ಅಮೆರಿಕದ ವಿಶ್ವಪ್ರಸಿದ್ಧ ಹೂಡಿಕೆ ಸಂಸ್ಥೆ “ಬ್ಲ್ಯಾಕ್ರಾಕ್’ ಮತ್ತು ಅದರ ಖಾಸಗಿ ಸಾಲ ಹೂಡಿಕೆ ವಿಭಾಗವು, ಸುಮಾರು 500 ಮಿಲಿಯನ್ ಡಾಲರ್(4150 ಕೋಟಿ ರೂ.) ಹಣಕಾಸು ವಂಚನೆಗೆ ಒಳಗಾಗಿದೆ. ಈ ವಂಚನೆಯ ಹಿಂದಿರುವ ವ್ಯಕ್ತಿ ಭಾರತೀಯ ಮೂಲದ ದೂರಸಂಪರ್ಕ ಉದ್ಯಮಿ ‘ಬಂಕಿಮ್ ಬ್ರಹ್ಮಭಟ್’ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ವಾಲ್ ಸ್ಟ್ರೀಟ್ ಜರ್ನಲ್ ವರದಿಯ ಪ್ರಕಾರ, ಬ್ರಹ್ಮಭಟ್ ಅವರ ಕಂಪನಿಗಳಾದ ‘ಬ್ರಾಡ್ಬ್ಯಾಂಡ್ ಟೆಲಿಕಾಂ’ ಮತ್ತು ‘ಬ್ರಿಡ್ಜ್ವಾಯ್ಸ್’ ನಕಲಿ ಬಿಲ್ಗಳು ಹಾಗೂ ಕೃತಕ ಲೆಕ್ಕ ಪತ್ರಗಳನ್ನು ಬಳಸಿ ನೂರಾರು ಕೋಟಿ ಡಾಲರ್ಗಳ ಸಾಲ ಪಡೆದುಕೊಂಡಿವೆ. ಈ ಸಾಲಗಳಿಗೆ ಭರವಸೆಯಾಗಿ ತೋರಿಸಲಾದ ಆಸ್ತಿಗಳು ಮತ್ತು ಗ್ರಾಹಕರ ಬಾಕಿ ಹಣಗಳು ನಕಲಿಯಾಗಿದ್ದವು ಎನ್ನಲಾಗಿದೆ. ವಂಚನೆಯ ನಂತರ, ಹಣದ ಒಂದು ಭಾಗವನ್ನು ಭಾರತ ಹಾಗೂ ಮೋರಿಷಸ್ನಲ್ಲಿರುವ ಖಾತೆಗಳಿಗೆ ವರ್ಗಾಯಿಸಲಾಗಿದೆ ಎಂಬ ಆರೋಪವೂ ಇದೆ.
ಈ ಕೃತ್ಯದಿಂದ ಬ್ಲ್ಯಾಕ್ರಾಕ್ನ ಹೆಚ್ಪಿಎಸ್ ಇನ್ವೆಸ್ಟ್ಮೆಂಟ್ ಪಾರ್ಟ್ನರ್ಸ್ ಮತ್ತು ಫ್ರೆಂಚ್ ಬ್ಯಾಂಕ್ ಬಿಎನ್ಪಿ ಪಾರಿಬಾಸ್ ಕಂಪನಿಗಳು ವಂಚನೆಗೊಳಗಾಗಿವೆ .ಬಿಎನ್ಪಿ ಪಾರಿಬಾಸ್ ಕಂಪನಿಯು ಈ ಸಾಲದ ಸುಮಾರು ಅರ್ಧಭಾಗವನ್ನು ಹಣಕಾಸು ನೆರವಿನ ರೂಪದಲ್ಲಿ ನೀಡಿತ್ತು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಡಿಕೆಶಿ – ತೇಜಸ್ವಿ ಸೂರ್ಯ ಕಚ್ಚಾಟದಲ್ಲಿ ಬೆಂಗಳೂರಿಗಿಲ್ಲ ಲಾಭ!
ಜುಲೈ 2025ರಲ್ಲಿ, ಎಚ್ಪಿಎಸ್ ಸಂಸ್ಥೆಯೊಬ್ಬ ನೌಕರರೊಬ್ಬರು ಗ್ರಾಹಕರ ಇಮೇಲ್ ವಿಳಾಸಗಳಲ್ಲಿ ಸಂಶಯಾಸ್ಪದ ಅಂಶಗಳನ್ನು ಗಮನಿಸಿದರು. ಹೆಚ್ಚಿನ ತನಿಖೆಯಲ್ಲಿ, ಹಲವಾರು ಗ್ರಾಹಕರ ಇಮೇಲ್ಗಳು ನಕಲಿ ಡೊಮೇನ್ಗಳಿಂದ ಬಂದಿದ್ದು, ನಕಲಿ ಕಂಪನಿಗಳನ್ನು ಸೃಷ್ಟಿಸಿ ದಾಖಲೆಗಳನ್ನು ಕೃತಕವಾಗಿ ತಯಾರಿಸಲಾಗಿದೆ ಎಂದು ಪತ್ತೆಯಾಯಿತು.
ಪ್ರಶ್ನೆಗಳಿಗೆ ಉತ್ತರಿಸಲು ಬ್ರಹ್ಮಭಟ್ ಮೊದಲು ನಿರಾಕರಿಸಿ, ಬಳಿಕ ಸಂಪರ್ಕ ಕಳೆದುಕೊಂಡರು. ಅವರ ‘ಗಾರ್ಡನ್ ಸಿಟಿ (ನ್ಯೂಯಾರ್ಕ್) ಕಚೇರಿ ಬಾಗಿಲು ಹಾಕಲ್ಪಟ್ಟಿತ್ತು. ಅಲ್ಲಿ ಯಾವುದೇ ಸಿಬ್ಬಂದಿ ಕಾಣಿಸಲಿಲ್ಲ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಅವರ ನಿವಾಸದ ಮುಂದೆ ಬಿಎಂಡಬ್ಲ್ಯು, ಪೋರ್ಷೆ, ಟೆಸ್ಲಾ ಮತ್ತು ಆಡಿ ಕಾರುಗಳು ನಿಲ್ಲಿಸಿದ್ದನ್ನು ವರದಿಗಾರರು ಗಮನಿಸಿದ್ದಾರೆ.
