ಇಂಧನ ಟ್ಯಾಂಕರ್ ಸ್ಪೋಟಗೊಂಡು 150ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿರುವ ದುರ್ಘಟನೆ ನೈಜೀರಿಯಾದ ಅಬುಜಾದಲ್ಲಿ ನಡೆದಿದೆ. ಬುಧವಾರ ಸಂಜೆ ಘಟನೆ ನಡೆದಿದ್ದು, ಸ್ಥಳದಲ್ಲಿಯೇ 100ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದರು. ಗಂಭೀರವಾಗಿ ಗಾಯಗೊಂಡಿದ್ದ ಹಲವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗುರುವಾರ ಮಧ್ಯಾಹ್ನದ ವೇಳೆಗೆ ಸಾವಿನ ಸಂಖ್ಯೆ 157ಕ್ಕೆ ಏರಿಕೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇಂಧನ ತುಂಬಿದ ಟ್ಯಾಂಕರ್ ನೈಜೀರಿಯಾದ ಕ್ಯಾನೊದಿಂದ ಉತ್ತರದ ಯೋಬೆಗೆ ತೆರಳುತ್ತಿತ್ತು. ಈ ವೇಳೆ, ಅಬುಜಾ ಸಮೀಪದ ಮಜಿಯಾ ಪಟ್ಟಣದ ಬಳಿ ಟ್ಯಾಂಕರ್ ಚಾಲಕನ ನಿಯಂತ್ರಣ ಕಳೆದುಕೊಂಡು ಪಲ್ಟಿಯಾಗಿದೆ. ಈ ವೇಳೆ, ಜನರು ಇಂಧನವನ್ನು ತುಂಬಿಕೊಳ್ಳಲು ಟ್ಯಾಂಕರ್ ಬಳಿ ದೌಡಾಯಿಸಿದ್ದಾರೆ. ಆ ಸಂದರ್ಭದಲ್ಲಿ ಟ್ಯಾಂಕರ್ ಸ್ಪೋಟಗೊಂಡಿದೆ” ಎಂದು ಪೊಲೀಸ್ ವಕ್ತಾರ ಲಾವನ್ ಶಿಸು ಆಡಮ್ ಹೇಳಿದ್ದಾರೆ.
ದುರ್ಘಟನೆಯ ಸ್ಥಳದಲ್ಲಿಯೇ 100ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದು, ಸಾಮೂಹಿಕ ಅಂತ್ಯಕ್ರಿಯೆ ನಡೆಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸಾವನ್ನಪ್ಪಿದ ಎಲ್ಲರೂ ಇಂಧನ ತುಂಬಿಕೊಳ್ಳಲು ಹೋಗಿರಲಿಲ್ಲ. ಟ್ಯಾಂಕರ್ ಪಲ್ಟಿಯಾದ ಪ್ರದೇಶದಲ್ಲಿ ವಾಸವಾಗಿದ್ದರು ಎಂದು ಅವರು ಹೇಳಿದ್ದಾರೆ.
“ಇದೊಂದು ದುಃಖಕರ ಸಂಗತಿ. ಸ್ಥಳದಲ್ಲಿ ಏನಾಗುತ್ತಿದೆ ಎಂಬುದು ಬಹಳಷ್ಟು ಜನರಿಗೆ ತಿಳಿದಿರಲಿಲ್ಲ. ಹೆಚ್ಚು ಬಡತನ, ಸೌಕರ್ಯಗಳ ಕೊರತೆ, ಇಂಧನ ಬೆಲೆ ಏರಿಕೆಯಿಂದ ಜನರು ಹತಾಶರಾಗಿದ್ದರು. ಹೀಗಾಗಿ, ಅವರು ಇಂಧನವನ್ನು ಸಂಗ್ರಹಿಸಿಲು ಹೋಗಿದ್ದು, ದುರಂತ ಅಂತ್ಯ ಕಂಡಿದ್ದಾರೆ” ಎಂದು ಅಲ್ಝಜೀರ ವರದಿ ಮಾಡಿದೆ.
