ಪಾಕಿಸ್ತಾನದ ಸಂಸತ್ತಿನಲ್ಲಿ ಬುಧವಾರ ಮಹತ್ವದ ಸಂವಿಧಾನ ತಿದ್ದುಪಡಿ ಅಂಗೀಕರಿಸಲಾಯಿತು. ಈ ತಿದ್ದುಪಡಿಯಿಂದ ಸೇನಾ ಮುಖ್ಯಸ್ಥ ಅಸೀಂ ಮುನೀರ್ ಅವರಿಗೆ ಹೆಚ್ಚಿನ ಅಧಿಕಾರಗಳು ದೊರೆತಿದ್ದು, ಸುಪ್ರೀಂ ಕೋರ್ಟ್ ಅಧಿಕಾರಕ್ಕೆ ಕಡಿವಾಣ ಹಾಕಲಾಗಿದೆ. ಸಂಸತ್ತಿನ ಈ ನಡೆಗೆ ವಿಪಕ್ಷಗಳು ಮತ್ತು ಕಾನೂನು ತಜ್ಞರು ಆಘಾತ ವ್ಯಕ್ತಪಡಿಸಿದ್ದು, ಈ ಕ್ರಮವನ್ನು ದೇಶದ ಪ್ರಜಾಪ್ರಭುತ್ವಕ್ಕೆ “ಅಪಾರ ಹಾನಿ” ಎಂದು ಖಂಡಿಸಿದ್ದಾರೆ.
ಸಂಸತ್ತಿನ ಕೆಳಮನೆಯಲ್ಲಿ ಈ ತಿದ್ದುಪಡಿ ಮೂರನೇ ಎರಡರಷ್ಟು ಬಹುಮತದೊಂದಿಗೆ ಅಂಗೀಕರಿಸಲಾಯಿತು. ಕೇವಲ ನಾಲ್ವರು ಸದಸ್ಯರು ವಿರೋಧಿಸಿದರು. ಮೇಲ್ಮನೆಯಲ್ಲಿ ಈ ಮಸೂದೆಯನ್ನು ಎರಡು ದಿನಗಳ ಹಿಂದೆ ಅಂಗೀಕಸಲಾಗಿತ್ತು, ವಿರೋಧ ಪಕ್ಷದ ಸದಸ್ಯರು ಚರ್ಚೆಯನ್ನು ಬಹಿಷ್ಕರಿಸಿದ್ದರು. ಸಂವಿಧಾನ ತಿದ್ದುಪಡಿಯು ಅಧ್ಯಕ್ಷರ ಸಹಿ ಮಾಡಿದ ನಂತರ ಇದು ಕಾನೂನಾಗಲಿದೆ.
ಈ ತಿದ್ದುಪಡಿಯ ಅಡಿಯಲ್ಲಿ ಸೇನಾ ಮುಖ್ಯಸ್ಥ ಅಸೀಂ ಮುನೀರ್ ಅವರನ್ನು “ರಕ್ಷಣಾ ಪಡೆಗಳ ಮುಖ್ಯಸ್ಥ” (Chief of Defence Forces) ಎಂದು ಕರೆಯಲಾಗುತ್ತದೆ. ಇದರ ಅರ್ಥ, ಇನ್ನುಮುಂದೆ ಪಾಕಿಸ್ತಾನದ ಸೇನೆ, ನೌಕಾಪಡೆ ಮತ್ತು ವಾಯುಪಡೆಯ ಮೇಲಿನ ಸಂಪೂರ್ಣ ಅಧಿಕಾರ ಅವರ ಕೈಯಲ್ಲಿ ಕೇಂದ್ರೀಕೃತವಾಗುತ್ತದೆ. ಮುನೀರ್ ಅವರು ತಮ್ಮ ಅವಧಿ ಪೂರ್ಣಗೊಂಡ ನಂತರವೂ ಸೇನಾ ಹುದ್ದೆಯ ಗೌರವ ಮತ್ತು ಕಾನೂನು ರಕ್ಷಣೆ ಪಡೆಯಲಿದ್ದಾರೆ.
