.
ಚೀನಾ ಈಸ್ಟರ್ನ್ ಏರ್ಲೈನ್ಸ್ ನವೆಂಬರ್ನಲ್ಲಿ ಶಾಂಘೈ-ದೆಹಲಿ ವಿಮಾನವನ್ನು ಆರಂಭಿಸಲಿದೆ.
ಕೋಲ್ಕತ್ತಾ ವಿಮಾನ ನಿಲ್ದಾಣದಲ್ಲಿ ಭಾನುವಾರ ಸಂಜೆ ಇಂಡಿಗೋ ಪ್ರಯಾಣಿಕರಿಗೆ ಚೆಕ್-ಇನ್ ಸಂದರ್ಭದಲ್ಲಿ, ದೀಪಗಳನ್ನು ಬೆಳಗಿ ವಿಮಾನ ಸಂಪರ್ಕ ಪುನರಾರಂಭ ಸಮಾರಂಭವನ್ನು ಆಚರಿಸಲಾಯಿತು. ಚೀನಾದ ಒಬ್ಬ ಹಿರಿಯ ಕಾನ್ಸುಲರ್ ಅಧಿಕಾರಿ ಕ್ವಿನ್ ಯಾಂಗ್, ಇದು ಭಾರತ-ಚೀನಾ ಸಂಬಂಧಕ್ಕೆ “ಅತ್ಯಂತ ಮಹತ್ವದ ದಿನ” ಎಂದು ಹೇಳಿದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಆಗ ತಲೆ ಮೇಲೆ ಹೊತ್ತು ಮೆರೆಸಿದವರು ಈಗ ಪಲಾಯನ ಮಾಡುವುದು ತರವೇ?
“ನಾನು ಕೋವಿಡ್ಗೆ ಮೊದಲು ಕೋಲ್ಕತ್ತಾ ಮತ್ತು ಚೀನಾ ನಡುವೆ ಆಗಾಗ ಪ್ರಯಾಣಿಸುತ್ತಿದ್ದೆ. ಈಗ ನೇರ ಸಂಪರ್ಕ ಮರಳಿದ್ದರಿಂದ ನಿಯಮಿತ ಪ್ರಯಾಣ ಪುನರಾರಂಭಿಸಲು ಬಯಸುತ್ತೇನೆ” ಎಂದು ಪ್ರಯಾಣಿಕರೊಬ್ಬರು ತಿಳಿಸಿದರು.
ಇಂಡಿಗೋ ವಿಮಾನದ ಒಬ್ಬ ಪ್ರಯಾಣಿಕರು, “ಕಳೆದ ಐದು ವರ್ಷಗಳಿಂದ ದೆಹಲಿ ಮತ್ತು ಬ್ಯಾಂಕಾಕ್ ಮೂಲಕ ಚೀನಾಕ್ಕೆ ಪ್ರಯಾಣಿಸಬೇಕಿತ್ತು. ಇದು ದುಸ್ತರವಾಗಿದ್ದು, ದುಬಾರಿಯಾಗಿತ್ತು. ಈಗ ನೇರ ವಿಮಾನವು ಕೇವಲ ಮೂರುವರೆ ಗಂಟೆಗಳಲ್ಲಿ ತಲುಪುತ್ತದೆ ಮತ್ತು ವೆಚ್ಚವೂ ಕಡಿಮೆ” ಎಂದರು.
ನವೆಂಬರ್ 10ರಂದು ಇಂಡಿಗೋ ದೆಹಲಿ-ಗುವಾಂಗ್ಝೌ ಸೇವೆಯನ್ನು ಆರಂಭಿಸಲಿದೆ. ಚೀನಾ ಈಸ್ಟರ್ನ್ ಏರ್ಲೈನ್ಸ್ ಒಂದು ದಿನ ಮೊದಲು ಶಾಂಘೈ-ದೆಹಲಿ ಸೇವೆ ಆರಂಭಿಸಲಿದೆ. 2020ರಲ್ಲಿ ಗಡಿ ಉದ್ವಿಗ್ನತೆಯಿಂದಾಗಿ ಸ್ಥಗಿತಗೊಂಡಿದ್ದ 40ಕ್ಕೂ ಹೆಚ್ಚು ವಿಮಾನಗಳು ಈಗ ಪುನರಾರಂಭವಾಗುತ್ತಿವೆ.
ಚೀನಾದ ನಾಗರಿಕರಿಗೆ ಭಾರತವು ಪ್ರವಾಸಿ ವೀಸಾವನ್ನು ಪುನರಾರಂಭಿಸಿದ್ದು, ವಿಮಾನ ಸಂಪರ್ಕಕ್ಕೆ ದಾರಿಮಾಡಿಕೊಟ್ಟಿತು. ಈ ವರ್ಷ ಜನವರಿಯಲ್ಲಿ ವಿದೇಶಾಂಗ ಕಾರ್ಯದರ್ಶಿ ವಿಕ್ರಮ್ ಮಿಸ್ರಿ ಅವರ ಚೀನಾ ಭೇಟಿಯ ವೇಳೆ ಈ ಒಪ್ಪಂದವು ರೂಪುಗೊಂಡಿತ್ತು.