ದುರ್ಘಟನೆಯಲ್ಲಿ ಬಜಾವಾದ ಆದಮು ಅಬ್ದುಲ್ಲಾಹಿ ಮಾಧ್ಯಮಗಳೊಂದಿಗೆ ಮಾತನಾಡಿದ್ದು, “ದುರ್ಘಟನೆ ನಡೆದಾದ ನಾನು ಅಲ್ಲಿಯೇ ಇದ್ದೆ. ನಾನು ಇಂಧನ ತೆಗೆದುಕೊಂಡು ಮನೆಗೆ ಹೋದೆ. ಮತ್ತೆ ಟ್ಯಾಂಕರ್ ಬಳಿಗೆ ಹೋಗಲು ಸಿದ್ಧನಾಗುವ ವೇಳೆಗೆ ದೊಡ್ಡ ಸ್ಫೋಟದ ಸದ್ದು ಕೇಳಿಸಿತು. ಟ್ಯಾಂಕರ್ ಸ್ಪೋಟಗೊಂಡಿತ್ತು” ಎಂದು ಹೇಳಿದ್ದಾರೆ.
ನೈಜೀರಿಯಾದಲ್ಲಿ ಸರಕುಗಳನ್ನು ಸಾಗಿಲು ರೈಲ್ವೆ ವ್ಯವಸ್ಥೆಯು ಉತ್ತಮವಾಗಿಲ್ಲದ ಕಾರಣ, ಹೆಚ್ಚಿನ ಸರಕುಗಳನ್ನು ರಸ್ತೆ ಮಾರ್ಗದಲ್ಲಿಯೇ ಸಾಗಿಸಲಾಗುತ್ತದೆ. ಪರಿಣಾಮ, ಹಲವಾರು ಅಪಘಾತಗಳು ಸಂಭವಿಸುವುದು ಆ ದೇಶದಲ್ಲಿ ಸಾಮಾನ್ಯವಾಗಿಹೋಗಿದೆ.
ಈ ವರದಿ ಓದಿದ್ದೀರಾ?: ಸರ್ಕಾರವನ್ನೇ ಖಾಸಗೀಕರಣಗೊಳಿಸುತ್ತಿರುವ ‘ಅರ್ಬನ್ ನಾಜಿ’ಗಳು!
ನೈಜೀರಿಯಾದ ಫೆಡರಲ್ ರೋಡ್ ಸೇಫ್ಟಿ ಕಾರ್ಪ್ಸ್ ಪ್ರಕಾರ, 2020ರಲ್ಲಿ ಬರೋಬ್ಬರಿ 1,531 ಪೆಟ್ರೋಲ್ ಟ್ಯಾಂಕರ್ ಅಪಘಾತಗಳು ನಡೆದಿವೆ. ಅಪಘಾತಗಳಲ್ಲಿ 535 ಸಾವುಗಳು ಮತ್ತು 1,142 ಮಂದಿಗೆ ಗಾಯಗಳಾಗಿವೆ.
ಕಳೆದ ತಿಂಗಳಷ್ಟೇ, ಜಾನುವಾರುಗಳನ್ನು ಸಾಗಿಸುತ್ತಿದ್ದ ಟ್ರಕ್ಗೆ ಇಂಧನ ಟ್ಯಾಂಕರ್ ಡಿಕ್ಕಿ ಹೊಡೆದು, ಟ್ಯಾಂಕರ್ ಸ್ಫೋಟಗೊಂಡಿತ್ತು. ಪರಿಣಾಮ, ಕನಿಷ್ಠ 48 ಮಂದಿ ಸಾವನ್ನಪ್ಪಿದ್ದರು. ಅಲ್ಲದೆ, 50 ಪ್ರಾಣಿಗಳು ಜೀವಂತವಾಗಿ ಸುಟ್ಟುಹೋಗಿದ್ದವು.
“ನೈಜೀರಿಯಾದಲ್ಲಿ ರಸ್ತೆ ಮೂಲಸೌಕರ್ಯವು ತುಂಬಾ ಕೆಟ್ಟ ಸ್ಥಿತಿಯಲ್ಲಿದೆ. ಹೆದ್ದಾರಿಯಲ್ಲಿಯೂ ರಸ್ತೆಗುಂಡಿಗಳು ತಾಂಡವಾಡುತ್ತಿವೆ. ಅವುಗಳನ್ನು ತಪ್ಪಿಸಲು ಚಾಲಕರು ಪ್ರಯತ್ನಿಸುವ ಕಸರತ್ತಿನಲ್ಲಿ ವಾಹನಗಳು ನಿಯಂತ್ರಣ ಕಳೆದುಕೊಂಡು, ಅಪಘಾತಗಳು ಸಂಭವಿಸುತ್ತಿವೆ” ಎಂದು ಅಲ್ಝಜೀರಾ ವರದಿಯಾರ ಇದ್ರಿಸ್ ಹೇಳಿದ್ದಾರೆ.
