ಬಹುಪಕ್ಷೀಯ ಒಪ್ಪಂದಗಳಿಂದ ದೂರ ಉಳಿಯುವ ತಮ್ಮ ‘ಅಮೆರಿಕ ಫಸ್ಟ್’ ನೀತಿಯನ್ನು ಮುಂದುವರಿಸಿರುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಭಾರತದ ನೇತೃತ್ವದ ‘ಅಂತಾರಾಷ್ಟ್ರೀಯ ಸೌರ ಮೈತ್ರಿಕೂಟ’ (ಐಎಸ್ಎ) ಸೇರಿದಂತೆ ಒಟ್ಟು 66 ಜಾಗತಿಕ ಸಂಸ್ಥೆಗಳಿಂದ ಅಮೆರಿಕವನ್ನು ಹಿಂಪಡೆಯುವ ಮಹತ್ವದ ಘೋಷಣೆಗೆ ಸಹಿ ಹಾಕಿದ್ದಾರೆ. ಇದು ಇತ್ತೀಚಿನ ವರ್ಷಗಳಲ್ಲಿ ಅಮೆರಿಕ ಕೈಗೊಂಡಿರುವ ಅತಿದೊಡ್ಡ ಅಂತಾರಾಷ್ಟ್ರೀಯ ನಿರ್ಗಮನ ಎಂದು ಹೇಳಲಾಗಿದೆ.
ಬುಧವಾರ ಈ ಕುರಿತು ಪ್ರಕಟಣೆ ನೀಡಿರುವ ಶ್ವೇತಭವನ, “ಅಮೆರಿಕದ ಹಿತಾಸಕ್ತಿಗಳಿಗೆ ಪೂರಕವಾಗಿಲ್ಲದ 35 ವಿಶ್ವಸಂಸ್ಥೆಯೇತರ ಸಂಸ್ಥೆಗಳು ಹಾಗೂ 31 ವಿಶ್ವಸಂಸ್ಥೆ ಸಂಯೋಜಿತ ಸಂಸ್ಥೆಗಳಿಂದ ಅಮೆರಿಕ ಹೊರಬರುತ್ತಿದೆ,” ಎಂದು ತಿಳಿಸಿದೆ. ಈ ಸಂಸ್ಥೆಗಳು ಅಮೆರಿಕದ ಸಾರ್ವಭೌಮತ್ವ, ಆರ್ಥಿಕ ಆದ್ಯತೆಗಳು ಮತ್ತು ರಾಷ್ಟ್ರೀಯ ನೀತಿಗಳಿಗೆ ವಿರುದ್ಧವಾದ ಅಜೆಂಡಾಗಳನ್ನು ಪ್ರೋತ್ಸಾಹಿಸುತ್ತಿವೆ ಎಂಬ ಕಾರಣವನ್ನು ಟ್ರಂಪ್ ಆಡಳಿತ ನೀಡಿದೆ.
ಭಾರತದ ನೇತೃತ್ವದಲ್ಲಿ, ಫ್ರಾನ್ಸ್ ಸಹಯೋಗದೊಂದಿಗೆ 2015ರಲ್ಲಿ ಆರಂಭಿಸಲಾದ ‘ಅಂತಾರಾಷ್ಟ್ರೀಯ ಸೌರ ಮೈತ್ರಿಕೂಟ’ (International Solar Alliance – ISA) ದಿಂದಲೂ ಅಮೆರಿಕ ಹೊರಬಂದಿದೆ. ಹವಾಮಾನ ಬದಲಾವಣೆ ತಡೆಗಟ್ಟಲು ಮತ್ತು ಸೌರಶಕ್ತಿ ಬಳಕೆಯನ್ನು ಉತ್ತೇಜಿಸಲು ಪ್ರಧಾನಿ ನರೇಂದ್ರ ಮೋದಿ ಅವರು ಈ ಒಕ್ಕೂಟದ ಸ್ಥಾಪನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಹರಿಯಾಣದ ಗುರುಗ್ರಾಮದಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಐಎಸ್ಎ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ರಾಜತಾಂತ್ರಿಕ ಶಕ್ತಿಯ ಸಂಕೇತ ಎಂದೇ ಪರಿಗಣಿಸಲ್ಪಟ್ಟಿದೆ. ಇದೀಗ ಈ ಕೂಟದಿಂದ ಅಮೆರಿಕದ ನಿರ್ಗಮನವು, ಜಾಗತಿಕ ಹವಾಮಾನ ಹೋರಾಟದಲ್ಲಿ ಭಾರತದ ಪ್ರಯತ್ನಗಳಿಗೆ ಅಮೆರಿಕ ಬೆಂಬಲವಿಲ್ಲ ಎಂಬುದನ್ನು ಸೂಚಿಸುತ್ತದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ‘ಸುಪ್ರೀಮ್’ ನೀಡಿದ ಎರಡು ವ್ಯತಿರಿಕ್ತ ತೀರ್ಪುಗಳು! ಅರವಿಂದ್ಗೆ ಒಂದು ನ್ಯಾಯ, ಉಮರ್ಗೆ ಮತ್ತೊಂದೇ?
