ಪ್ಯಾಲೆಸ್ತೀನ್ ಬಗ್ಗೆ ವಿವಾದಿತ ಲೇಖನ ಪ್ರಕಟಿಸಿದ್ದ ತನ್ನ ಸಂಪುಟದ ಗೃಹ ಕಾರ್ಯದರ್ಶಿ ಸುಯೆಲ್ಲಾ ಬ್ರವರ್ಮನ್ ಅವರನ್ನು ವಜಾಗೊಳಿಸಿರುವ ಇಂಗ್ಲೆಂಡ್ ಪ್ರಧಾನಿ ರಿಶಿ ಸುನಕ್, ಅದೇ ಸ್ಥಾನಕ್ಕೆ ವಿದೇಶಾಂಗ ಸಚಿವ ಜೇಮ್ಸ್ ಕ್ಲೆವರ್ಲೀ ಅವರನ್ನು ನೇಮಿಸಿದ್ದಾರೆ.
ಇಂಗ್ಲೆಂಡಿನ ಅತ್ಯಂತ ಹಿರಿಯ ಸಚಿವರಲ್ಲಿ ಒಬ್ಬರಾದ ಸುಯೆಲ್ಲಾ ಬ್ರವರ್ಮನ್ ಅವರು ಇತ್ತೀಚಿಗೆ ಪ್ಯಾಲೆಸ್ತೀನ್ ಪರವಾದ ಮೆರವಣಿಗೆಯನ್ನು ಲಂಡನ್ನಲ್ಲಿ ಹಮ್ಮಿಕೊಂಡ ಸಂದರ್ಭದಲ್ಲಿ ಪೊಲೀಸರು ಪ್ಯಾಲೆಸ್ತೀನ್ ಪರ ಮೃದುವಾದ ಭಾವನೆ ಹೊಂದಿದ್ದಾರೆ ಎಂದು ವಿವಾದಿತ ಲೇಖನ ಪ್ರಕಟಿಸಿದ ನಂತರ ಹುದ್ದೆಯಿಂದ ವಜಾಗೊಂಡಿದ್ದಾರೆ.
ಸುದ್ದಿ ಸಂಸ್ಥೆ ರಾಯಿಟರ್ಸ್ ಉಲ್ಲೇಖಿಸಿದ ಮೂಲಗಳ ಪ್ರಕಾರ, ಸುನಕ್ ಅವರು ಸಚಿವ ಸ್ಥಾನವನ್ನು ತೊರೆಯಲು ಸುಯೆಲ್ಲಾ ಬ್ರವರ್ಮನ್ ಅವರಿಗೆ ಮನವಿ ಮಾಡಿದ್ದು, ರಿಶಿ ಅವರ ನಿರ್ದೇಶನವನ್ನು ಸುಯೆಲ್ಲಾ ಒಪ್ಪಿಕೊಂಡರು ಎನ್ನಲಾಗಿದೆ.
ಈ ಸುದ್ದಿ ಓದಿದ್ದೀರಾ? ದಯವಿಟ್ಟು ಬಿಟ್ಟುಬಿಡಿ, ನನಗೆ ನಾಲ್ಕು ಹೆಣ್ಣುಮಕ್ಕಳಿದ್ದಾರೆ ಎಂದು ಅಂಗಲಾಚಿದರೂ ಅತ್ಯಾಚಾರವೆಸಗಿದ ರಾಕ್ಷಸರು
ವಜಾಗೊಂಡ ನಂತರ ನೀಡಿದ ಹೇಳಿಕೆಯಲ್ಲಿ ಸುಯೆಲ್ಲಾ ಬ್ರವರ್ಮನ್, ”ಗೃಹ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿರುವುದು ನನ್ನ ಜೀವನದ ಅತ್ಯಂತ ದೊಡ್ಡ ಸುಯೋಗವಾಗಿದೆ. ನಾನು ಸೂಕ್ತ ಸಮಯದಲ್ಲಿ ಹೆಚ್ಚಿನದನ್ನು ಹೇಳಲು ಬಯಸುತ್ತೇನೆ” ಎಂದು ತಿಳಿಸಿದ್ದಾರೆ.
The Rt Hon @JamesCleverly MP has been appointed Secretary of State for the Home Department @ukhomeoffice pic.twitter.com/5evoQrZE5k
— UK Prime Minister (@10DowningStreet) November 13, 2023
ಪ್ರತಿಭಟನೆ ನಡೆಸುವಾಗ ಪ್ಯಾಲೆಸ್ತೀನಿಯನ್ ಪರವಾದ ಗುಂಪುಗಳನ್ನು ಪೊಲೀಸರು ಹೆಚ್ಚು ನಿರ್ಲಕ್ಷಿಸಿದ್ದಾರೆ ಎಂದು ಸುನಕ್ ಅವರ ಅನುಮೋದನೆಯಿಲ್ಲದೆ ಸುಯೆಲ್ಲಾ ಅವರು ಲೇಖನವನ್ನು ಪ್ರಕಟಿಸಿದರು.
