ಫಿಫಾ ಆರಂಭಿಸಿರುವ ‘ಫಿಫಾ ಶಾಂತಿ ಪ್ರಶಸ್ತಿ’ಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಪಡೆದುಕೊಂಡಿದ್ದಾರೆ. ಟ್ರಂಪ್ ಅವರಿಗೆ ಪ್ರಶಸ್ತಿಯನ್ನು ಫಿಫಾ ಅಧ್ಯಕ್ಷ ಜೈನಿ ಇನ್ಫಾಂಟಿನೊ ಪ್ರದಾನ ಮಾಡಿದ್ದಾರೆ. ವಾಷಿಂಗ್ಟನ್ ಡಿಸಿಯ ಕೆನಡಿ ಸೆಂಟರ್ನಲ್ಲಿ ನಡೆದ ಸಮಾರಂಭದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗಿದೆ.
ಇದೇ ಮೊದಲ ಬಾರಿಗೆ ಫಿಫಾ ರಾಷ್ಟ್ರವು ‘ಫಿಫಾ ಶಾತಿ ಪ್ರಶಸ್ತಿ’ಯನ್ನು ಆರಂಭಿಸಿದೆ. ಚೊಚ್ಚಲ ಪ್ರಶಸ್ತಿಗೆ ಟ್ರಪ್ ಭಾಜನರಾಗಿದ್ದಾರೆ. “ಶಾಂತಿಗಾಗಿ ವಿಶೇಷ ಮತ್ತು ಅದ್ಭುತ ಕ್ರಮಗಳನ್ನು ಕೈಗೊಂಡಿರುವ ವ್ಯಕ್ತಿಗಳನ್ನು ಗುರುತಿಸುವುದು ಮತ್ತು ವಿಶ್ವದ ಜನರನ್ನು ಒಗ್ಗೂಡಿಸುವವರನ್ನು ಗೌರವಿಸಲು ಪ್ರಶಸ್ತಿಯನ್ನು ಈ ವರ್ಷದಿಂದ ಆರಂಭಿಸಲಾಗಿದೆ” ಎಂದು ಫಿಫಾ ತಿಳಿಸಿದೆ.
ಟ್ರಂಪ್ ಅವರನ್ನು ಶಾಂತಿ ಒಪ್ಪಂದದ ಮಧ್ಯಸ್ಥಿಕೆದಾರ ಮತ್ತು ರಾಜತಾಂತ್ರಿಕತೆಯಲ್ಲಿ ತೊಡಗಿಸಿಕೊಂಡಿರುವ ನಾಯಕ ಎಂದು ಫಿಫಾ ಬಣ್ಣಿಸಿದೆ. ವಿಶ್ವದಾದ್ಯಂತ ಶಾಂತಿ ಸ್ಥಾಪನೆಗೆ ಟ್ರಂಪ್ ಪ್ರಯತ್ನಿಸುತ್ತಿದ್ದಾರೆ ಎಂದು ಹೇಳಿದೆ.
ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಟ್ರಂಪ್, “ನನ್ನ ಜೀವನದಲ್ಲಿ ಇದೊಂದು ದೊಡ್ಡ ಗೌರವ. ನಾವು ಲಕ್ಷಾಂತರ ಜನರು ಮತ್ತು ಅವರ ಬದುಕನ್ನು ರಕ್ಷಿಸಿದ್ದೇವೆ. ಅದು ಪ್ರಶಸ್ತಿಗಿಂತ ಮಿಗಿಲಾದದ್ದು. ಕೊಂಗೋ, ಭಾರತ-ಪಾಕ್ ಸೇರಿದಂತೆ ಹಲವು ಯುದ್ಧಗಳನ್ನು ಕೊನೆಗಾಣಿಸಿದ್ದೇವೆ” ಎಂದು ಹೇಳಿಕೊಂಡಿದ್ದಾರೆ.
ಆದಾಗ್ಯೂ, 2026ರ ಫಿಫಾ ವಿಶ್ವಕಪ್ ಪಂದ್ಯಗಳ ಡ್ರಾ ಸಮಾರಂಭದಲ್ಲಿ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಗಿದ್ದು, ಇದು ಆಟಕ್ಕೆ ರಾಜಕೀಯ ಲೇಪನ ನೀಡಿದೆ. ಚರ್ಚೆಗೆ ಗ್ರಾಸವಾಗಿದೆ.
