ವಾಷಿಂಗ್ಟನ್ನ ಜಾರ್ಜ್ಟೌನ್ ವಿವಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದ ಭಾರತೀಯ ವಿದ್ಯಾರ್ಥಿ ಬಾದರ್ ಖಾನ್ ಸೂರಿ ಅವರ ಗಡಿಪಾರಿಗೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತ ನೀಡಿದ ಆದೇಶಕ್ಕೆ ಫೆಡರಲ್ ನ್ಯಾಯಾಧೀಶರು ತಡೆ ನೀಡಿದ್ದಾರೆ.
ವಿದ್ಯಾರ್ಥಿಯನ್ನು ಗಡಿಪಾರು ಮಾಡಿರುವುದು ಅಮೆರಿಕದ ವಿದೇಶಾಂಗ ನೀತಿ ಉಲ್ಲಂಘಿಸಲಿದೆ ಎಂದು ವಿದ್ಯಾರ್ಥಿ ಪರ ವಕೀಲರು ನ್ಯಾಯಾಲಯಕ್ಕೆ ಮನವರಿಕೆ ಮಾಡಿದ ನಂತರ ತಡೆ ನೀಡಲಾಗಿದೆ.
ಅಮೆರಿಕದ ಜಿಲ್ಲಾ ನ್ಯಾಯಾಧೀಶ ಪೆಟ್ರಿಷಿಯಾ ಗೈಲ್ಸ್ ಅವರು ವರ್ಜಿನಿಯಾದ ಅಲೆಕ್ಸಾಂಡ್ರಿಯಾದಲ್ಲಿ ಹೊರಡಿಸಿದ ಮೂರು ಪ್ಯಾರಾಗಳ ಆದೇಶದ ಪ್ರಕಾರ, ಈ ಆದೇಶವನ್ನು ನ್ಯಾಯಾಲಯವು ರದ್ದುಗೊಳಿಸುವವರೆಗೂ ಜಾರಿಯಲ್ಲಿರುತ್ತದೆ. ಇದರರ್ಥ, ನ್ಯಾಯಾಲಯವು ಇದನ್ನು ರದ್ದುಗೊಳಿಸಲು ಅಥವಾ ಮಾರ್ಪಡಿಸಲು ನಿರ್ಧರಿಸುವವರೆಗೂ ಈ ಆದೇಶ ಅಥವಾ ನಿರ್ಬಂಧವು ಜಾರಿಯಲ್ಲಿರುತ್ತದೆ.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಸ್ಯಾಂಕಿ ಕೆರೆಯಲ್ಲಿ ಸರ್ಕಾರಿ ಪ್ರಾಯೋಜಿತ ಮೌಢ್ಯಾರತಿ, ಯಾರಿಗಾಗಿ?
ಹೋಮ್ಲ್ಯಾಂಡ್ ಸೆಕ್ಯುರಿಟಿ ಇಲಾಖೆಯು ಬಾದರ್ ಖಾನ್ ಸೂರಿಯನ್ನು ಪ್ಯಾಲೆಸ್ತೀನ್ನ ಹಮಾಸ್ ಸಂಘಟನೆಯೊಂದಿಗೆ ಸಂಬಂಧ ಹೊಂದಿದ್ದಾನೆಂದು ಆರೋಪಿಸಿದ್ದಲ್ಲದೆ, ಬಾದರ್ ಅವರು ಸಾಮಾಜಿಕ ಮಾಧ್ಯಮಗಳಲ್ಲಿ ಹಮಾಸ್ ಪರ ಪ್ರಚಾರ ಮತ್ತು ಯಹೂದಿ ವಿರೋಧಿ ನೀತಿಯನ್ನು ಹರಡಿದ್ದಾರೆಂದು ತಿಳಿಸಿತ್ತು. ಈ ಹಿನ್ನೆಲೆಯಲ್ಲಿ ಮಾರ್ಚ್ 15ರಂದು, ರಾಜ್ಯ ಸಚಿವ ಮಾರ್ಕೊ ರೂಬಿಯೋ ಅವರು ಸೂರಿ ಅವರನ್ನು ಗಡಿಪಾರು ಮಾಡಲು ಆದೇಶಿಸಿದ್ದರು.
ಬಾದರ್ ಖಾನ್ ಸೂರಿ ಅವರ ವಕೀಲರು ಹೋಮ್ಲ್ಯಾಂಡ್ ಸೆಕ್ಯುರಿಟಿ ಇಲಾಖೆ ಆರೋಪವನ್ನು ತಳ್ಳಿಹಾಕಿದ್ದು, ಹಮಾಸ್ ಸಂಘಟನೆ ಜೊತೆ ತಮ್ಮ ಕಕ್ಷಿದಾರರು ಯಾವುದೇ ನಂಟು ಹೊಂದಿಲ್ಲ ಎಂದು ನ್ಯಾಯಾಲಯಕ್ಕೆ ಮನವರಿಕೆ ಮಾಡಿದರು.
ಸೂರಿ ಅವರು ಅಮೆರಿಕದಲ್ಲಿ ವಿದ್ಯಾರ್ಥಿ ವೀಸಾದ ಮೇಲೆ ವಾಸಿಸುತ್ತಿದ್ದು, ಅಮೆರಿಕದ ನಾಗರಿಕರೊಬ್ಬರನ್ನು ವಿವಾಹವಾಗಿದ್ದಾರೆ. ಅವರ ವಕೀಲರ ಪ್ರಕಾರ, ಅವರನ್ನು ಲೂಯಿಸಿಯಾನಾದ ಅಲೆಕ್ಸಾಂಡ್ರಿಯಾದಲ್ಲಿ ಸೆರೆಮನೆಯಲ್ಲಿಡಲಾಗಿದೆ. ಮಾ. 17 ರ ಮಧ್ಯರಾತ್ರಿ ಫೆಡರಲ್ ಏಜೆಂಟ್ಗಳು ವರ್ಜೇನಿಯಾದ ಸೂರಿ ಅವರ ಮನೆಯ ಬಳಿ ಬಲವಂತವಾಗಿ ಬಂಧಿಸಿದ್ದರು.