ಕೆಲವು ದಿನಗಳ ಹಿಂದೆ, ಸುಯೆಲ್ಲಾ ಬ್ರವರ್ಮನ್ ಅವರು ಗಾಜಾದಲ್ಲಿ ಕದನ ವಿರಾಮಕ್ಕೆ ಕರೆ ನೀಡುವ ರ್ಯಾಲಿಗಳನ್ನು “ದ್ವೇಷದ ಮೆರವಣಿಗೆಗಳು” ಎಂದು ವಿವರಿಸಿದ್ದರು. ಪ್ಯಾಲೆಸ್ತೀನ್ ಪರವಾದ ಪ್ರದರ್ಶನಗಳು ಕೆಲವು ಗುಂಪುಗಳ ಪ್ರಾಮುಖ್ಯತೆಯ ಪ್ರತಿಪಾದನೆಯಾಗಿದೆ ಎಂದು ಹೇಳಿದ್ದರು.
ಬ್ರವರ್ಮನ್ ಕ್ಯಾಬಿನೆಟ್ ಸ್ಥಾನವನ್ನು ಮಧ್ಯದಲ್ಲಿಯೇ ತೊರೆಯುತ್ತಿರುವುದು ಇದು ಎರಡನೇ ಬಾರಿ. ಇದಕ್ಕೂ ಮೊದಲು, 2022 ರಲ್ಲಿ ಲಿಜ್ ಟ್ರಸ್ ಸರ್ಕಾರದ ಅವಧಿಯಲ್ಲಿ, ಅವರು ಗೃಹ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿದ್ದರು. ಆದರೆ ತಮ್ಮ ವೈಯಕ್ತಿಕ ಈ-ಮೇಲ್ನಿಂದ ಅಧಿಕೃತ ದಾಖಲೆಯನ್ನು ಕಳುಹಿಸುವ ಮೂಲಕ ಮಂತ್ರಿ ಕೋಡ್ ಅನ್ನು ಉಲ್ಲಂಘಿಸಿದ ಆರೋಪದ ಮೇಲೆ ಹುದ್ದೆ ತೊರೆದರು.
ಸುಮಾರು ಆರು ವಾರಗಳ ನಂತರ ರಿಷಿ ಸುನಕ್ ಅವರು ಹೊಸ ಕನ್ಸರ್ವೇಟಿವ್ ಪ್ರಧಾನಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದಾಗ ಅವರನ್ನು ಮತ್ತೆ ಗೃಹ ಕಾರ್ಯದರ್ಶಿಯಾಗಿ ನೇಮಿಸಿಕೊಳ್ಳಲಾಯಿತು.
ಸುಯೆಲ್ಲಾ ಬ್ರವರ್ಮನ್ ಅವರ ಪೋಷಕರು ಭಾರತೀಯ ಮೂಲದವರಾಗಿದ್ದು ಕೆಲವು ದಶಕಗಳ ಹಿಂದೆ ಆಫ್ರಿಕಾದ ಮೂಲಕ ಇಂಗ್ಲೆಂಡ್ಗೆ ವಲಸೆ ಬಂದಿದ್ದರು.
ಅಲ್ಲದೆ ಇಂಗ್ಲೆಂಡ್ ಪ್ರಧಾನಿ ರಿಶಿ ಸುನಕ್ ಸಂಪುಟವನ್ನು ಪುನರಾಚಿಸಿದ್ದು, ಮಾಜಿ ಪ್ರಧಾನಿ ಡೇವಿಡ್ ಕ್ಯಾಮರೋನ್ ಅವರನ್ನು ವಿದೇಶಾಂಗ ಕಾರ್ಯದರ್ಶಿಯಾಗಿ ನೇಮಿಸಿದ್ದಾರೆ. 2010ರಿಂದ 2016ರವರೆಗೆ ಡೇವಿಡ್ ಕ್ಯಾಮರೋನ್ ಇಂಗ್ಲೆಂಡ್ ಪ್ರಧಾನಿಯಾಗಿದ್ದರು. ಬ್ರೆಕ್ಸಿಟ್ ಜನಾಭಿಪ್ರಾಯ ಸಂದರ್ಭದಲ್ಲಿ ಅಧಿಕಾರದಿಂದ ಕೆಳಗಿಳಿದಿದ್ದರು.
