ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೊಮ್ಮೆ ಭಾರತವನ್ನು ಗುರಿಯಾಗಿಸಿಕೊಂಡಿದ್ದು, ಭಾರತವೇ “ಅತಿ ಹೆಚ್ಚು ಸುಂಕ ವಿಧಿಸುವ ರಾಷ್ಟ್ರ” ಎಂದು ಟೀಕಿಸಿದ್ದಾರೆ.
ಸ್ಕಾಟ್ ಜೆನ್ನಿಂಗ್ಸ್ ರೇಡಿಯೊ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, “ಚೀನಾ, ಭಾರತ, ಬ್ರೆಜಿಲ್ — ಎಲ್ಲರೂ ನಮ್ಮನ್ನು ಸುಂಕಗಳಿಂದ ಕೊಲ್ಲುತ್ತಿದ್ದಾರೆ. ಆದರೆ ನನ್ನ ತೀಕ್ಷ್ಣ ನಿಲುವಿನಿಂದ ಭಾರತ ಸುಂಕ ರಹಿತ ವ್ಯಾಪಾರಕ್ಕೆ ಸಮ್ಮತಿಸಿತು” ಎಂದು ಹೇಳಿದರು.
“ನಾನು ಸುಂಕವನ್ನು ವಿಧಿಸದಿದ್ದರೆ ಭಾರತ ಯಾವತ್ತೂ ಇಂತಹ ಕೊಡುಗೆ ನೀಡುತ್ತಿರಲಿಲ್ಲ. ಸುಂಕವೇ ನಮಗೆ ಬಲಿಷ್ಠವಾದ ಮಾತುಕತೆಯ ಶಕ್ತಿ ನೀಡುತ್ತಿದೆ” ಎಂದು ಟ್ರಂಪ್ ಹೇಳಿದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ದ್ವೇಷವನ್ನು ಪ್ರೀತಿಯಿಂದ ಗೆಲ್ಲಬೇಕೆಂದ ಉಮರ್ ಪರಮ ಪಾತಕಿಯೇ?
ಅಮೆರಿಕದ ಹಾರ್ಲೆ ಡೇವಿಡ್ಸನ್ ಬೈಕ್ಗೆ ಭಾರತವು ವಿಧಿಸಿದ್ದ ಶೇ. 200 ಸುಂಕವನ್ನು ಉದಾಹರಣೆಯಾಗಿ ನೀಡಿದ ಟ್ರಂಪ್, ಇಂತಹ ಅಡ್ಡಿಗಳು ಅಮೆರಿಕ ಕಂಪನಿಗಳನ್ನು ಭಾರತ ಪ್ರವೇಶಿಸಲು ಹಿಂಜರಿಯುವಂತೆ ಮಾಡಿವೆ ಎಂದರು.
ಇತ್ತ ಭಾರತ ತನ್ನ ನಿಲುವನ್ನು ಸ್ಪಷ್ಟಪಡಿಸಿದ್ದು, ವ್ಯಾಪಾರ ಮಾತುಕತೆಗಳು ಮುಂದುವರಿಯುತ್ತಿವೆ ಎಂದು ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ತಿಳಿಸಿದ್ದಾರೆ.
ಅಮೆರಿಕವು ಭಾರತದ ಆಮದುಗಳ ಮೇಲೆ ಶೇ. 50 ಸುಂಕ ವಿಧಿಸಿರುವುದರ ಹಿಂದೆ, ನವದೆಹಲಿಯ ರಷ್ಯಾದ ಕಚ್ಚಾ ತೈಲ ಖರೀದಿ ನಿರ್ಧಾರವೇ ಕಾರಣವಾಗಿದೆ. ಆದರೆ ಭಾರತ, “ನಾವು ತೈಲ ಖರೀದಿಯನ್ನು ಮಾರುಕಟ್ಟೆ ಪರಿಸ್ಥಿತಿ ಹಾಗೂ ಜನರ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟು ಮಾಡುತ್ತಿದ್ದೇವೆ” ಎಂದು ಅಮೆರಿಕದ ಟೀಕೆಗೆ ತಿರುಗೇಟು ನೀಡಿದೆ.
