ಅಮೆರಿಕಾದಲ್ಲಿ ವೀಸಾ ಹೊಂದಿರುವ 5.5 ಕೋಟಿ ವಿದೇಶಿಗರನ್ನು ಅವರ ದಾಖಲೆಗಳಲ್ಲಿ ಯಾವುದೇ ಉಲ್ಲಂಘನೆಗಳಿವೆಯೇ ಎಂದು ಪತ್ತೆಹಚ್ಚಲು ಪರಿಶೀಲಿಸಲಾಗುತ್ತಿದೆ ಎಂದು ಟ್ರಂಪ್ ಆಡಳಿತವು ಗುರುವಾರ ಪ್ರಕಟಿಸಿದೆ.
ಅಮೆರಿಕಾದಲ್ಲಿ ವಾಸಿಸಲು ಅನುಮತಿ ಪಡೆದ ವಿದೇಶಿಗರ ಮೇಲೆ ನಿಗಾ ಇಡುವ ಉದ್ದೇಶದಿಂದ ಈ ಹೊಸ ಕ್ರಮ ಜಾರಿಗೊಳಿಸಲಾಗಿದೆ. ವೀಸಾ ರದ್ದಾಗುವವರಲ್ಲಿ 6 ಸಾವಿರ ಭಾರತೀಯರು ಸೇರಿದ್ದಾರೆ ಎಂದು ಹೇಳಲಾಗುತ್ತಿದೆ.
ಮಾಧ್ಯಮವೊಂದರ ಪ್ರಶ್ನೆಯೊಂದಕ್ಕೆ ಲಿಖಿತ ಉತ್ತರ ನೀಡಿದ ಅಮೆರಿಕದ ವಿದೇಶಾಂಗ ಇಲಾಖೆ, ಪ್ರವಾಸಿ ವೀಸಾಗಳನ್ನು ಹೊಂದಿರುವವರೂ ಸೇರಿದಂತೆ ಎಲ್ಲ ವೀಸಾ ಹೊಂದಿದ ವಿದೇಶಿಗರನ್ನು “ನಿರಂತರ ಪರಿಶೀಲನೆಗೆ” ಒಳಪಡಿಸಲಾಗುತ್ತದೆ ಎಂದು ತಿಳಿಸಿದೆ. ಈ ಪ್ರಕ್ರಿಯೆಯ ಮೂಲಕ, ಅವರು ಅಮೆರಿಕಾಗೆ ಪ್ರವೇಶಿಸಲು ಅಥವಾ ಅಲ್ಲಿ ಉಳಿಯಲು ಅನರ್ಹರಾಗಿದ್ದಾರೆಯೇ ಎಂದು ಪತ್ತೆಹಚ್ಚಲಾಗುವುದು. ಒಂದು ವೇಳೆ ಅಂತಹ ಮಾಹಿತಿ ಲಭ್ಯವಾದರೆ, ವೀಸಾವನ್ನು ರದ್ದುಗೊಳಿಸಲಾಗುವುದು. ವೀಸಾ ರದ್ದಾದ ವ್ಯಕ್ತಿ ಈಗಾಗಲೇ ಅಮೆರಿಕದಲ್ಲಿದ್ದರೆ, ಅವರನ್ನು ಗಡಿಪಾರು ಮಾಡಲಾಗುತ್ತದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಸದನದ ಘನತೆಯನ್ನು ಮಣ್ಣುಪಾಲು ಮಾಡಿದ ಮಹನೀಯರು
ಈ ಪರಿಶೀಲನೆಯು ಪ್ರವಾಸಿಗರು ವೀಸಾ ಅವಧಿ ಮೀರಿದ್ದು, ಅಪರಾಧ ಚಟುವಟಿಕೆಗಳು, ಸಾರ್ವಜನಿಕ ಸುರಕ್ಷತೆಗೆ ಬೆದರಿಕೆ, ಭಯೋತ್ಪಾದಕ ಚಟುವಟಿಕೆಗಳಲ್ಲಿ ತೊಡಗುವುದು ಅಥವಾ ಭಯೋತ್ಪಾದಕ ಸಂಘಟನೆಗಳಿಗೆ ಬೆಂಬಲ ನೀಡುವುದು ಸೇರಿದಂತೆ ವಿವಿಧ ಕಾರಣಗಳನ್ನು ಗಮನದಲ್ಲಿಟ್ಟುಕೊಂಡು ನಡೆಯುತ್ತದೆ. ಕಾನೂನು ಜಾರಿ ದಾಖಲೆಗಳು, ವಲಸೆ ದಾಖಲೆಗಳು ಹಾಗೂ ವೀಸಾ ನೀಡಿದ ನಂತರ ಬೆಳಕಿಗೆ ಬಂದ ಯಾವುದೇ ಮಾಹಿತಿ ಸೇರಿದಂತೆ ಲಭ್ಯವಿರುವ ಎಲ್ಲ ಮಾಹಿತಿಯನ್ನು ಪರಿಶೀಲಿಸಲಾಗುತ್ತದೆ ಎಂದು ಇಲಾಖೆ ಹೇಳಿದೆ.
ಇದೇ ವೇಳೆ, ವಾಣಿಜ್ಯ ಟ್ರಕ್ ಚಾಲಕರಿಗೆ ನೀಡುತ್ತಿದ್ದ ಕಾರ್ಯ ವೀಸಾಗಳನ್ನು ನಿಲ್ಲಿಸಲಾಗುವುದು ಎಂದು ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರುಬಿಯೊ ಘೋಷಿಸಿದ್ದಾರೆ. ವಿದೇಶಿ ಚಾಲಕರ ಹೆಚ್ಚಳವು ಅಮೆರಿಕನ್ ಚಾಲಕರ ಜೀವನೋಪಾಯಕ್ಕೆ ಅಪಾಯ ತಂದಿದೆ ಮತ್ತು ಸಾರ್ವಜನಿಕರ ಸುರಕ್ಷತೆಗೆ ಧಕ್ಕೆ ತಂದಿದೆ ಎಂದು ಅವರು ತಿಳಿಸಿದ್ದಾರೆ. ಈ ಎಲ್ಲ ಕ್ರಮಗಳು, ಅಮೆರಿಕನ್ ಉದ್ಯೋಗದಾತರು ವಿದೇಶಿ ಕೆಲಸಗಾರರನ್ನು ನೇಮಿಸಿಕೊಳ್ಳದಂತೆ ತಡೆಯುವ ಸರ್ಕಾರದ ಪ್ರಯತ್ನಗಳ ಭಾಗವೆಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
