ಉತ್ತರ ಮೆಕ್ಸಿಕೋದಲ್ಲಿರುವ ಸೂಪರ್ ಮಾರ್ಕೆಟ್ವೊಂದರಲ್ಲಿ ಭಾರೀ ಸ್ಪೋಟ ಸಂಭವಿಸಿದ್ದು, ಸುಮಾರು 23 ಮಂದಿ ಸಾವನ್ನಪ್ಪಿದ್ದಾರೆ. ಹಲವರು ಗಾಯಗೊಂಡಿದ್ದಾರೆ ಎಂಧು ವರದಿಯಾಗಿದೆ.
ನಗರ ಕೇಂದ್ರ ಭಾಗದಲ್ಲಿರುವ ʼವಾಲ್ಡೊಸ್ ಸ್ಟೋರ್ʼ ಎಂಬ ಸೂಪರ್ ಮಾರ್ಕೆಟ್ನಲ್ಲಿ ಘಟನೆ ನಡೆಸಿದೆ. ಅಸಮರ್ಪಕವಾಗಿ ಕಾರ್ಯನಿರ್ವಹಿಸುತ್ತಿದ್ದ ಟ್ರಾನ್ಸ್ಫಾರ್ಮರ್ನಿಂದ ಹೊಗೆ ಹೊಮ್ಮಿರುವುದರಿಂದ ಸ್ಫೋಟ ಸಂಭವಿಸಿರಬಹುದು ಎಂದು ಪ್ರಾಥಮಿಕ ತನಿಖೆಗಳು ಹೇಳಿವೆ.
ಯಾವುದೇ ಭಯೋತ್ಪಾದಕ ದಾಳಿಯ ಕುರುಹುಗಳಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಘಟನೆಯಲ್ಲಿ ಸುಮಾರು 11ಕ್ಕೂ ಹೆಚ್ಚು ಮಂದಿಗೆ ಗಂಭೀರ ಸುಟ್ಟಗಾಯಗಳಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ವಿವರಿಸಿದ್ದಾರೆ.
ಘಟನೆ ಕುರಿತು ವಿಡಿಯೊ ಸಂದೇಶವೊಂದನ್ನು ಹಂಚಿಕೊಂಡಿರುವ ಸೊನೊರಾ ರಾಜ್ಯದ ರಾಜ್ಯಪಾಲ ಅಲ್ಫೋನ್ಸೊ ಡುರಾಝೊ, “ಈ ದುರಂತದಲ್ಲಿ ಮೃತಪಟ್ಟಿವರಲ್ಲಿ ಹಲವರು ಅಪ್ರಾಪ್ತರಾಗಿರುವುದು ದುಃಖಕರ ಸಂಗತಿ. ಗಾಯಾಳುಗಳನ್ನು ಹೆರ್ಮಸಿಲ್ಲೊ ನಗರದಲ್ಲಿನ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ, ಘಟನೆಗೆ ಕಾರಣವೇನು ಮತ್ತು ಕಾರಣರಾದವರು ಯಾರು ಎಂಬುದನ್ನು ಪತ್ತೆ ಹಚ್ಚಲು ವಿಸ್ತೃತ ಮತ್ತು ಪಾರದರ್ಶಕ ತನಿಖೆಗೆ ಆದೇಶಿಸಿದ್ದೇನೆ” ಎಂದು ತಿಳಿಸಿದ್ದಾರೆ.
ಮೆಕ್ಸಿಕೋದಲ್ಲಿ ಸೆಪ್ಟೆಂಬರ್ನಲ್ಲಿಯೂ ಇಂಥಹದ್ದೇ ಸ್ಪೋಟ ಸಂಭವಿಸಿತ್ತು. ಆಗ, ಸುಮಾರು 49,500 ಲೀಟರ್ ಇಂಧನವನ್ನು ಸಾಗಿಸುತ್ತಿದ್ದ ಗ್ಯಾಸ್ ಟ್ಯಾಂಕರ್ ಟ್ರಕ್ ಪಲ್ಟಿಯಾಗಿ ಸ್ಫೋಟಗೊಂಡು ಮೂವರು ಜನರು ಸಾವನ್ನಪ್ಪಿದರು ಮತ್ತು ಐವತ್ತಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದರು.
