ಕಳೆದ ಒಂದು ವರ್ಷದಲ್ಲಿ ಸೌದಿ ಅರೇಬಿಯಾದ ಮೆಕ್ಕಾದಲ್ಲಿ ಶಾಖಾಘಾತದಿಂದ ಮೃತಪಟ್ಟ 1300 ಹಜ್ ಯಾತ್ರಿಗಳಲ್ಲಿ ಶೇ.83 ಮಂದಿ ಅಧಿಕೃತ ಅನುಮತಿ ಹೊಂದಿರಲಿಲ್ಲ ಎಂದು ಸೌದಿ ಅರೇಬಿಯಾ ಸರ್ಕಾರ ತಿಳಿಸಿದೆ.
“ವಿಷಾದ ವ್ಯಕ್ತಪಡಿಸುತ್ತ, ಸೂಕ್ತ ಆಶ್ರಯ, ಸೌಲಭ್ಯವಿಲ್ಲದೆ ಬಿಸಿಲಿನ ಶಾಖದ ಪ್ರದೇಶದಲ್ಲಿ ಸಾಗಿಬಂದಿರುವ ಕಾರಣ 1301 ಹಜ್ ಯಾತ್ರಿಕರು ಮೃತಪಟ್ಟಿದ್ದಾರೆ. ಇವರಲ್ಲಿ ಶೇ.83 ಮಂದಿ ಅಧಿಕೃತ ಅನುಮತಿಯನ್ನು ಹೊಂದಿರಲಿಲ್ಲ” ಎಂದು ಸೌದಿ ಆಡಳಿತದ ಮಾಧ್ಯಮ ಪ್ರಕಟಣೆ ತಿಳಿಸಿದೆ.
ಮೃತಪಟ್ಟವರಲ್ಲಿ ಇಂಡೋನೇಷ್ಯಾ ಹಾಗೂ ಅಮೆರಿಕದ ಯಾತ್ರಿಕರು ಸೇರಿದಂತೆ 10ಕ್ಕೂ ಹೆಚ್ಚು ದೇಶದ ಹಜ್ ಯಾತ್ರಿಕರಿದ್ದರು. ಕೆಲವೊಂದು ದೇಶಗಳು ತಮ್ಮ ದೇಶದ ಮೃತಪಟ್ಟ ಒಟ್ಟಾರೆ ಯಾತ್ರಿಕರನ್ನು ಕಲೆಹಾಕುತ್ತಿವೆ.
ಈಜಿಫ್ಟ್ನ 658 ಮಂದಿ ಯಾತ್ರಿಕರು ಮೃತಪಟ್ಟಿದ್ದು,ಇವರಲ್ಲಿ 630 ಮಂದಿ ಅಧಿಕೃತ ನೋಂದಣಿ ಪಡೆದಿರಲಿಲ್ಲ ಎಂದು ಅರಬ್ ರಾಯಭಾರಿಗಳು ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ. ಇವರಲ್ಲಿ ಬಹುತೇಕರು ಶಾಖಕ್ಕೆ ಸಂಬಂಧಿಸಿದ ಸಮಸ್ಯೆಗಳಿಂದ ಮೃತಪಟ್ಟಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಸಾಹಿತಿಗಳ ಸ್ವಾಭಿಮಾನ, ಸ್ವಾಯತ್ತತೆ ಮತ್ತು ಸಂಸ್ಕೃತಿ ಸಚಿವರ ತಿಪ್ಪೆ ಸಾರಿಸುವಿಕೆ
ಸೌದಿ ಅರೇಬಿಯಾದ ರಾಷ್ಟ್ರೀಯ ಹವಾಮಾನ ಕೇಂದ್ರದ ಪ್ರಕಾರ ಮೆಕ್ಕಾದಲ್ಲಿ ಈ ವರ್ಷ 51.8 ಡಿಗ್ರಿವರೆಗೂ ತಾಪಮಾನ ಏರಿಕೆಯಾಗಿತ್ತು. ಮೃತರಲ್ಲಿ 577 ಮಂದಿ ಜೂನ್ 15 ಮತ್ತು 16 ರಂದು ಸಾಂಪ್ರಾದಾಯಿಕ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡ ಯಾತ್ರಿಕರಾಗಿದ್ದಾರೆ.
ಹಜ್ ಯಾತ್ರೆಗೆ ಅಧಿಕೃತ ಅನುಮತಿ ಪಡೆಯದವರಿಗೆ 1,41,000 ಸೇವೆಗಳನ್ನು ಒಳಗೊಂಡು 4,65,000ಕ್ಕೂ ಹೆಚ್ಚು ವಿಶೇಷ ಚಿಕಿತ್ಸಾ ಸೌಲಭ್ಯವನ್ನು ಒದಗಿಸಲಾಗಿದೆ. ಅಧಿಕೃತ ಅನುಮತಿಯಿಲ್ಲದೆ ಯಾತ್ರೆಗೆ ಆಗಮಿಸಿದ ಯಾತ್ರಿಕರಲ್ಲಿ ಬಹುತೇಕರು ಹವಾ ನಿಯಂತ್ರಿತ ಟೆಂಟ್ಗಳು ಸೇರಿದಂತೆ ಹಲವು ಸೌಲಭ್ಯಗಳನ್ನು ಹೊಂದಿರಲಿಲ್ಲ ಎಂದು ಸೌದಿ ಆಡಳಿತ ತಿಳಿಸಿದೆ.
ಸೌದಿ ಅಧಿಕಾರಿಗಳ ಪ್ರಕಾರ ಈ ವರ್ಷ ಹಜ್ ಯಾತ್ರೆಗೆ ವಿದೇಶದಿಂದ 18 ಲಕ್ಷ ಮಂದಿ ಭೇಟಿ ನೀಡಿದ್ದರೆ, ಕಳೆದ ವರ್ಷ 16 ಲಕ್ಷ ಮಂದಿ ಭೇಟಿ ನೀಡಿದ್ದರು.
ಹಜ್ ಯಾತ್ರೆಗೆ ತೆರಳಿದ ಭಾರತೀಯರಲ್ಲಿ 98 ಮಂದಿ ಸಾವನ್ನಪ್ಪಿದ್ದಾರೆ. ಕಳೆದ ವರ್ಷ ಸಾವನ್ನಪ್ಪಿದವರ ಸಂಖ್ಯೆ 187 ಆಗಿತ್ತು ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ರಣದೀರ್ ಜೈಸ್ವಾಲ್ ತಿಳಿಸಿದ್ದಾರೆ