ಅಮೆರಿಕ ಸದಸ್ಯತ್ವ ಹೊಂದಿರುವ ಅಥವಾ ಸಹಿದಾರನಾಗಿರುವ ಎಲ್ಲ ಅಂತಾರಾಷ್ಟ್ರೀಯ ಅಂತರ್-ಸರ್ಕಾರಿ ಸಂಸ್ಥೆಗಳು, ಸಮಾವೇಶಗಳು ಮತ್ತು ಒಪ್ಪಂದಗಳ ಸಮಗ್ರ ಆಂತರಿಕ ಪರಿಶೀಲನೆಯ ನಂತರ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ಈ ಸಂಸ್ಥೆಗಳಲ್ಲಿ ಮುಂದುವರಿಯುವುದು ಅಮೆರಿಕದ ರಾಷ್ಟ್ರೀಯ ಹಿತಾಸಕ್ತಿಗೆ ಪೂರಕವಾಗಿದೆಯೇ ಎಂಬ ಬಗ್ಗೆ ಟ್ರಂಪ್ ಆಡಳಿತ ಪರಾಮರ್ಶೆ ನಡೆಸಿತ್ತು.
“ಜಾಗತೀಕರಣದ ಅಜೆಂಡಾಗಳನ್ನು ಪ್ರೋತ್ಸಾಹಿಸುವ ಸಂಸ್ಥೆಗಳಿಗೆ ಅಮೆರಿಕದ ತೆರಿಗೆದಾರರ ಹಣ ಪೋಲಾಗುವುದನ್ನು ಮತ್ತು ಅದರಲ್ಲಿನ ನಮ್ಮ ಪಾಲ್ಗೊಳ್ಳುವಿಕೆಯನ್ನು ಈ ನಿರ್ಧಾರ ಅಂತ್ಯಗೊಳಿಸಲಿದೆ,” ಎಂದು ಶ್ವೇತಭವನ ಸ್ಪಷ್ಟಪಡಿಸಿದೆ. ಅಲ್ಲದೆ, ಕೆಲವು ಸಂಸ್ಥೆಗಳನ್ನು ನಿಷ್ಪ್ರಯೋಜಕ ಎಂದು ಕರೆದಿರುವ ಶ್ವೇತಭವನ, ಅಲ್ಲಿ ವ್ಯರ್ಥವಾಗುವ ಹಣವನ್ನು ಬೇರೆಡೆ ಸಮರ್ಥವಾಗಿ ಬಳಸಬಹುದು ಎಂದು ಪ್ರತಿಪಾದಿಸಿದೆ.
