ವೆನಿಜುವೆಲಾ ಕರಾವಳಿಯಲ್ಲಿ ತೈಲ ಟ್ಯಾಂಕರ್ ಅನ್ನು ಅಮೆರಿಕದ ಸೇನಾಪಡೆ ವಶಪಡಿಸಿಕೊಂಡಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ. ಇದರ ಮೂಲಕ ವೆನಿಜುವೆಲಾ ಅಧ್ಯಕ್ಷ ನಿಕೋಲಸ್ ಮಡುರೊ ಆಡಳಿತದ ಮೇಲೆ ಒತ್ತಡ ಹೆಚ್ಚಿಸಲಾಗಿದೆ.
ಶ್ವೇತ ಭವನದಲ್ಲಿ ಮಾತನಾಡಿದ ಟ್ರಂಪ್ “ನಾವು ವೆನಿಜುವೆಲಾ ಕರಾವಳಿಯಲ್ಲಿ ಒಂದು ಟ್ಯಾಂಕರ್ ಅನ್ನು ವಶಪಡಿಸಿಕೊಂಡಿದ್ದೇವೆ. ನಾವು ಹಿಂದೆ ವಶಪಡಿಸಿಕೊಂಡಿದ್ದಕ್ಕಿಂತ ದೊಡ್ಡದಾದ ಟ್ಯಾಂಕರ್ ಇದಾಗಿದೆ” ಎಂದು ಹೇಳಿದ್ದಾರೆ. ಅಮೆರಿಕದ ಕರಾವಳಿ ರಕ್ಷಣಾ ಪಡೆ ಹಾಗೂ ನೌಕಪಡೆಯು ಈ ಕಾರ್ಯಚರಣೆಯನ್ನು ನಡೆಸಿದೆ. ಅಮೆರಿಕ ಬಿಡುಗಡೆ ಮಾಡಿದ ವಿಡಿಯೋಗಳಲ್ಲಿ ಸಶಸ್ತ್ರ ಸೈನಿಕರು ವಿಮಾನದ ಮೂಲಕ ಹಡಗಿನ ಮೇಲೆ ಇಳಿದು, ತೈಲ ಟ್ಯಾಂಕರ್ ಅನ್ನು ವಶಪಡಿಸಿಕೊಳ್ಳುತ್ತಿರುವುದು ಕಾಣುತ್ತದೆ.
ವೆನಿಜುವೆಲಾ ಆಡಳಿತವು ಅಮೆರಿಕಕ್ಕೆ ಮಾದಕವಸ್ತುಗಳನ್ನು ಪೂರೈಸುತ್ತಿದೆ ಎಂದು ಆರೋಪಿಸಿ ಈ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಜೊತೆಗೆ ಅಧ್ಯಕ್ಷ ಮಡುರೊಗೆ ಎದರಿಸುವ ಪ್ರಯತ್ನ ಇದಾಗಿದೆ. ವಿಶ್ವದ ಅತಿದೊಡ್ಡ ತೈಲ ನಿಕ್ಷೇಪಗಳಿರುವ ನೆಲಗಳಲ್ಲಿ ವೆನಿಜವೆಲಾ ಪ್ರಮುಖವಾದದ್ದು. ಈ ಬೆದರಿಕೆಯ ಮೂಲಕ ಅಮೆರಿಕವು ವೆನಿಜುವೆಲಾದಲ್ಲಿನ ಸಂಪನ್ಮೂಲವನ್ನು ತನ್ನ ವಶಕ್ಕೆ ಪಡೆಯುವ ಪ್ರಯತ್ನ ನಡೆಸುತ್ತಿದೆ.
ವೆನಿಜುವೆಲಾದ ರಾಜಧಾನಿಯಾದ ಕ್ಯಾರಕಾಸ್ ಈ ಕ್ರಮವನ್ನು ತೀವ್ರವಾಗಿ ಖಂಡಿಸಿತು. ಇದನ್ನು “ಅಂತರರಾಷ್ಟ್ರೀಯ ಕಡಲ್ಗಳ್ಳತನ” ಎಂದು ಕರೆದಿದೆ.
