ಇರಾನ್ ನಲ್ಲಿ ಪ್ರತಿಭಟನೆಗಳು ತೀವ್ರಗೊಂಡಿವೆ. ಹಣದುಬ್ಬರ, ಜೀವನ ವೆಚ್ಚ ಏರುತ್ತಿರುವುದರ ವಿರುದ್ಧ ಸಣ್ಣಮಟ್ಟದಲ್ಲಿ ಆರಂಭವಾದ ಪ್ರತಿಭಟನೆಗಳು ಆಂದೋಲನದ ಸ್ವರೂಪ ಪಡೆದುಕೊಳ್ಳುತ್ತಿವೆ. ಇದರಿಂದ ಭಾರತದ ಬಾಸ್ಮತಿ ಅಕ್ಕಿ ರಫ್ತುದಾರರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಒಂದು ಕಾಲದಲ್ಲಿ ಭಾರತದ ಬಾಸ್ಮತಿಯ ಅತಿದೊಡ್ಡ ಖರೀದಿದಾರವಾಗಿದ್ದ ಇರಾನ್, ಇತ್ತೀಚಿನ ವರ್ಷಗಳಲ್ಲಿ ತನ್ನ ಬೇಡಿಕೆಯನ್ನು ಕಡಿತಗೊಳಿಸಿದೆ.
ಹಲವು ದಶಕಗಳಿಂದ ಭಾರತದ ಅನೇಕ ಕೃಷಿ ಉತ್ಪನ್ನಗಳು ಸೇರಿದಂತೆ ಬಾಸ್ಮತಿ ಅಕ್ಕಿಗೆ ಇರಾನ್ ಪ್ರಮುಖ ಮಾರುಕಟ್ಟೆಯಾಗಿತ್ತು. ಭಾರತದ ಬಾಸ್ಮತಿ ಖರೀದಿದಾರರ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದ ಇರಾನ್, ಮೂರನೇ ಸ್ಥಾನಕ್ಕೆ ಕುಸಿದಿದೆ. ಇರಾನ್ ನಲ್ಲಿ ನಡೆಯುತ್ತಿರುವ ಪ್ರತಿಭಟನೆಗಳು ಹಾಗೂ ರಾಜಕೀಯ ಅಸ್ಥಿರತೆಯಿಂದ ರಫ್ತು ಮತ್ತಷ್ಟು ಕುಸಿಯಬಹುದು ಎಂದು ಅಂದಾಜಿಸಲಾಗಿದೆ.
“ಈಗಾಗಲೇ ಕಳುಹಿಸಿದ ಬಾಸ್ಮತಿ ಅಕ್ಕಿ ಇರಾನಿನ ಬಂದರುಗಳಲ್ಲಿ ಸಿಲುಕಿಕೊಂಡಿವೆ. ಅಂದಾಜಿನ ಪ್ರಕಾರ 1,500 ಕೋಟಿ ರೂ.ಗಳಿಗಿಂತ ಹೆಚ್ಚು ಮೌಲ್ಯದ ಬಾಸ್ಮತಿ ಅಕ್ಕಿ ಅದರಲ್ಲಿದೆ” ಎಂದು ಭಾರತೀಯ ಅಕ್ಕಿ ರಫ್ತುದಾರರ ಒಕ್ಕೂಟ ಕಳವಳ ವ್ಯಕ್ತಪಡಿಸಿದೆ.