ತಮ್ಮ ಎರಡನೇ ಅವಧಿಯ ಆಡಳಿತವನ್ನು ಆರಂಭಿಸಿದಾಗಿನಿಂದಲೂ ಟ್ರಂಪ್ ಅವರು ವಿಶ್ವಸಂಸ್ಥೆಯ ವ್ಯವಸ್ಥೆಯೊಂದಿಗಿನ ಅಮೆರಿಕದ ನಂಟನ್ನು ಹಂತ ಹಂತವಾಗಿ ಕಡಿಮೆ ಮಾಡುತ್ತಿದ್ದಾರೆ. ಈಗಾಗಲೇ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಮಂಡಳಿ ಮತ್ತು ಯುನೆಸ್ಕೋದಿಂದ (UNESCO) ಅಮೆರಿಕ ಹೊರಬಂದಿದ್ದು, ಪ್ಯಾಲೆಸ್ಟೀನ್ ನಿರಾಶ್ರಿತರಿಗಾಗಿ ಇರುವ ವಿಶ್ವಸಂಸ್ಥೆಯ ಸಂಸ್ಥೆಗೆ (UNRWA) ನೀಡುತ್ತಿದ್ದ ಅನುದಾನವನ್ನೂ ಸ್ಥಗಿತಗೊಳಿಸಿದೆ.
ಅಮೆರಿಕದ ಈ ನಡೆಯು ಕೇವಲ ಅಧಿಕೃತ ವಿಶ್ವಸಂಸ್ಥೆಯ ಸಂಸ್ಥೆಗಳಿಗಷ್ಟೇ ಸೀಮಿತವಾಗಿಲ್ಲ. ಕಳೆದ ವರ್ಷ ‘ಯುಎಸ್ ಏಜೆನ್ಸಿ ಫಾರ್ ಇಂಟರ್ನ್ಯಾಷನಲ್ ಡೆವಲಪ್ಮೆಂಟ್’ ಮೂಲಕ ನೀಡಲಾಗುತ್ತಿದ್ದ ವಿದೇಶಿ ನೆರವಿನಲ್ಲಿ ಕಡಿತ ಮಾಡಿದ ಪರಿಣಾಮವಾಗಿ, ವಿಶ್ವಸಂಸ್ಥೆಯೊಂದಿಗೆ ನಿಕಟವಾಗಿ ಕೆಲಸ ಮಾಡುವ ಹಲವಾರು ಸ್ವತಂತ್ರ ಸರ್ಕಾರೇತರ ಸಂಸ್ಥೆಗಳು (NGO) ತಮ್ಮ ಯೋಜನೆಗಳನ್ನು ಸ್ಥಗಿತಗೊಳಿಸಿವೆ.
ಪ್ಯಾರಿಸ್ ಒಪ್ಪಂದದಿಂದಲೂ ನಿರ್ಗಮನ
ಟ್ರಂಪ್ ಅವರ ಈ ಆದೇಶವು ಹವಾಮಾನ ಬದಲಾವಣೆಗೆ ಸಂಬಂಧಿಸಿದ ವಿಶ್ವಸಂಸ್ಥೆಯ ಚೌಕಟ್ಟು ಒಪ್ಪಂದದಿಂದ (UNFCCC) ಅಮೆರಿಕದ ನಿರ್ಗಮನವನ್ನೂ ಅಧಿಕೃತಗೊಳಿಸಿದೆ. ಇದು ಪ್ಯಾರಿಸ್ ಹವಾಮಾನ ಒಪ್ಪಂದದ ಮೂಲ ಆಧಾರವಾಗಿದ್ದು, ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಹವಾಮಾನ ಸಂಬಂಧಿತ ಪ್ರಯತ್ನಗಳಿಗೆ ಶ್ರೀಮಂತ ರಾಷ್ಟ್ರಗಳು ಬೆಂಬಲ ನೀಡುವ ಬದ್ಧತೆಯನ್ನು ಹೊಂದಿದೆ. ಹವಾಮಾನ ಬದಲಾವಣೆಯ ಕಳವಳಗಳನ್ನು ಪದೇ ಪದೇ ತಳ್ಳಿಹಾಕಿರುವ ಟ್ರಂಪ್, ಶ್ವೇತಭವನಕ್ಕೆ ಮರಳಿದ ಕೂಡಲೇ ಪ್ಯಾರಿಸ್ ಒಪ್ಪಂದದಿಂದ ಹೊರಬಂದಿದ್ದರು.