ಒಂದು ದಿನದ ಹಿಂದೆಯಷ್ಟೇ ವೆನಿಜುವೆಲಾ ಕೊಲ್ಲಿಯ ಮೇಲೆ ಅಮೆರಿಕದ ಯುದ್ಧ ವಿಮಾನಗಳು ಹಾರಾಟ ನಡೆಸಿರುವುದು ಮತ್ತಷ್ಟು ಉದ್ವಿಗ್ನ ಬೆಳವಣಿಗೆಗೆ ಸಾಕ್ಷಿಯಾಗಿತ್ತು. ಈ ಪ್ರದೇಶದಲ್ಲಿ ಅಮೆರಿಕ ಮಿಲಿಟರಿ ಉಪಸ್ಥಿತಿಯನ್ನು ಹೆಚ್ಚಿಸಿದ್ದು, ಕೆರೆಬಿಯನ್ ಸಮುದ್ರ ಹಾಗೂ ಪೂರ್ವ ಪೆಸಿಫಿಕ್ ಮಹಾಸಾಗರದಲ್ಲಿ ಮಾದಕವಸ್ತು ಕಳ್ಳಸಾಗಣೆ ವಿರುದ್ಧ ಸರಣಿ ದಾಳಿಯನ್ನು ನಡಸುತ್ತಿದೆ ಎಂದು ಅಮೆರಿಕದ ಅಧಿಕಾರಿಗಳು ಹೇಳಿದ್ದಾರೆ.
ವೆನಿಜುವೆಲಾ ಮತ್ತು ಇರಾನ್ನಿಂದ ಅನುಮೋದಿತ ತೈಲವನ್ನು ಸಾಗಿಸಲು ಬಳಸಲಾಗುವ ಕಚ್ಚಾ ಟ್ಯಾಂಕರ್ ಅನ್ನು ವಶಪಡಿಸಿಕೊಳ್ಳುವ ವಾರಂಟ್ ಅನ್ನು ಎಫ್ಬಿಐ, ಹೋಮ್ಲ್ಯಾಂಡ್ ಸೆಕ್ಯುರಿಟಿ ಮತ್ತು ಯುನೈಟೆಡ್ ಸ್ಟೇಟ್ಸ್ ಕೋಸ್ಟ್ ಗಾರ್ಡ್, ಯುಎಸ್ ಮಿಲಿಟರಿಯ ಬೆಂಬಲದೊಂದಿಗೆ ತೈಲ ಟ್ಯಾಂಕರ್ ವಶಪಡಿಸಿಕೊಳ್ಳುವ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಯುಎಸ್ ಅಟಾರ್ನಿ ಜನರಲ್ ಪ್ಯಾಮ್ ಬೋಂಡಿ ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಕ್ಯಾರಕಾಸ್ನಲ್ಲಿರುವ ಇರಾನ್ ರಾಯಭಾರ ಕಚೇರಿಯು ಗುರುವಾರ ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ ಪೋಸ್ಟ್ನಲ್ಲಿ ಈ ಕ್ರಮವನ್ನು “ಅಂತರರಾಷ್ಟ್ರೀಯ ಕಾನೂನುಗಳು ಮತ್ತು ಮಾನದಂಡಗಳ ಗಂಭೀರ ಉಲ್ಲಂಘನೆ” ಎಂದು ಖಂಡಿಸಿದೆ.
ವಶಪಡಿಸಿಕೊಂಡ ಸುದ್ದಿಗಳು ಬರುತ್ತಿದ್ದಂತೆ ಬ್ರೆಂಟ್ ಕಚ್ಚಾ ತೈಲದ ಬೆಲೆಗಳು ಏರಿಕೆಯಾಗಿದೆ. ಇದರಿಂದ ವೆನಿಜುವೆಲಾದ ತೈಲ ರಫ್ತಿಗೆ ಮತ್ತಷ್ಟು ಅಡ್ಡಿಯಾಗಬಹುದು ಎಂದು ವಿಶ್ಲೇಷಕರು ಎಚ್ಚರಿಸಿದ್ದಾರೆ. ಇದರ ನಡುವೆಯೇ, ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮಡುರೊ ಅವರನ್ನು ಭೇಟಿ ಮಾಡಿ ಮಾತುಕತೆ ನಡೆಸಿದ್ದಾರೆ ಎಂದು ಬಿಬಿಸಿ ವರದಿ ಮಾಡಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ವೆನಿಜುವೆಲಾ ಅಧ್ಯಕ್ಷ ಮಡುರೊ ಅವರನ್ನು ಅಧಿಕಾರದಿಂದ ಹೊರಹೋಗುವಂತೆ ಬೆದರಿಕೆ ಹಾಕಿದ್ದಾರೆ. ಅಮೆರಿಕಕ್ಕೆ ಮಾದಕವಸ್ತುಗಳನ್ನು ವೆನಿಜುವೆಲಾ ಅಕ್ರಮವಾಗಿ ಸಾಗುತ್ತಿದೆ ಎಂದು ಟ್ರಂಪ್ ಆರೋಪ ಮಾಡಿದ್ದಾರೆ.