ಪ್ರಧಾನಮಂತ್ರಿ ಶೆಹಬಾಝ್ ಶರೀಫ್ ಈ ಕ್ರಮವನ್ನು “ಸಂಸ್ಥೆಗಳ ಮಧ್ಯೆ ಸಮನ್ವಯ ಮತ್ತು ರಾಷ್ಟ್ರೀಯ ಏಕತೆಯ ಹೆಜ್ಜೆ” ಎಂದು ವಿವರಿಸಿದರು. “ನಾವು ನಮ್ಮ ವೀರರನ್ನು ಗೌರವಿಸುತ್ತಿದ್ದೇವೆ,” ಎಂದು ಅವರು ಸಂಸತ್ತಿನಲ್ಲಿ ಹೇಳಿದರು. ಆದರೆ ವಿರೋಧ ಪಕ್ಷ ಪಿಟಿಐ ಸದಸ್ಯರು ಮಸೂದೆಯ ಪ್ರತಿಗಳನ್ನು ಹರಿದು, ಸಭೆಯಿಂದ ಹೊರನಡೆದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಶಿಕ್ಷಣದ ಜವಾಬ್ದಾರಿಯಿಂದ ಸರ್ಕಾರ ನಿಧಾನವಾಗಿ ನುಣುಚಿಕೊಳ್ಳುತ್ತಿದೆಯೇ?
ತಿದ್ದುಪಡಿಯ ಮತ್ತೊಂದು ಮುಖ್ಯ ಅಂಶವೆಂದರೆ, ಸಂವಿಧಾನ ಸಂಬಂಧಿತ ಪ್ರಕರಣಗಳು ಇನ್ನು ಮುಂದೆ ಶ್ರೇಷ್ಠ ನ್ಯಾಯಾಲಯದ ಬದಲು ಹೊಸ Federal Constitutional Court ಗೆ ವರ್ಗಾಯಿಸಲ್ಪಡಲಿವೆ. ಈ ಹೊಸ ನ್ಯಾಯಾಲಯದ ನ್ಯಾಯಾಧೀಶರನ್ನು ಸರ್ಕಾರ ನೇಮಿಸಲಿದೆ.
ಕಾನೂನು ತಜ್ಞ ಮಿರ್ಜಾ ಮೊಯಿಜ್ ಬೈಗ್ ಮಾತನಾಡಿ, “ಈಗ ಪ್ರಧಾನಮಂತ್ರಿ ಮತ್ತು ರಾಷ್ಟ್ರಪತಿಗೆ ಹೊಸ ನ್ಯಾಯಾಲಯದ ನ್ಯಾಯಾಧೀಶರನ್ನು ಆಯ್ಕೆ ಮಾಡುವ ಅಧಿಕಾರ ಸಿಕ್ಕಿದೆ, ಇದು ಸರ್ಕಾರದ ಮೇಲಿನ ನಿಯಂತ್ರಣ ವ್ಯವಸ್ಥೆಯನ್ನು ದುರ್ಬಲಗೊಳಿಸುತ್ತದೆ” ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
ಮತ್ತೊಬ್ಬ ತಜ್ಞ ಆಸಾದ್ ರಹೀಂ ಖಾನ್, “ನಾವು ಶತಮಾನದಲ್ಲಿಯೇ ಕಾಣದ ರೀತಿಯ ನ್ಯಾಯಾಂಗ ಸಂಕಷ್ಟವನ್ನು ಎದುರಿಸುತ್ತಿದ್ದೇವೆ. ಇಂದು ಸಂಸತ್ತಿನಲ್ಲಿ ಸಂಭ್ರಮಿಸುವವರು ನಾಳೆ ಇದೇ ನ್ಯಾಯಾಲಯದ ಬಾಗಿಲು ತಟ್ಟಬೇಕಾಗುತ್ತದೆ” ಎಂದು ಹೇಳಿದ್ದಾರೆ.
ಸೈನ್ಯವು ಈಗಾಗಲೇ ಪಾಕಿಸ್ತಾನದ ರಾಜಕೀಯದಲ್ಲಿ ವ್ಯಾಪಕ ಪ್ರಭಾವ ಹೊಂದಿದೆ. ಆದರೆ ಈ ತಿದ್ದುಪಡಿ ಆ ಪ್ರಭಾವಕ್ಕೆ ಸಂವಿಧಾನಾತ್ಮಕ ಬಲ ನೀಡುತ್ತದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ. ಆಂತರಿಕ ರಾಜಕೀಯದ ದೃಷ್ಟಿಯಿಂದ ಈ ಬದಲಾವಣೆಗಳು ಸರ್ಕಾರದ ವಿರುದ್ಧದ ನ್ಯಾಯಾಂಗ ಹಸ್ತಕ್ಷೇಪವನ್ನು ತಡೆಯುವ ಪ್ರಯತ್ನವೆಂದು ವಿಶ್ಲೇಷಕರು ಹೇಳಿದ್ದಾರೆ. ಆದರೆ ಇದು ಪಾಕಿಸ್ತಾನದ ಪ್ರಜಾಪ್ರಭುತ್ವದ ಭವಿಷ್ಯದ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ.