ಇರಾನ್ ನಲ್ಲಿ ಉಂಟಾಗಿರುವ ರಾಜಕೀಯ ಪ್ರಕ್ಷುಬ್ಧತೆಯಿಂದ ಭಾರತೀಯ ಕೃಷಿ ಮಾರುಕಟ್ಟೆ ಒತ್ತಡಕ್ಕೆ ಸಿಲುಕಿದೆ. 2024-25 ರಲ್ಲಿ ಭಾರತವು 8,897 ಕೋಟಿ ರೂ. ಮೌಲ್ಯದ ಕೃಷಿ ಉತ್ಪನ್ನಗಳನ್ನು ರಫ್ತು ಮಾಡಿದೆ. ಈ ಮೊತ್ತದಲ್ಲಿ ಬಾಸ್ಮತಿ ಅಕ್ಕಿಯ ಪಾಲು 6,374 ಕೋಟಿ ರೂ.ಗಳಷ್ಟಿದೆ. ಭಾರತದ ಒಟ್ಟು ಬಾಸ್ಮತಿ ರಫ್ತಿನಲ್ಲಿ ಇರಾನ್ನ ಪಾಲು ಶೇ 12.7 ರಷ್ಟಿದೆ. ಆದರೆ ಇದು ಕಡಿಮೆಯಾಗುವ ನಿರೀಕ್ಷೆಯಿದೆ.
ಇರಾನ್ ನಲ್ಲಿ ಹೆಚ್ಚುತ್ತಿರುವ ಹಣದುಬ್ಬರ ಮತ್ತು ಇರಾನ್ನ ಕರೆನ್ಸಿ ‘ರಿಯಾಲ್‘ನ ಮೌಲ್ಯದಲ್ಲಿನ ತೀವ್ರ ಕುಸಿತ ಉಂಟಾಗಿದೆ. ಇರಾನ್ ಜನರಿಗೆ ಖರೀದಿಸುವ ಶಕ್ತಿಯು ಕುಸಿಯುತ್ತಿದೆ. ಇದರಿಂದ ಭಾರತೀಯ ಕೃಷಿ ಮಾರುಕಟ್ಟೆಯ ಮೇಲೆ ಹೊಡೆತ ಬೀಳುವ ಸಾಧ್ಯತೆಯಿದೆ.
ಅಮೆರಿಕನ್ ಡಾಲರ್ ಎದುರು ಇರಾನಿನ ರಿಯಾಲ್(ಕರೆನ್ಸಿ) ಮೌಲ್ಯವು ತೀವ್ರ ಕುಸಿತ ಕಂಡಿದೆ. ಖರೀದಿ ಸಾಮರ್ಥ್ಯದ ಹೊರೆ ಹೆಚ್ಚಾಗಿದೆ. ಇದರ ಜೊತೆಗೆ ಇರಾನ್ನೊಂದಿಗೆ ವ್ಯಾಪಾರ ಮಾಡುವ ದೇಶಗಳ ಮೇಲೆ ಅಮೆರಿಕವು ಶೇ. 25% ಸುಂಕವನ್ನು ಘೋಷಿಸಿದ ನಂತರ ಒತ್ತಡ ಮತ್ತಷ್ಟು ಹೆಚ್ಚಾಗಿದೆ.
ಬಾಸ್ಮತಿ ಅಕ್ಕಿಯ ರಫ್ತು ದೀರ್ಘಕಾಲದವರೆಗೆ ತೊಂದರೆಗೆ ಸಿಲುಕಿದರೆ, ಹರಿಯಾಣ ಮತ್ತು ಪಂಜಾಬ್ನ ಅಕ್ಕಿ ವ್ಯಾಪಾರಿಗಳು ತೀವ್ರ ಪರಿಣಾಮ ಎದುರಿಸಬೇಕಾಗುತ್ತದೆ.
ಇರಾನ್ ನಲ್ಲಿ ನಡೆಯುತ್ತಿರುವ ಪ್ರತಿಭಟನೆಯಿಂದ ಡಿಸೆಂಬರ್ 2025ರಿಂದ ಮಾರ್ಚ್ 2026ರ ವರೆಗೂ ಭಾರತದ ಬಾಸ್ಮತಿ ಅಕ್ಕಿಯ ರಫ್ತುದಾರರು ಸಂಕಷ್ಟಕ್ಕೆ ಸಿಲುಕಲಿದ್ದಾರೆ ಎಂದು ಭಾರತೀಯ ಅಕ್ಕಿ ರಫ್ತುದಾರರ ಒಕ್ಕೂಟ ಹೇಳಿದೆ.