ಆದರೆ ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರು ತಮ್ಮ ಸರ್ಕಾರವನ್ನು ಮಾದಕವಸ್ತು ಕಳ್ಳಸಾಗಣೆ ಮತ್ತು ಅಭದ್ರತೆಗೆ ಸಂಬಂಧಿಸಿದ ಆರೋಪಗಳನ್ನು ತಳ್ಳಿಹಾಕಿದ್ದಾರೆ. ವೆನಿಜುವೆಲಾ ಬಲವಾದ ಸಾರ್ವಜನಿಕ ಸುರಕ್ಷತೆಯನ್ನು ಹೊಂದಿದೆ. ಆದರೆ ಅಮೆರಿಕ ನಮ್ಮ ದೇಶದ ನೈಸರ್ಗಿಕ ಸಂಪನ್ಮೂಲಗಳಿಗಾಗಿ ಗುರಿಯಾಗಿಸುತ್ತಿದೆ ಎಂದು ಹೇಳಿದ್ದಾರೆ ಎಂದು ಅಂತರರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ. ವೆನಿಜುವೆಲಾದ ಸರ್ಕಾರವು ಲಂಡನ್ನಲ್ಲಿರುವ ಅಂತರರಾಷ್ಟ್ರೀಯ ಕಡಲ ಸಂಸ್ಥೆ (IMO) ಗೆ ಅಮೆರಿಕದ ವಿರುದ್ಧ ದೂರು ದಾಖಲಿಸಿದೆ.
ಟ್ರಂಪ್ ನೀತಿ ಸರಿಯೇ?
ಡೊನಾಲ್ಡ್ ಟ್ರಂಪ್ ವೆನಿಜುವೆಲಾದ ಮೇಲೆ ಆಸಕ್ತಿ ಹೊಂದಲು ನೈಸರ್ಗಿಕ ಸಂಪತ್ತಾದ ಕಚ್ಚಾ ತೈಲವೇ ಮೊದಲ ಕಾರಣ. 2023 ರ ಹೊತ್ತಿಗೆ ಅಂದಾಜು 303 ಬಿಲಿಯನ್ ಬ್ಯಾರೆಲ್ಗಳು ಎಂದು ಅಂದಾಜಿಸಲಾಗಿದೆ. ಜಗತ್ತಿನ ಅತಿದೊಡ್ಡ ತೈಲ ನಿಕ್ಷೇಪಗಳಿಗೆ ವೆನಿಜುವೆಲಾ ಪ್ರಮುಖವಾದ ನೆಲೆಯಾಗಿದೆ ಎಂದು ಅಲ್ ಜಜೀರಾ ವರದಿ ಮಾಡಿದೆ. ಪ್ರತಿದಿನ ಕನಿಷ್ಠ 1 ಮಿಲಿಯನ್ ಬ್ಯಾರಲ್ ನಷ್ಟು ತೈಲದಷ್ಟು ಹೊರತೆಗೆಯುತ್ತದೆ.
ದಕ್ಷಿಣ ಅಮೆರಿಕದಲ್ಲಿರುವ ವೆನಿಜುವೆಲಾದಲ್ಲಿರುವ ನೈಸರ್ಗಿಕ ಸಂಪತ್ತಿನ ಮೇಲೆ ತನ್ನ ಸಂಪೂರ್ಣ ಅಧಿಕಾರವನ್ನು ಹಿಡಿತದಲ್ಲಿ ಇಟ್ಟುಕೊಳ್ಳಲು ಟ್ರಂಪ್ ಹೀಗೆ ಟ್ಯಾಂಕರ್ ಗಳನ್ನು ವಶಪಡಿಸಿಕೊಂಡಾಗಿಯೂ ನೇರವಾಗಿ ಬೆದರಿಕೆ ಹಾಕಿದ್ದು. ಇಲ್ಲಿಯವರೆಗೂ ವಶಪಡಿಸಿಕೊಂಡ ಟ್ಯಾಂಕರ್ಗಳಿಗಿಂತ ಇದು ದೊಡ್ಡದೆಂದು ಹೇಳಿದ್ದು, ಯಾರಿಗೂ ಹೆದರುವುದಿಲ್ಲ ಎಂಬ ಮಾತನ್ನು ಸೂಚಿಸುತ್ತದೆ.
